ბაღის თანამშრომლები იმასაც ამბობენ, რომ წინა კვირას დაწესებულებაში მონიტორინგის ჯგუფი შევიდა და ეს შემოწმება სწორედ ლალი ნოზაძის მოსახსნელად იყო ჩატარებული. თავად გათავისუფლებული დირექტორი აღნიშნავს, რომ ასეთ შემოსვლას შემოსვლა არ ჰქვია, ეს უფრო შემოვარდნის და დატერორების ტოლფასი იყო.
ლალი ნოზაძე:
“22 ოქტომბერს სააგენტოდან შემოვიდა მონიტორინგის ჯგუფი, თუმცა მინდა ვთქვა, რომ ეს შემოსვლა არ იყო, უფრო შემოვარდნას ჰგავდა. ჩემი კაბინეტი საარჩევნო უბანს ეკავა და ასევე ვუთხარი მათაც. რაზეც საკმაოდ უხეშად მიპასუხეს, ჩვენ არც გვჭირდება შენი კაბინეტი, სამზარეულოში შეგვიყვანეო. ასეც მოვიქეცი. ეს ხდება დღის საათებში, ზუსტად 12 საათი და 30 წუთი იყო. ამ დროს სამზარეულოში თევზს ამზადებდნენ, ერთი პარტია იწვებოდა, მეორე ირეცხებოდა და მესამე პარტია ყუთით იქვე იდო, რადგან გასარეცხად იყო გამზადებული. დასკვნაში კი ჩაწერეს, რომ თითქოს ეს 10 კილო თევზი მოსაპარად იყო გამზადებული და მხოლოდ მონიტორინგის ჯგუფის შემოსვლის შემდეგ გამოჩნდა.
თვითონ სიტყვა “მოსაპარად” არის საშინელი და შეურაცმყიფელი ჩემთვის, ჩვენს ბაღში ყველა კეთილსინდისიერად მუშაობს და მაქსიმალურად ვიხარჯებით ბავშვებთან. ბაღი რომ მოწმდება, იწერება აქტი, რომელზეც ხელი უნდა მოაწერინონ თანამშრომლებს, აქ კი არაფერზე მოგვიწერია ხელი.
მერე სულამანიძემ დამიბარა სამსახურში და გამაცნო უკვე იქ დაწერილი აქტი, რომელსაც არ დავეთანხმე და ვუთხარი კიდეც, ხელს არ მოგიწერთქო. არც ეგ არის პრობლემაო, ხელმოუწერავადაც გათავისუფლებული ხარ სამსახურიდანო. 35 წლის განმავლობაში შენიშვნაც კი არ მქონია და თუ რაღაც შენიშვნა დაწერეს, პირველ ჯერზე გაფრთხილება უნდა ყოფილიყო, მერე სასტიკი საყვედური, უკანასკნელი გაფრთხილება, ასე უცბად მოხსნა ნამდვილად არ გამიგონია.
მე მეგონა დამთავრდა ასეთი ქმედებები, მახსოვს 5 წლის წინ ძალიან კარგი დირექტორები გაათავისუფლეს და თავიანთი კოორდინატორები დანიშნეს, რადგან ბაღი დიდი ძალაა. ახლაც უნდოდათ ასე, მაგრამ ჩვენთან ვერ ნახეს დასაყდრენი, მოიგონეს მოადგილის სტატუსი, რომელსაც არანაირი ფუნქცია არ აქვს და ხელფასი დაენიშნა 600 ლარი, მაშინ როცა პედაოგს 300 ლარი აქვს. სად არის კორუფცია, იქ, რომ მშობლებმა კაბინეტებში თავიანთი შვილებისთვის მწვანე კუთხე მოაწყვეს, თუ აი, აქ, ხელფასის ოდენობაში, ან სადღაც გამქრალ პრემიებში. მე არც აქციაზე ვყოფილვარ და არც სამსახურში გავსულვარ, მაგრამ უსამართლობასთან შეგუება ძალიან ძნელია და ვითხოვ სამართლიანობას”.
მსოფლიო ჩემპიონი რამაზ ნოზაძე აცხადებს, რომ მას აქვს იმდენი საშუალება, დედას არაფერი გაუჭირვოს და დირექტორის მცირე ხელფასის აღარ ქონა, არც კი დაატყოს, მაგრამ ის არ აპირებს უსამართლობასთან შეგუებას, არ დათმობს ბინძური ხრიკებით ადამიანის უფლებების შელახვას და სამართლიანობის აღდგენას მოითხოვს. რამაზ ნოზაძე იზიარებს დედის კოლეგების მოსაზრებას, რომ დირექტორი შვილისა და ქალაქის მერის პირად დაპირისპირებას შეეწირა და ამბობს, რომ უგულავა მართლაც ცდილობდა მის დისკრიმინაციას, მაგრამ თავად მას რომ ვერაფერი დააკლო, მიადგა ყველაზე წმინდას – დედას.
რამაზ ნოზაძე:
“გახსოვთ ალბათ, თბილისში “დიფარფლის” კონცერტი იყო, ეს ის პერიოდია ავღანეთში ბიჭები რომ დაიღუპნენ. კონცერტზე მე და ჩემი მეუღე ვიყავით. მოვიდნენ გიგი უგულავა მეუღლესთან ერთად და სააკაშვილი. მე ამან აღმაშფოთა, მივედი მათთან და ვუთხარი, საქართველო თავზე გემხობათ და აქ ტაშის დასაკრავად რომ დგეხართ, წადით და საქმეს მიხედეთ-მეთქი.
ამის მერე გამოვტრიალდი და დავტოვე სტადიონის ტერიტორია. ამის მერე დაიწყო ჩემი დისკრიმინაცია, მაგრამ რომ ვერაფერი გამომინახეს, მიადგნენ ჩემთვის ყველაზე წმინდა ადამიანს – დედაჩემს. მისი ბინძური ხრიკებით გათავისუფლებით დამანახეს ვითომ თავიანთი ძალა და პატივმოყვარეობა დაიკმაყოფილა უგულავამ. მხოლოდ მას თუ შეეძლო ასეთი ხერხებისთვის მიემართა, ასეც ჩვევიათ ნაციონალებს, მაგრამ ვერ ხვდებიან, რომ დაუძველდათ მეთოდები.
მინდა მთელმა საქართველომ გაიგოს, როგორ მოქმედებენ ესენი. ველაპარაკე სააგენტოს უფროსს რამაზ სულამანიძეს, ჩემმა მეგობრებმა ქაცარავას დაურეკეს და პასუხი იყო – ჩვენ ხელებს ვწევთ, ეს გიგი უგულავას პირდაპირი მოთხოვნააო, გვირეკავს და გვეუბნება, რამაზ ნოზაძის დედა უნდა გაათავისუფლოთ სამსახურიდანო.
აქ პირდაპირი დაკავშირებაა ჩემზე, დედაჩემი არაფერ შუაშია. მოვიდეს უგულავა ჩემთან და მე გავცემ ყველაფერზე პასუხს.”
ბაგა–ბაღის თანამშრომლები ადასტურებენ, რომ ლალი ნოზაძე დღევანდელ აქციაზე არ გამოჩენილა, ის სახლში იყო და მერე შეიტყო აქციის შესახებ. სკოლამდელი დაწესებულების წარმომადგენლები ამბობენ, რომ ბაღი არ დაიწყებს ფუნქციონირებას მანამ, სანამ არ აღსდგება სამართლიანობა.
“ყველაფერი მიზანმიმართულად გაკეთდა, მონიტორინგის ჯგუფმაც აღიარა ეს, როცა გვეუბნებოდნენ, ჩვენ შემოვედით თქვენი დირექტორისთვის და არა თქვენთვის. 35 წლის განმავლობასი ერთი საყვედურიც არ მიუღია, ჩვენი ბაღი მოწინავეთა რიგებში იდგა და ახლა გახდა კორუმპირებული? ყველას ხომ არ დაგვხსნიან, სანამ არ აღსდგება სამართლიანობა, ბაღი ფუნქციონირებას წყვეტს.
მშობლებიც ჩვენს გვერდით დგანან, ბებიები და ბაბუებუც კი იყვნენ დღეს აქციაზე. ჩვენ არ გამოვსულვართ ქუჩაში, როცა საქმე ეხებოდა მატერიალურს, აქ უკვე საქმე სულიერებას ეხება და მოვითხოვთ სამართლიანობის აღდგნას, რადგან ჩვენი დირექტორი უგულავას პირად ამბიციებს შეეწირა,” _ აცხადებენ ბაღის თანამშრომლები.
“გურია ნიუსი” შეეცადა მამუკა ქაცარავასა და რამაზ სულამანიძესთან დაკავშირებას, მაგრამ უშედეგოდ.
