სწორედ იმ დროს, როცა შეხვედრა მიმდინარეობდა, სცენაზე აიჭრა პოლიციელის დაჭრაში ბრალდებული კონსტანტინე გულორდავას დეიდა და იქ მყოფ მთავრობის წარმომადგენლებს შეხვედრის დატოვება და გარეთ შეკრებილ ადამიანებთან მისვლა მოსთხოვა.
“დამთავრებას ვერ დაველოდებით, გარეთ ხალხია შეკრებილი, რომლებიც თავისი ოჯახის ღირსების დაცვისთვის დაკავებული კონსტანტინე გულორდავას გათავისუფლებას ითხოვენ, აქ ახალგაზრდა, სამი თვის დაქორწინებული ცოლ–ქმრის საქმე წყდება და თათბირი გიჭირთ თქვენ? გამოდით გარეთ და აქციის მონაწილეებთან მიდით, ჩავშლით ამ სხდომას, გაათავისუფლეთ უდანაშაულო კახა გულორდავა,” _ მოითხოვდა გულორდავას დეიდა.
ქალი დარბაზიდან გაიყვანეს, აქციის მონაწილეებთან კი გულორდავას ადვოკატი მივიდა და სთხოვა თავი შეეკავებინათ ხმაურისა და ყვირილისაგან.
დავით ნარმანია აქციის მონაწილეებთან გავიდა და დაკავებულის სიდედრს, რუსუდან ლომიას გაესაუბრა.
“ძალიან მძიმე იყო, რაც მოხდა, თუმცა კანონი კანონია, სამართლიანობა სამართლიანობაა და იცის ყველამ, რომ ჩვენი ხელისუფლება სამართლიანობის პრინციპების დაცვით მუშაობს, ყველაფერს აკეთებს, რომ სამართლიანობა აღდგეს. აქედან გამომდინარე საგამოძიებო ორგანოებს თავისი საპროცესო წესები და ნორმები აქვთ, რაც აუცილებლად უნდა იქნეს დაცული. სამართალდამცავი ორგანოები გამოიძიებენ ყველაფერს, გამოკვლევას დრო სჭირდება და შემდეგ მიიღებენ გადაწყვეტილებას.”
ნარმანიამ აუხსნა გულორდავას ნათესავებს, რომ არც მას და არც სხვა მაღალჩინოსანს არ აქვს უფლება უკარნახოს სამართალდამცავებს და ძალა დაატანოს რაიმე გადაწყვეტილების მისაღებად.
რუსუდან ლომაიამ აღნიშნა, რომ დიდი იმედი აქვს ახალი პრეზიდენტის და ახალი პრემიერის, ამიტომ სთხოვა ინფრასტრუქტურის მინისტრს შუამდგომლობა მარგველაშვილთან და შსს მინისტრთან, რაზეც დადებითი პასუხი მიიღო.
“მე მხოლოდ სამართლიანობას მოვითხოვ. გოგა ანჩაბაძემ პოლიციელის ყველა ღირსება შებღალა, ეს იყო ფორმას ამოფარებული მანიაკი, მის უღირს საქციელს ახალგაზრდა ოჯახი ეწირება. ძალიან გთხოვთ დაგვეხმარეთ სამართლის აღდგენაში, რომ მომავალ თაობებს სიმართლის რწმენა მივცეთ,” _ მიმართა რუსუდან ლომაიამ მინისტრს.
ლომაიამ აქვე აღნიშნა, რომ მის შვილს ნერვიული აშლილობა აღენიშნა, რამაც ახალგაზრდა ქალის ჯანმრთელობას საფრთხე შეუქმნა. საფრთხე დაემუქრა ასევე ბავშვს, რომელსაც მუცლით ატარებს.
დაკავებულის ახლობლები და ნათესავები მიმართავენ შინაგან საქმეთა მინისტრ ირაკლი ღარიბაშვილს, ახლადარჩეულ პრეზიდენტს გიორგი მარგველაშვილს და საპატრიარქოს, რომ დროულად და ობიექტურად იყოს გამოძიებული კონსტანტინე გულორდავას საქმე, მის გათავისუფლებამდე კი საპროტესტო აქციების შეწყვეტას არ აპირებენ.
კონსტანტინე გულორდავას ბრალი ედება 118-ე მუხლით გათვალისწინებული დანაშაულისთვის, რაც სხეულის განზრახ დაზიანებას გულისხმობს.
რაც შეეხება საპატრულო პოლიციის თანამშრომელს, გოგა ანჩაბაძეს, მის წინააღმდეგ სისხლის სამართლის საქმე გაუპატიურების მცდელობის მუხლით არის აღძრული. წარდგენილ ბრალდებას საქართველოს სისხლის სამართლის კოდექსის 137-ე მუხლი ითვალისწინებს.
თვითმხილველი ხათუნა ხარჩილავა ამბობს, რომ მეგობრის, კონსტანტინე გულორდავას ცოლის გაუპატიურება პოლიციელმა გოგა ანჩაბაძემ ორი დღის წინ, ღამის საათებში სცადა მათი საცხოვრებლის სიახლოვეს.
“შემომესმა ყვრილი. საშინელი ხმაური იყო. გარეთ რომ გავედით, ვიღაც გოგო კიოდა, მაუპატიურებსო. როგორც შემდეგ გავარკვიეთ, ეს პოლიციელი მისი მეჯვარე ყოფილა და მოტყუებით მიიყვანა ამ ადგილას,” _ განმარტავს ხათუნა ხარჩილავა.
პოლიციელის მდგომარეობა ამ ეტაპზე მძიმეა, მაგრამ სტაბილური. პოლიციელი სხეულზე ბასრი საგნით მიყენებული მრვალობით ჭრილობებით რეანიმაციულ განყოფილებაში რჩება. გოგა ანჩაბაძეს მოტეხილი აქვს ორივე ქვედა კიდური და მოჭრილი აქვს ერთი ყური.
