აგრეთვე, სასამართლომ დაადგინა, რომ მისი გადაწყვეტილება აკრძალვის შესახებ არა მხოლოდ მოცემულ 25 მიმდინარე საჩივარს ეხება, არამედ ნებისმიერ მომავალ საჩივარს, რაც იმას ნიშნავს, რომ მამუკა ნოზაძე ადამიანის უფლებათა ევროპულ სასამართლოში ვერც მიმდინარე პროცესებს გააგრძელებს და საჩივრებს ვერც მომავალში შეიტანს. სტრასბურგის სასამართლომ ეს გადაწყვეტილება თავისი რეგლამენტის 36-ე მუხლის მე-4 (ბ) პუნქტის საფუძველზე მიიღო. ის ამ ზომას მხოლოდ განსაკუთრებულ შემთხვევებში მიმართავს, როცა მომჩივნის ინტერესების დაცვა სათანადოდ აღარ ხდება შესაბამისი ადვოკატის მიერ. მიმდინარე 25 საქმეზე სტრასბურგის სასამართლომ ქართველ მომჩივნებს სხვა წარმომადგენლის დასახელება სთხოვა.
ადვოკატი სასამართლოს ამ გადაწყვეტილებას პოლიტიკურად მოტივირებულად მიიჩნევს და აცხადებს, რომ მისი დისკრედიტაციით იუსტიციის სამინისტრო და ევროსასამართლო ერთნაირად არის დაინტერესებული.
მამუკა ნოზაძე “გურია ნიუსს” იმ წერილის შინაარსს აცნობს, რომლის მიხედვითაც, მისი თქმით, სასამართლომ გადაწყვეტილება მიიღო და ის საქმისწარმოებას ჩამოაშორა.
“2013 წლის 11 ოქტომბერს ევროპულ სასამართლოში გავაგზავნე ასეთი შინაარსის წერილი: “პატივცემულო სასამართლო, უპირველესად გიდასტურებთ ღრმა და გულითად პატივისცემას და ამავდროულად გაცნობებთ მეტად სამწუხარო ამბავს, რომ 2013 წლის 27 სექტემბერს არაადეკვატური მკურნალობის და არაადამიანური მოპყრობის შედეგად გარდაიცვალა მომჩივანი ბატონი დენის ყვარელაშვილი. ევროპულ სასამართლოს არაერთხელ მოვაწოდე ინფორმაცია და შესაბამისი დოკუმენტები, რომლითაც უტყუარად დასტურდებოდა ბატონ დენის ყვარელაშვილის მძიმე ავადმყოფობა, როემლიც ჩემდა გასაოცრად არავის არ სჯეროდა. რის გამოც დადგა მძიმე შედეგი და დღეს დენის ყვარელაშვილი ცოცხალი აღარ არის და ის ვერ მოესწრო სიცოცხლეში სამართლიანობის აღდგენას თუნდაც ევროპული სასამართლოს მიერ გადაწყვეტილების მიღებით. უფრო ადრე კი გარდაიცვალა ბატონი ნიკოლოზ მჭედლიშვილი და ისიც ვერ მოესწრო სამართლიანობის აღდგენას”,- ეს წერილი გავაგზავნე იმის გამო, რომ ევროპული სასამართლოს რეგლამენტის შესაბამისად მე მეკისრება ვალდებულება ნებისმიერი მომჩივანის მისამართის ცვლილების ან გარდაცვალების შემთხვევაში ეს ინფორმაცია სასამართლოს ვაცნობო. ამასთან, აღვნიშნე, რომ ეს პატიმრის გარდაცვალების უკვე მე-2 ფაქტი იყო, ვინაიდან 2 წლის წინ გარდაიცვალა ნიკოლოზ მჭედლიშვილი, რომლის საქმის განხილვაც ასევე დასრულებული იყო. მე მივწერე, რომ ეს უკვე მე-2 ფაქტი იყო და სამწუხაროდ, ევროპულმა სასამართლომაც მათი სიცოცხლის გადარჩენა ვერ უზრუნველყო. ეს ყველაფერი ბუნებრივია, ევროპულმა სასამართლომ იწყინა და ასეთი გადაწყვეტილება მიიღო, რომლის თანახმადაც, მე უფლებამოსილება შემიწყვიტეს ყოველგვარი სამართლებრივი არგუმენტაციის საფუძვლის გარეშე. დენის ყვარელაშვილის საქმის განხილვა 2009 წელს დასრულდა, ანალოგიურად ნიკოლოზ მჭედლიშვილის საქმის განხილვაც, რომელის 2 წლის წინ გარდაიცვალა. ამის მერე ევროპულმა სასამართლომ 22 ოქტომბერს მიიღო შურისმაძიებლური გადაწყვეტილება, იმის გამო, რომ მე დიპლომატიური მაგრამ მწარე სიმართლე ვუთხარი, რომლის თანახმადაც უფლებამოსილებას მიწყვიტავს.
22 ოქტომბერს ევროპული სასამართლოს პალატის თავმჯდომარემ მიიღო გადაწყვეტილება, რომლის თანახმად, 39 საქმეზე წარმომადგენლობითი უფლებამოსილების განხორციელება ამეკრძალა. აქედან საქმეების 90% დასრულებულია და გადაწყვეტილების სტადიაზეა. ევროპული სასამართლოს მიერ მიღებული გადაწყვეტილება განპირობებულია იმით, რომ 2013 წლის სექტემბერში დენის ყვარელაშვილი გარდაიცვალა, რომლის საქმის განხილვაც დასრულებული იქნა ევროპულ სასამართლოში. ეს იყო უმძიმესი ავადმყოფი, რომლის შესახებაც ევროპული სასამართლო ინფორმირებული იყო. მე მივწერე, რომ ეს უკვე მე-2 ფაქტი იყო და სამწუხაროდ, ევროპულმა სასამართლომაც მათი სიცოცხლის გადარჩენა ვერ უზრუნველყო. ეს ყველაფერი ბუნებრივია, ევროპულმა სასამართლომ იწყინა და ასეთი გადაწყვეტილება მიიღო, რომლის თანახმადაც, მე უფლებამოსილება შემიწყვიტეს ყოველგვარი სამართლებრივი არგუმენტაციის საფუძვლის გარეშე”, _ განაცხადა ნოზაძემ.
ადვოკატის თქმით, ამ საქმეში მთავარი დაინტერესებული მხარეები იუსტიციის მინისტრი თეა წულუკიანი და მისი მოადგილე გოჩა ლორთქიფანიძე არიან, რომელთა მოთხოვნითაც ევროპულმა სასამართლომ მსგავსი გადაწყვეტილება მიიღო.
“ევროპული სასამართლო უხერხულ მდგომარეობაში უკვე მეორედ ჩავარდა. 2012 წელს ევროპულმა სასამართლომ მიიღო გადაწყვეტილება ჩემი დაცვის ქვეშ მყოფი პირების – მამუკა კოჭლამაზიშვილისა და მამუკა ალადაშვილის მიმართ, რომელთა საქმეები საქართველოს მთავრობის მოთხოვნის საფუძველზე ამოიღეს განხილვის სიიდან. ამ ადამიანებზე ციხეში ხორციელდებოდა ზეწოლა და არაადამიანური მოპყრობა. მამუკა კოჭლამაზაშვილი მორგში ჩაიყვანეს აწამეს და ამის შემდეგ ხელი მოაწერინეს. ევროპულ სასამართლოს ვაცნობე რომ მათი ნება თავისუფალი არ არის. ამომწურავად მივაწოდე ინფორმაცია თუ რა ხდებოდა სასჯელაღსრულების დაწესებულებებში და ვითხოვდი არ ამორიცხულიყო ეს საქმეები განხილვის სიიდან. ამის მიუხედავად, საქართველოს მთავრობამ სასამართლო შეცდომაში შეიყვანა 2012 წლის მარტში და უკვე აპრილში სასამართლომ მათი სიიდან ამორიცხვის გადაწყვეტილება მიიღო. ამის შემდეგ მამუკა კოჭლამაზაშვილმა საქართველოს პროკურატურას მიმართა და მოითხოვა, გამოძიების დაწყება იმ ადამიანების მიმართ, რომელთაც აწამეს და იძულებით მოაწერინეს ხელი საჩივრის ამორიცხვაზე. ამასთან, მანვე ევროპულ სასამართლოს წერილი გაუგზავნა, თუ რატომ არ იყო გათვალისწინებული მისი ადვოკატის პოზიცია, რომელიც მასთან შეთანხმებით გაიგზავნა და რომ ადვოკატის განცხადება მათი სიცოცხლის გადარჩენას ემსახურებოდა და რატომ გაითვალისწინეს მთავრობის პოზიცია და მათი საქმის ამორიცხვით მას ზიანია მიადგა. ევროპის სასამრთლოს გადაწყვეტილების შემდეგ საქართველოს ადვოკატთა ასოციაციის აღმასრულებელმა საბჭომ საჩივრით მიმართა ეთიკის კომისიას, რომელმაც ჩემ მიმართ 2 გადაწყვეტილება გამოიტანა – დისციპლინარული სახდელის დაკისრების თაობაზე. მხოლოდ ზაზა ხატიაშვილი, ქეთი ბექაური და ცისმარ ონიანი არ უჭერდა მხარს ჩემს დისციპლინარულ დევნას. ეს გადაწყვეტილებები არც მე და არც საჩივრის ავტორს ჩაბარებული არ გვქონდა. ეს იყო კონფიდენციალური, ვიდრე კანონიერ ძალაში არ შევიდოდა და გამოქვეყნდებოდა. იუსტიციის მინისტრის მოადგილემ გოჩა ლორთქიფანიძემ თეა წულუკიანის მეშვეობით ეს ყველაფერი გაყალბების შედეგად მოიპოვა და ევროპულ სასამართლოს გადაუგზავნა ჩემი დისკრედიტაციის მიზნით და მოითხოვეს გიორგი მაზანაშვილის საქმის განხილვის სიიდან ამორიცხვა. მე ეს პროცესი მოვუგე საქართველოს ადვოკატთა ასოციაციას საქართველოს უზენაეს სასამართლოში და გაუქმდა ორივე გადაწყვეტილება. ეს გადაწყვეტილება ევროპულ სასამართლოს გადავუგზავნე. ევროპული სასამართლო მიხვდა რა, რომ მე ვიყავი მართალი ყვარელაშვილთან და კოჭლამაზაშვილთან მიმართებაში.
ამიტომ სასამართლოს სხვა გზა არ რჩებოდა, გარდა იმისა, რომ განეხორციელებინა შურისმაძიებლური მოქმედებები, რაც საქართველოს მთავრობის ინტერესებშიც შედის. რადგან ორივე მხარე ჩემ დისკრედიტაციას ეწევა და არ სურთ, რომ მე აქტიურად ვიბრძოლო ჩემი დაცვის ქვეშ მყოფი მრავალი პირის დაცვის მიზნით. ეს ადამიანები ფაქტობრივად, გაწირეს, რადგან ევროპულ სასამართლოს საქმეებზე ყველა ადვოკატი არ მუშაობს, რადგან ეს სპეციფიკური საქმეა, რომელსაც სხვანაირი მიდგომები სჭირდება. სტრასბურგის სასამართლოში მე მაქვს ყველაზე მეტი საქმე გაგზავნილი. აქამდე მსგავსი პრეცენდენტიც არ ყოფილა, რომ ქართველი ადვოკატისთვის ევროსასამართლოს საქმისწარმოებაში მონაწილეობა აეკრძალოს. პირველი მე ვარ, ამიტომ მომიშორეს, რაშიც ხელისუფლების და ევცროსასამართლოს ინტერესებსაც ვხედავ. თუმცა გამორიცხულია, ევროსასამართლოს ამ გადაწყვეტილებით რაიმე შეზღუდვები დამიწესდეს საქართველოში. აქ მე ვერავინ ვერაფერს ამიკრძალავს, ამის საფუძველი არ არსებობს. სტრასბურგის სასამართლოს მოტივირებული გადაწყვეტილება არ მიუღია“, _ ცხადებს ნოზაძე.
მისივე თქმით, თავისი უფლებების დასაცავად საერთაშორისო ორგანიზაციებისთვის მიმართვას და ბრძოლას აპირებს.
“დღესვე მივმართავ ადვოკატთა ასოციაციის თავმჯდომარეს, რომლისგანაც ჩემი უფლებების დაცვას მოვითხოვ. ეს მე ზიანს ვერ მომაყენებს, რადგან პროფესიას ვერ წამართმევენ, არამედ ჩემი დაცვის ქვეშ მყოფებს ადგება ზიანი. ადვოკატთა ასოციაციის თავმჯდომარე ბუნებრივია, საერთაშორისო ორგანიზაციებს – ევროპის ადვოკატთა ასოციაციას, მსოფლიოს ადვოკატთა ასოციაციას მიმართავს ჩემი უფლებების დაცვის მიზნით. ამასთანავე, მე დამოუკიდებლად სხვა ღონისძიებებს განვახორციელებ, ეს იქნება ადგილობრივი თუ საერთაშორისო პრესა, ასევე სხვა ორგანიზაციები, რომ დაცული იყო ჩემი უფლებები”, _ აცხადებს ნოზაძე.
საია-ს იურისტი თამუნა აბაზაძე “გურია ნიუსთან” საუბრისას ამბობს, რომ მამუკა ნოზაძის წინააღმდეგ გამოტანილი გადაწყვეტილება პირველია და მსგავსი პრეცენდენტი აქამდე არ ყოფილა.
“მსგავსი გადაწყვეტილება სტრასბურგის სასამართლოს აქამდე ქართველი ადვოკატის მიმართ არ გამოუტანია. თუმცა, მახსენდება რამდენიმე თვის წინ ერთი შემთხვევა, როდესაც ქართველი იურისტების მიმართ სტრასბურგის სასამართლომ საყვედურის წერილი გამოაგზავნა. წერილში დეტალურად რა ეწერა არ ვიცი, თუმცა, ერთ-ერთი ადვოკატი, რომლის მიმართაც სტრასბურგს შენიშვნები ჰქონდა ლია მუხაშავრია იყო. სტრასბურგის სასამართლოს წერილში აღნიშნული იყო, რომ ადვოკატებმა მათ დროულად არ მიაწოდეს ინფორმაცია, მაშინ, როდესაც სტრასბურგის სასამართლო დამატებით ინფორმაციას ითხოვდა. გამოვიდა ისე, რომ ადვოკატებმა სტრასბურგის წერილი “დააიგნორეს”. თუ არ ვცდები, იყო კიდევ ერთი თემა, სადაც სტრასბურგის სასამართლო აღნიშნავდა, რომპრობლემატური საკითხი, რაზეც მომჩივანი მხარე დავობდა უკვე ამოწურული და გამოსწორებული იყო ეროვნულ დონეზე, თუმცა ამ მდგომარეობის გამოსწორების შესახებ სასამართლოსთვის ადვოკატებს ინფორმაცია არ მიუწოდებიათ. სწორედ ამიტომ აღნიშნავდა სასამართლო, რომ არაკეთილსინდისიერი დამოკიდებულება ჰქონდათ ადვოკატებს სასამართლოს მიმართ. შესაძლოა, სტრასბურგის სასამართლოს მამუკა ნოზაძისთვის მანამდეც ჰქონდეს გაფრთხილების წერილი გამოგზავნილი. მე არა მაქვს წაკითხული კონკრეტულად რა წერია განჩინებაში, თუმცა ეს ეროვნულ დონეზე ადვოკატისთვის რაიმე აკრძალვის დაწესებას არ გამოიწვევს. სტრასბურგმა თავის ფარგლებში თქვა რომ მამუკა ნოზაძე მას ვეღარ მიმართავს, რასაც თავისი საფუძვლები ექნება და ჩვენ არ ვიცით, რადგან ეს ინფორმაცია დახურულია. ადვოკატსა და სასამართლოს შორის მიმოწერაზე ჩვენ ხელი არ მიგვიწვდება”, _ აღნიშნავს აბაზაძე.
მისივე თქმით, სტრასბურგის სასამართლოს გადაწყვეტილება საბოლოოა და შესაძლოა, მამუკა ნოზაძემ მისი გასაჩივრება ვერ მოახერხოს.
“წერილი ბატონმა მამუკამ უშუალოდ სასამართლოსგან მიიღო და ეს განჩინება საბოლოოა. ვის უნდა მიმართოს ზემდგომს?!- ასეთი რამე არ არსებობს. ადვოკატს მხოლოდ ის შეუძლია, თუ სასამართლო კონკრეტულ დეტალებზე ედავება, განჩინების გამომტან ორგანოს მიწეროს და გაუბათილოს განჩინებაში მოხსენებული გარემოებები”, _ აცხადებს აბაზაძე.
