მისი განცხადებით, ამ თანხის დიდი ნაწილი შეიძლება გაუხარჯავი ნაშთის სახით დარჩეს და მომავალი წლის ბიუჯეტში გადავიდეს.
აქედან გამომდინარე მიმართავს თბილისის მერს, რომ მომავალი წლის თბილისის ბიუჯეტში აუცილებლად ჩაიდოს კოოპერატიული ბინათმშენებლობებით დაზარალებული მოსახლეობისთვის საცხოვრებელი კორპუსების დამთავრებისთვის საჭირო თანხა.
საკრებულოს წევრის თქმით, საუბარია 6 დაუმთავრებელ კორპუსზე, რომელიც 400–მდე ადამიანს მოუგვარებს საცხოვრებელი ფართის პრობლემას.
“კოოპერატიული ბინათმშენებლობების შედეგად დაზარალებული ადამიანები დამეთანხმებიან, რომ ახალი მთავრობის მოსვლის შემდეგ, ბოლო თვეების განმავლობაში ამ პრობლემების მოსაგვარებლად კონკრეტული ნაბიჯებია გადადგმული. “ნაციონალური მოძრაობის” დროს, დაზარალებულები ინფორმაციულ ვაკუუმში იყვნენ და პრობლემის მოგვარების გზა ფურცელზეც არ არსებობდა. დღეს კი ამ ადამიანებს შესაძლელობა აქვთ ურთიერთობა იქონიონ ფინანსთა მინისტრთან, ფინანსთა სამინისტროსთან და სხვა სტრუქტურებთან. ასე რომ, კომუნიკაციის პრობლემა მოგვარებულია. ჩვენ 2010 წლიდან მოყოლებული ვითხოვდით ვალის გასტუმრების წესის დამდგენი კომისიის შექმნას, მაგრამ წინა მთავრობის პერიოდში ეს კომისია არც კი შეკრებილა. დღეის მდგომარეობით, ალბათ, თვის ბოლოს შეიკრიბება ეს კომისია და იმსჯელებს.
დღეს თბილისის ბიუჯეტში არის 170 მილიონზე მეტი თანხა ნაშთის სახით, რომლის ნაწილი გაუხარჯავად გადავა მომავალი წლის ბიუჯეტში, ამიტომ მივმართავ ქალაქის მერს, რომელმაც კანონით უკვე მალე უნდა წარადგინოს მომავალი წლის ბიუჯეტი, რომ ამ ბიუჯეტში შეტანილი იყოს კოოპერატიული ბინათმშენებლობების შედეგად დაზარალებული მოსახლეობისთვის დასამთავრებელი კორპუსებისთვის აუცილებელი თანხა. უგულავა წლების მანძილზე მანიპულირებდა ამ ადამიანების პრობლემებით, მან მოატყუა ისინი, რომ მიიღებდნენ მიწის ნაკვეთებს, მაგრამ მხოლოდ 300 ადამიანს გადაეცა ეს ნაკვეთები. ამიტომ, მივმართავ ქალაქის მერს, გამოყოს თანხები იმ პროგრამისთვის, რომელიც ითვალსწინებს ამ ადამიანების პრობლემის მოგვარებას,” _ განაცხადა სამუშიამ.
მისივე თქმით, წლების წინ თბილისის ბიუჯეტში იდო 5 მილიონი ლარი ამ კორპუსების ასაშენებლად, მაგრამ სწორედ ქალაქის მერმა გააქრო ეს თანხა.
