აღნიშნულ საკითხთან დაკავშირებით პროტესტს გამოთქვამს აფხაზეთის უმაღლესი საბჭოს ფრაქცია “ქართული ოცნება–დემოკრატიული საქართველოს” წევრები. ფრაქციის თავმჯდომარე, მურმან კვარაცხელია აცხადებს, რომ აფხაზეთის უმაღლესი საბჭო მოქმედებს 1978 წლის კონსტიტუციით და შემდგომ წლებში მიღებული კანონებით, რომელიც საქართველოს კონსტიტუციაშია ჩადებული.
“აფხაზეთის ავტონომიური რესპუბლიკა ეს არის დამოუკიდებელი წარმონაქმნი, მაგრამ საქართველოს განუყოფელი ნაწილი. სხვა არაფერი კონსტიტუციაში აფხაზეთთან მიმართებაში არ წერია. ჩვენ წავაწყდით ერთ ისეთ ფაქტს კონსტიტუციურ ცვლილებასთან დაკავშირებით, რომელიც გონივრული ეჭვის საბაბი ხდება, მხედველობაში მაქვს პროცესი, რომელიც ამ კონსტიტუციის ცვლილებასთან არის დაკავშირებული. რატომ უნდა იყოს განსხვავება აჭარის და აფხაზეთის ავტონომიურ რესპუბლიკების კონსტიტუციაში თუნდაც უმაღლესი თანამდებობის პირების დანიშვნაში. ჩვენი აზრით ეს საკითხი საკმაოდ დიდ დაფიქრებას და განხილვას მოითხოვს. მე არ ვეთანხმები აფხაზეთის პირველი პირის დანიშვნის წესის შესახებ მუხლს. აქ წერია, რომ აფხაზეთის მთავრობის თავმჯდომარეს ნიშნავს საბჭო ხმათა უმრავლესობით. ეს ჩემი აზრით არის ნონსესი. აფხაზეთის უმაღლესი საბჭო აბსოლუტურად უმეთვალყურეოდ რჩება, საზოგადოება უარყოფითად აფასებს ამ კანონპროექტებს და არ უჭერს მხარს ცვლილებებს, თუ ეს ცვლილება დამტკიცდა, გამოდის რომ აფხაზეთის უმაღლესი საბჭო არაფერს ეკითხება პრეზიდენტს, პრემიერს, მინისტრთა კაბინეტს, პარლამენტს.
აჭარაში კი სხვანაირად ხდება. პრეზიდენტი, სათანადო კონსულტაციის გავლის შემდეგ უთანხმებს აჭარის მთავრობის კანდიდატურას პრემიერს, საქართველოს მთავრობას და ამის შემდეგ წარადგენს აჭარის უმაღლეს საბჭოში დასამტკიცებლად. ასე უნდა ხდებოდეს აფხაზეთშიც. ეს ყველაფერი იწყვევს კითხვას–მართლაც ხომ არ უნდა ვინმეს აფხაზეთის დამოუკიდებლობის აღიარება. აი, ამიტომ ვშიშობთ და არ ვეთანხმებით ამ ცვლილებების დამტკიცებას”.
კონსტიტუციაში შესატან ცვლილებებს არ ეთანხმებიან საზოგადოებრივი გაერთიანების “ჩვენი აფხაზეთი”-ს წარმომადგენლებიც და აცხადებენ, რომ აფხაზეთის უმაღლესი საბჭო არასდროს იზიარებდა ხალხის ინტერესებს და უკმაყოფილობას გამოთქვამენ მათი საქმიანობის გამო.
მერაბ ჯიქია: “ეს ორგანოები წლების განმავლობაში ფაქტიურად კომფორმიზმის ჭაობში იყვნენ ჩაფლულები რამდენიმე დეპუტატის გამოკლებით, რომლებიც ადრეც და დღესაც ხალხის გვერდით დგანან. დევნილთა ინტერესებზე არ არის ჭეშმარიტი ზრუნვა. მათ გააჩნიათ მრავალი ბერკეტი იმისა, რომ მივიდნენ დევნილებთან და შეძლონ პრობლემების მოგვარება. ამ კონკრეტულ საკითხთან მიმართებაშიც კარგად ჩანს აფხაზეთის უმაღლესი საბჭოს დამოკიდებულება, უნდათ სრული ავტონომია შეიქმნან. მათ ავიწყდებათ, რომ ისინი არიან საქართველოს ცენტრალური ხელისუფლების ვერტიკალი. ჩვენ ვეწინააღმდეგებით აფხაზეთის მთავრობის პირველი პირის დანიშვნას საბჭოს წევრების პირდაპირი კვოტით. ხალხს ხომ უნდა შეუთანხმდნენ, თუ აღარც აქ ვარსებობთ მათთვის? აფხაზეთი საქართველოს განუყოფელი ნაწილია და აქაც, როგორც აჭარის ავტონომიურ რესპუბლიკაში საქართველოს ცენტრალურ ხელისუფლებასთან შეთანხმებით უნდა ხდებოდეს საკითხების გადაჭრა”.
აფხაზეთისა და სამაჩაბლოს წარმომადგენელთა საინიციატივო ჯგუფის წევრმა გოჩა ბახიამ ასევე გამოხატა დევნილების საპროტესტო განწყობა და განაცხადა, რომ 32 არასამთავრობო ორგანიზაცია ერთად არის შეკრებილი და ხალხის მოთხოვნის გაუთვალისწინებლობის შემთხვევაში, დაიწყებენ ფართომაშტაბიან აქციებს.
“საკონსტიტუსიო ცვლილებებს კატეგორიულად ეწინააღმდეგება 32 არასამთავრობო ორგანიზაცია და მზად ვართ დავიწყოთ საპროტესტო აქციები აფხაზეთის მთავრობის წინააღმდეგ, რადგან ისინი არ გამოხატავენ ხალხის ნებას. ჩვენ გვაქვს საკოორდინაციო საბჭო და უკან დახევას არ ვაპირებთ”.
აფხაზეთის ავტონომიური რესპუბლიკის უმაღლესი საბჭოს თავმჯდომარე გია გვაზავა კი აცხადებს, რომ მიმდინარეობს სამუშაო პროცესი. საქართველოს კონსტიტუცია და აფხაზეთის კონსტიტუცია ერთმანეთთან შესაბამისობაში უნდა იყოს. მისი განცხადებით ამ საპროტესტო აქციებში სხვა მუხტია ჩადებული და სწორედ რომ ეს იწვევს ეჭვის საბაბს.
“2005 წლამდე არავის გახსენებია თუ როგორ ინიშნებოდა ან თავისუფლდებოდა თანამდებობიდან აფხაზეთის მთავრობის თავმჯდომარე. დღეს კი მავანს და მავანს უნდა აამღვრიოს წყალი და საზოგადოებაში არასწორი შეხედულება დანერგოს. საქართველოს კონსტიტუცია ჩვენთვის უზენაესია და ვიმოქმედებთ მისი ძალაუფლებით. საჭიროა კონსულტაციები, მოლაპარაკებები და შეთანხმებები”.
ზუგდიდში კი უკვე მეორე დღეა გრძელდება დევნილთა საპროტესტო აქცია. როგორც მოშიმშილეები აცხადებენ, დღეს კიდევ სეუერთდებიან სხვა დევნილებიც, ხოლო თუ არ დაკმაყოფილდება მათი მოთხოვნა, ფართომაშტაბიან აქციებს უკვე თბილისში გააგრძელებენ.
