ისტორიკოსმა და ჟურნალისტმა რუსლან ურუშაძემ თეატრალიზებული გახსნის შემდეგ, აქ შეკრებილ სტუმრებსა და მასპინძლებს უამბო, თუ როგორ მუშაობდნენ მთელი წლის მანძილზე “სტუდენტურ-ახალგაზრდული სათათბიროს” წარმომადგენლები, რომ ეს დღე წარმატებული ყოფილიყო.
“ეს არის ჩვენი ერთ-ერთი პროექტის “კულტურის ხიდი წარსულსა და მომავალს შორის” ფარგლებში ჩატარებული ღონიძიება, რომელიც ევროკავშირის აღმოსავლეთის კულტურის პროგრამის მეშვეობით გახორციელდა. მისი მონაწილე თქვენ გახდით. ექვსი თვის მანძილზე ბევრმა ბევრი რამ გაიგო გურულ ეთნოგრაფიაზე. ოზურგეთის ისტორიულმა მუზეუმმა მისცა საშუალება ბავშვებს, შეესწავლათ არაერთი გურული სახელოსნო საქმე, გიდლებისა თუ კალათების ქსოვა, ასევე ჭილით ქსოვა, სხვადასხვა ხელსაქმე. იმედია, ამ ერთი პროექტით არ დასრულდება ეს ყოველივე,” _ თქვა “სტუდენტური-ახალგაზრდული სათათბიროს” თავმჯდომარემ ნათია გიგიაძემ.
რუსლან ურუშაძე ისტორილი ექსკურსის მიმოხილვით ჩაერთო განხორციელებული სცენარის მსვლელობაში _ ღია ცის ქვეშ შესრულდა სხვადასხვა მისტერიები: საწნახელის გამობრძანება და ყურძნის დაწურვა, სიმინდის გარჩევა. ასევე ღია ცის ქვეშ გაკეთდა სხვადასხვა კერძები გურული სამზარეულოდან. წარმოადგინეს უძველესი ქართული ჯიშის ვაზის არაერთი ნიმუში, მტევნების სახით.
ყველაზე საინტერესო კი კულტურული სანახაობები იყო “შვიდკაცასა” “ელესას” მონაწილეობით. ქორეოგრაფ მელისი ნადირიძის ხელმძღვანელობით ხალხური ცეკვის ანსამბლმა “ზენაარმა” მაყურებელი თავისი ხელოვნებით კიდევ ერთხელ მოხიბლა. პროექტში გაზეთი “კარმიდამო ჩემი” მონაწილეობდა. ჟურნალისტი მარინე ჩიხლაძე მოსწავლეებს ქარგვისა და ქსოვის შესწავლაში დაეხმარა, რის შემდეგაც აქ, ღია ცის ქვეშ მათი ნამუშევრების გამოფენა-გაყიდვა მოეწყო.
როგორც ნათია გიგიაძემ აღნიშნა, მათ ბევრი სტუმარი ჰყავდათ მოპატიჟებული, მათ შორის, ხელისუფლების წარმომადგენლები, როგორც გუბერნიიდან, ისე მუნიციპალიტეტის გამგეობიდან. თუმცა, ღონისძიებაზე მხოლოდ რაიონის გამგებელი და მისი მოადგილე მოვიდნენ. რაც მთავარია, ამ ზეიმს ხალხმრავლობა არ დაკლებია და რიგითი ადამიანები, ბავშვები ძალიან კმაყოფილი დარჩნენ.
