ჩოხატაურის ხელისუფლება ამ კანონს დიდი ხანია არღვევს _ ამ ეტაპისთვის ადგილობრივი ბიუჯეტის თითქმის 40% სწორედ წლების განმავლობაში ხელფასებზე იხარჯება.
ოფიციალური ინფორმაციით, ჩოხატაურის მუნიციპალიტეტში საბიუჯეტო სამსახურში სულ 598 ადამიანია დასაქმებული. აქედან აღმასრულებელ ორგანოში _ 163 პირი, სამხედრო აღრიცხვისა და სახანძრო-სამაშველო სამსახურებში _ 51 პირი, ხოლო ააიპ-ებში _ 384 პირი. უფრო კონკრეტულად კი ააიპ “მომავალს” (სკოლამდელი სააღმზრდელო დაწესებულებები), რომლის აღსაზრდელთა რაოდენობა 470 შეადგენს, 128 თანამშრომელი ჰყავს. სპორტსკოლას, რომლის აღსაზრდელი 250 მოზარდია _ 23 თანამშრომელი; მუსიკალურ სკოლას, სადაც 150 მოსწავლე სწავლობს _ 26; სამხატვრო სკოლაში, რომელსაც 85 მოსწავლე ჰყავს _ 16 შტატია; ამდენივე თანამშრომელი ჰყავს მოსწავლე-ახალგაზრდობის სახლს, რომელშიც 90 მოსწავლე სწავლობს.
მუზეუმებში 21 ადამიანია დასაქმებული; სპორტის განვითარების ცენტრში _ 14; ბიბლიოთეკებში _ 21; კომუნალურ სამსახურში _ 42; საფეხბურთო კლუბში _ 4; კულტურის ცენტრში _ 65; ჯანდაცვის ცენტრში _ 13.
“გაბერილი” შტატების შესახებ საჯარო მოხელეები ოფიციალურ კომენტარს არ იძლევიან, თუმცა, პირად საუბრებში ამბობენ, რომ შტატების შემცირება აუცილებელია. ამბობენ იმასაც, რომ ააიპ-ებში დასაქმებულთა უმეტესობა ფორმალურადაა გაფორმებული: _ ვეთანხმები თქვენს შენიშვნას, რომ ბევრი შტატი ხელოვნურია და მასზე გაფორმებული მოხელეები არანაირ სამუშაოს არ ასრულებენ. მაგალითად, საზოგადოებასთან ურთიერთობის სპეციალისტები თითქმის ყველა ააიპ-ს ჰყავს და არავინ არაფერს არ აკეთებს _ მედიაში მაგათი მოწოდებული ინფორმაცია არავის უნახავს. ასეთი შტატები ბევრია და მათი ჩამოთვლა შორს წაგვიყვანს, _ ამბობს ჩვენთან საუბრისას ერთ-ერთი ჩინოვნიკი, რომელსაც ვინაობის გახმაურება იმ მოტივით არ სურს, რომ კოლეგები არ გაანაწყენოს.
აღსანიშნავია ისიც, რომ წლის დასაწყისში, საკრებულოს სხდომაზე გამგეობის საფინანსო სამსახურის უფროსმა, ზურაბ ჩანტლაძემ “გურია ნიუსის’ შეკითხვაზე, მოხდა თუ არა 2012 წელს, წინასაარჩევნო პერიოდში, შტატების ხელოვნურად დამატება, დადებითი პასუხი გასცა.
თუმცა, ამ თემას სხვა გაგრძელება არ მოჰყოლია. პირიქით, მოხდა შტატების დამატება. იყო თუ არა ამის მიზეზი საპრეზიდენტო არჩევნები, ამ კითხვაზე პასუხს არც ერთი საჯარო მოხელე არ სცემს, მაგრამ ამბობენ, რომ მომავალ წელს შემცირებები აუცილებლად მოხდება. პირველ რიგში კი, ეს სწორედ ააიპ-ებს შეეხება. შემცირებებს გეგმავენ სოფლებში, სადაც რწმუნებულებს 2-3 თანაშემწეები ჰყავთ.
ბიუჯეტის პროექტი ჯერ არ გასაჯაროებულა, თუმცა, როგორც გავიგეთ, დაანონსებული ხელფასების ზრდა მხოლოდ ერთ ააიპ-ს შეეხება _ სკოლამდელი აღზრდის დაწესებულებაში მომუშავე პირებს ხელფასები აუცილებლად გაეზრდებათ. დანარჩენ ააიპ-ებში იგივე ხელფასები დარჩება. ჩვენს კითხვაზე, პრივილეგია მომავალ წელსაც შეეხება თუ არა სპორტის სფეროს მესვეურებს _ გოჩა ჯიქიას, ზურაბ ჭინჭარაძეს და მის მოადგილეს, გამგებლის სიმამრს რომან მამალაძეს, რომლებსაც მიმდინარე წელს ხელფასები ყოველგვარი დასაბუთების გარეშე გაუზარდეს, გვპასუხობენ, რომ _ არა.
_ ყველა ააიპ-ის ხელმძღვანელის ხელფასი გათანაბრდება და ისევ ხუთასი ლარი იქნება. ეს შეეხება სპორტსკოლის ხელმძღვანელსაც, სპორტის განვითარების ცენტრის ხელმძღვანელსაც და მის მოადგილესაც, _ განმარტავენ საფინანსო სამსახურში.
აღსანიშნავია, რომ ბიუჯეტის პროექტის თანახმად, ხელფასები მოემატებათ გამგეობის თანამშრომლებს _ სამსახურის უფროსები და საკრებულოს კომისიების თავმჯდომარეების თვიური ანაზღაურება 1000 ლარამდე გაიზრდება.
