საპასუხოდ, “რუსთავის ფოლადმა” “ქართული ფოლადის” დირექტორის, ნათია ჯაყელისა და ჯოზეფ კეის წინააღმდეგ სასამართლოში სარჩელი შეიტანა.
“რამდენიმე დღის წინ ჩავიბარე შ.პ.ს. „რუსთავის ფოლადის“ მიერ გამოგზავნილი სარჩელი ბატონი ჯოზეფ კეის და ჩემს წინააღმდეგ პატივისა და ღირსების შელახვის თაობაზე. 2011 წლის 6 ივლისს, მას შემდეგ რაც ინა გუდავაძემ და სააკაშვილის ხელისუფლების წარმომადგენლებმა ხელი მოაწერეს დღესაც გრიფით საიდუმლო დოკუმენტს, რომლის ძალითაც წაგვართვეს რუსთავის მეტალურგიული ქარხანა და 15 წუთი მოგვცეს ტერიტორიის დასატოვებლად. სამუშაო ოთახში დამრჩა ჩემი ნივთები, რომლებიც ისევე მიითვისეს, როგორც ქარხანა და სხვა დანარჩენი. ჩემს პირად ნივთებს შორის იყო წიგნები და ერთ-ერთი მათგანი „ქართული ენის განმარტებითი ლექსიკონი“ მე მოხარული ვარ, თუ მათ ეს წიგნი გადაშალეს და იქ ამოიკითხეს სიტყვების “ღირსება” და “პატივი” მნიშვნელობა.
მთელი პასუხისმგებლობით ვაცხადებ, რომ ნებისმიერი ჩემი სიტყვა თუ გამონათქვამი გამყარებულია დოკუმენტებითა და მტკიცებულებებით და მას შემდეგ რაც ისინი ახსნიან თუ რას გულისხმობენ “პატივისა” და “ღირსების” შემლახველ გამონათქვამებში, საპასუხოდ მასმედიის საშუალებით გავავრცელებთ ყველა იმ დოკუმენტს, რომლითაც დადასტურდება მართლა გაძარცვეს თუ არა მათ საქართველოს ბიუჯეტი და არის თუ არა მათთვის სასამართლოს გადაწყვეტილება მხოლოდ ფარატინა ქაღალდი!” _ აცხადებს ნათია ჯაყელი.
მისი თქმით, სამართლიანობის აღდგენისათვის ბრძოლის გზაზე პირველი მნიშვნელოვანი გამარჯვებაა მიღწეულია. ნათია ჯაყელი დარწმუნებულია, რომ ის ადამიანები, რომელთაც უკანონო გარიგებებით მარტო სახელმწიფო ბიუჯეტი 39 მილიონი ლარით აზარალეს, კანონის შესაბამისად პასუხს აგებენ.
“უკვე რამდენიმე თვეა ს.ს. “ქართული ფოლადის” მოთხოვნათა სიაში ფიგურირებს ერთ-ერთი თემა _ მაქინაციებითა და კრიმინალური ქმედებებით ინა გუდავაძემ და მისმა გუნდმა, რომელიც დღეს შ.პ.ს „რუსთავის ფოლადს“ აკონტროლებს, საქართველოს ბიუჯეტიდან 39 მილიონი ლარი მოიპარა. დღეს ვასაჯაროებთ იმ დოკუმენტებს რომელიც ამ ფაქტის უტყუარი მტკიცებულებაა. დანარჩენი კი მარტივი არითმეტიკაა. ეს მთელი სქემა ერთ დღესაა განხორციელებული, უფრო სწორად ლამის ერთი წუთის ინტერვალით.”
“გურია ნიუსი” წარმოგიდგენთ ამ ანგარიშფაქტურებს.
“ეს არის ანგარიშფაქტურები, რომლებიც ამტკიცებენ შემდეგს: რამდენიმე წუთის სხვაობით, ქართული ფოლადის კუთვნილი წიდა ჯერ მიყიდეს შუალედურ კომპანიას 3 916 418 ლარად და 1 წუთის შემდეგ იმ შუალედურმა კომპანიამ მიყიდა რუსთავის ფოლადს 256 178 000,00 ლარად. შედეგად წარმოიქმნა დღგ 39 მილიონი (არა რეალური, არამედ ვირტუალური). მათ ეს ვირტუალური თანხა გაანაღდეს, ანუ აქციეს რეალურად – არ არსებული მოიპარეს ბიუჯეტიდან. ჩვენ შეტანილი გვაქვს პროკურატურაში ეს ფაქტურები, როგორც მტკიცებულება, ფაქტი არის თვალნათელი, მაგრამ გამოძიება პრაქტიკულად გაჩერებულია, ეს სისხლის სამართლის თემაა.” _ აცხადებს ნათია ჯაყელი.
“გურია ნიუსი” იმ ბრალდებებთან და წარმოდგენილ დოკუმენტებთან დაკავშირებით, რასაც “ქართული ფოლადი” 
ავრცელებს, პატარკაციშვილების ადვოკატს, გიორგი გეწაძესაც დაუკავშირდა.
_ ბატონო გიორგი, თქვენ შეიტანეთ სარჩელი ნათია ჯაყელისა და ჯოზეფ კეის წინააღმდეგ და მათ პატივისა და ღირსების შელახვაში ადანაშაულებთ. აცხადებთ, რომ 39 მილიონის ბიუჯეტიდან მოპარვაზე განცხადება სიმართლეს არ შეეფერება
_ ერთ-ერთი სწორედ ეგ ფაქტორი გახლდათ, ბიუჯეტიდან 39 მილიონის მოპარვასთან დაკავშირებით. ამას არანაირი კავშირი არ აქვს სიმართლესთან, მათ არ შეიძლება ქონდეთ ისეთი საბუთი, რომელიც ამ განცხადებას გაამყარებდა.
_ თუმცა, ანგარიშფაქტურები, რომელიც ჩვენს ხელთ არის, ძალიან ბევრ კითხვის ნიშანს აჩენს. ანგარიშფაქტურები, ამტკიცებენ შემდეგს: რამდენიმე წუთის სხვაობით, ქართული ფოლადის კუთვნილი წიდა ჯერ მიყიდეს შუალედურ კომპანიას 3 916 418 ლარად და 1 წუთის შემდეგ იმ შუალედურმა კომპანიამ მიყიდა რუსთავის ფოლადს 256 178 000,00 ლარად. შედეგად წარმოიქმნა დღგ 39 მილიონი. აი ამ 39 მილიონზეა საუბარი. სხვაობა მართლაც უზარმაზარია…
_ იცით როგორ არის, კი ბატონო, არსებობს ეს ორი ხელშეკრულება, მე არ ვარ უფლებამოსილი, ამაზე ვისაუბრო. არ ვიცი, რა ვითარებაში მიმდინარეობდა მოლაპარაკება. ერთია ნასყიდობის ხელშეკრულების გაფორმება და მეორეა კრიმინალი. იმისთვის, რომ მისი განცხადება იყოს ლეგიტიმური, ერთადერთი სასამართლოს კანონიერ ძალაში შესული გადაწყვეტილებაა, რაც არ არსებობს. მისი ეს განცხადება შეიძლება იყოს ვარაუდი, რომელსაც არაფერი აქვს საერთო ფაქტებთან. არ შეიძლება თუნდაც ანგარიშფაქტურა იყოს ამის მტკიცებულება. მისი ეს განცხადება არის კომპანიისთვის საქმიანი რეპუტაციის შემლახავი.
_ ფაქტია, ბატონო გიორგი ისიც, რომ 3 მილიონად ნაყიდის 256 მილიონად გაყიდვა ერთ წუთში ჩვეულებრივი ამბავი არ არის. ასე არ ხდება…
_ ვერაფერს გეტყვით, მაგ კითხვით უფრო ხელმძღვანელობას უნდა მიმართოთ. ამ ხელშეკრულების შესახებ ვერაფერს გეტყვით.
_ სამწუხაროდ, თქვენი ხელმძღვანელობა სატელეფონო ზარებს არ პასუხობს…
_ ამ ეტაპზე ანგარიშფაქტურებთან დაკავშირებით ვერაფერს ვიტყვით. “ქართული ფოლადის” მხრიდან კიდევ ერთი მძიმე ბრალდება იყო, როდესაც მათი ოფისის აფეთქებას ჩვენ გვიკავშირებდნენ, ესეც პატივის და ღირსების შელახვა იყო ჩვენთვის.
“ქართულ ფოლადში” აცხადებენ, რომ ეს ყველაფერი მიხეილ სააკაშვილის ხელისუფლების დროს განხორციელდა თუმცა ძველი ინერციით ინა გუდავაძე და მისი გუნდი ისევ აგრძელებს თავის ქმედებებს და რაც მთავარია, ისინი სასამართლო გადაწყვეტილებას უგულებელყოფენ.
“სასამართლომ გამოიტანა გადაწყვეტილება და გასცა აღსრულების ფურცელიც, რომლითაც მათ აეკრძალათ წიდის და მისი გადამუშავების შედეგად მიღებული პროდუქტის გაყიდვა. მიუხედავად ამისა, ისინი ამ პროდუქციის გაყიდვას მაინც აგრძელებენ.
მივმართავ შესაბამის საგამოძიებო ორგანოებს სასწრაფო რეაგირება მოახდინონ ამ ორივე ფაქტზე! გუდავაძის ბიზნესჯგუფის დაუსჯელობის სინდრომის სათავის “ზესაიდუმლო” დოკუმენტია, რომელიც მიხეილ სააკაშვილთან 2011 წლის 6 ივლისს გააფორმეს და რომლის გასაჯაროებასაც დიდი ხანია ვითხოვთ!” _ აცხადებს ნათია ჯაყელი.
მათივე თქმით, გავრცელდა ინფორმაცია, რომ შპს “რუსთავის ფოლადის” წარმომადგენლები_ ინა გუდავაძე და ირაკლი რუხაძე თბილისის მერისა და “ნაციონალური მოძრაობის” სხვა ლიდერების მეშვეობით ცდილობენ უზენაეს სასამართლოზე უკანონო გავლენის მოხდენას.
“ჩვენ გვჯერა, უზენაესი სასამართლოს წევრები გათავისუფლდნენ წარსულის აჩრდილებიდან და დღეს მხოლოდ კანონისა და სამართლიანობის მორჩილებაში არიან! გაუძლებენ შანტაჟსა და ზეწოლას, მოწოდების სიმაღლეზე აღმოჩნდებიან და სამართლებრივად ერთადერთ სწორ გადაწყვეტილებას მიიღებენ.
ს.ს. “ქართულ ფოლადს” არ დასჭირდება საერთაშორისო ინსტიტუტებისა და უცხოური სასამართლოების ჩართვა სამართლებრივად ასეთ ნათელ საკითხში, როგორიც 2011 წლის 6 ივლისს ჯარით წართმეულ ქონების უკან დაბრუნებაა.” _ აღნიშნავენ “ქართული ფოლადის” წარმომადგენლები.
შეგახსენებთ, რომ საპარლამენტო არჩევნებში “ნაციონალური მოძრაობის” დამარცხების შემდეგ, “ქართულმა ფოლადმა” უფლებების აღსადგენად სასამართლოს მიმართა, რომელმაც ბათილად და არაკანონიერად სცნო შპს “რუსთავის ფოლადისათვის” მეტალურგიული ქარხნის აქტივების გადაცემა და ქონება “ქართული ფოლადს” დაუბრუნა. სააპელაციო სასამართლომ ძალაში დატოვა საქალაქო სასამართლოს გადაწყვეტილება.
