პროექტის თანახმად, სასჯელაღსრულების, პრობაციისა და იურიდიული დახმარების საკითხთა სამინისტრის გენერალური ინსპექციის შიდა ინსპექტირების სამმართველოს ენიჭება ოპერატიულ-სამძებრო საქმიანობის განხორციელების უფლებამოსილება. კანონპროექტის მიზანია, პატიმრობისა და თავისუფლების აღკვეთის დაწესებულებებში ოპერატიულ-სამძებრო საქმიანობის განხორციელების ეფექტიანი კოორდინაცია. იურიდიულ საკითხთა კომიტეტის წევრებმა მხარი დაუჭირეს კანონპროექტის პლენარულ სხდომაზე გატანას.
კომიტეტმა მესამე მოსმენისთვის განიხილა “საქართველოს სამოქალაქო საპროცესო კოდექსში ცვლილების შეტანის შესახებ” კანონპროექტი. პროექტის თანახმად, სამოქალაქო სამართალწარმოების გზით შესაძლებელი იქნება სისხლის სამართლის კოდექსის 194-ე მუხლით (უკანონო შემოსავლების ლეგალიზაცია), ასევე 3311(ტერორიზმის დაფინანსება) მუხლით გათვალისწინებული დანაშაულისთვის მსჯავრდებული პირისათვის ქონების ჩამორთმევა და სახელმწიფოსთვის გადაცემა. იურიდიულ საკითხთა კომიტეტმა მხარი დაუჭირა განხილული კანონპროექტის პლენარულ სხდომაზე გატანას.
პარლამენტის პრესსამსახურის ინფორმაციით, “ტერორიზმთან ბრძოლის შესახებ” კანონი საერთაშორისო სტანდარტებთან შესაბამისობაში მოდის. იურიდიულ საკითხთა კომიტეტმა მეორე მოსმენისთვის განიხილა აღნიშნულ კანონში შესატანი ცვლილებები. კანონპროექტით, “ტერორისტული ორგანიზაცია” განიმარტება, როგორც ორგანიზაცია შექმნილი ტერორისტული საქმიანობის განხორციელების მიზნით. ორგანიზაცია შეიძლება ცნობილი იქნეს ტერორისტულად, თუ ის წარმოადგენს დროის განსაზღვრულ პერიოდში არსებულ ორზე მეტი პირის ორგანიზებულ გაერთიანებას. ორგანიზებულად ჩაითვლება გაერთიანება, რომელიც არ არის შემთხვევით შექმნილი დანაშაულის ჩასადენად და რომელშიც არ არის აუცილებელი ფორმალურად იყოს განაწილებული როლები მის წევრთა შორის, წევრობას ჰქონდეს უწყვეტი ხასიათი ან ჩამოყალიბებული იყოს განვითარებული სტრუქტურა. რაც შეეხება “ტერორისტული აქტის” განმარტებას, ის შესაბამისობაში მოდის ამ კანონპროექტის თანმდევი სისხლის სამართლის კოდექსში ცვლილებების ამსახველი პროექტით შემოთავაზებულ ანალოგიური ტერმინის განმარტებასთან. პროექტში მოცემულია ასევე ტერორისტული აქტის განმარტება და ტერორისტული მიზნის განმარტებაც. დეპუტატებმა მხარი დაუჭირეს განხილული კანონპროექტის პლენარულ სხდომაზე გატანას.
სასჯელაღსრულების, პრობაციისა და იურიდიული დახმარების საკითხთა სამინისტროს მმართველობის სფეროდან იურიდიული დახმარების სამსახურის გამოყოფა იგეგმება. კომიტეტის წევრებმა პირველი მოსმენისთვის განიხილეს კანონპროექტი “იურიდიული დახმარების შესახებ” კანონში ცვლილების შეტანის თაობაზე” და მისი თანმდევი პროექტები. კანონპროექტის თანახმად, იურიდიული დახმარების სამსახური ანგარიშვალდებული იქნება მხოლოდ პარლამენტის წინაშე. ამასთან სამსახურზე, როგორც საჯარო სამართლის იურიდიულ პირზე, არ გავრცელდება “საჯარო სამართლის იურიდიული პირის შესახებ” კანონის ის ნორმები, რომელიც ეხება სახელმწიფო ზედამხედველობასა და კონტროლს – კანონპროექტი თავად ჩამოთვლის სამსხურის იმ ტიპის საქმიანობას, რომელსაც ესაჭიროება შესაბამისი სახელმწიფო ორგანოს თანხმობა. იურიდიული დახმარების სამსახურის დირექტორი ყოველწლიურად, არა უგვიანეს 1 მარტისა, საქართველოს პარლამენტს წარუდგენს სამსახურის წინა წლის საქმიანობის ანგარიშს. თუ პარლამენტი სამსახურის ანგარიშის მოსმენის შედეგად ან სხვა წყაროებიდან მიღებული ინფორმაციის საფუძველზე მივა იმ დასკვნამდე, რომ არსებობს დირექტორის უფლებამოსილების ვადამდე შეწყვეტის ცალკეული საფუძვლები, იგი მიიღებს გადაწყვეტილებას დირექტორის თანამდებობიდან გათავისუფლების შესახებ. პროექტით, სამსახურის მართვის ბერკეტები გადაეცემა არა რომელიმე სხვა სახელმწიფო უწყებას, არამედ სპეციალურად ამისათვის შექმნილ კოლეგიურ ორგანოს – იურიდიული დახმარების საბჭოს, რომელიც დაკომპლექტდება ხელისუფლების სხვადასხვა შტოების, ასევე სახალხო დამცველის, ადვოკატთა ასოციაციის, თავად იურიდიული დახმარების სამსახურისა და უფლებადამცვველი ორგანიზაციების წარმომადგენლებისგან. ცხრაწევრიანი საბჭო მიიღებს სტრატეგიულ გადაწყვეტილებებს და განსაზღვრავს სამსახურის საქმიანობის ძირითად მიმართულებებს. საბჭოს მიერ კონკურსის წესით შერჩეული და მის წინაშე ანგარიშვალდებული დირექტორი აღმასრულებელი და სხვა ფუნქციებით იქნება აღჭურვილი. კანონპროექტი იურიდიული დახმარების სამსახურის ინსტიტუციური დამოუკიდებლობის უზრუნველყოფასთან ერთად ითვალისწინებს საზოგადოებრივი ადვოკატის მიუკერძოებლობის გარანტიებს, კრძალავს მასზე ყოველგვარ ზეწოლას, მის მიმართ სანქციების გამოყენებას ან გამოყენების მუქარას სამსახურებრივი მოვალეობის კანონიერი და კეთილსინდისიერი შესრულების დროს. კანონპროექტი სხვა ცვლილებებთან ერთად აფართოებს უფასო იურიდიული დახმარების მიმღებ პირთა წრეს, ასევე ბრალდებულსა და განსასჯელთან ერთად ადგენს გამართლებულის შემდგომი ინტერესების დაცვის შესაძლებლობას. იურიდიულ საკითხთა კომიტეტის წევრებმა მხარი დაუჭირეს კანონპროექტის პლენარულ სხდომაზე გატანას.
იურიდიულ საკითხთა კომიტეტმა მეორე მოსმენისთვის განიხილა “უკანონო შემოსავლის ლეგალიზაციის აღკვეთის ხელშეწყობის შესახებ” კანონში შესატანი ცვლილებები. კანონპროექტის თანახმად, პროფესიებს, რომელთა წარმომადგენლებიც ვალდებულნი არიან საეჭვო გარიგებების არსებობის შემთხვევაში ფინანსური მონიტორინგის სამსახურს ინფორმაცია მიაწოდონ, ემატება ადვოკატის პროფესიაც. კანონპროექტის თანახმად, ადვოკატი ვალდებული ხდება, ფინანსური მონიტორინგის სამსახურს საეჭვო გარიგების და ზოგადად, ისეთი გარიგებების შესახებ შეატყობინოს, რომელიც “უკანონო შემოსავლის ლეგალიზაციის აღკვეთის ხელშეწყობის შესახებ” კანონის რეგულირების სფეროს წარმოადგენს.
სხდომას ესწრებოდნენ ადვოკატთა ასოციაციის წევრები, რომელთა აზრით, წარმოდგენილი ცვლილება არ უნდა განხორციელდეს, რადგან ის ეწინააღმდეგება ადვოკატთა საქმიანობის პრინციპებს. იუსტიციის მინისტრის მოადგილის, ალექსანდრე ბარამიძის განმარტებით, ცვლილება შემუშავდა საერთაშორისო ორგანიზაციების რეკომენდაციების საფუძველზე და მისი არმიღება ქვეყნის საგარეო ინტერესებს დააზარალებს. კომიტეტმა კანონპროექტი პლენარულ სხდომაზე განხილვისათვის მიუღებლად ცნო.
