მე ვფიქრობ, რომ რაღაც იმალება კიდევ და მას ჩემთვის ბოლომდე არ უთქვამს. ალბათ, მისი სისუსტე. თუ რაიმე დამალულია, გამოძიება დაადგენს თუ ისე წარიმართება, როგორც საჭიროა. დაველოდები გამოძიებას, ექსპერტიზის დასკვნას და მერე დავამტკიცებ სიმართლეს. შემდეგ ყველა დაინახავს სიმართლეს, რა და როგორ მოხდა. ილია მეორესთან უნდა მივიდე და შევევედრო მისი სულისთვის. საწოლზე დღესაც ლოცვის წიგნი უდევს, მიკვირს, ეს როგორ გააკეთა,” _ ამბობს “გურია ნიუსთან” საუბარში ოზურგეთის მუნიციპალიტეტის სოფელ მაკვანეთში მცხოვრები, 24 წლის ნანა არობელიძის მეუღლე. ქალბატონმა ნანამ, რამდენიმე დღის წინ, სიცოცხლე თვითმკვლელობით დაასრულა. მეუღლემ, იგი სახლთან ახლოს, დიდი ცაცხვის ხეზე ნახა თოკით ჩამომხრჩვალი.
2013 წლის 5 ნოემბერი, ოზურგეთის მუნიციპალიტეტის სოფელ მაკვანეთში მცხოვრებთათვის, ძალიან მძიმე დღე აღმოჩნდა. სოფელმა 24 წლის ნანა არობელიძის თვითმკვლელობის შესახებ გაიგო. იგი წარმოშობით ახმეტიდან, სოფელ ალვანიდან იყო. მაკვანეთელები თვითმკვლელობის მიზეზის სავარაუდო ვერსიაზეც ალაპარაკდნენ.
გარდაცვლილ ქალბატონს მეუღლე, გია არობელიძე და ერთი მცირეწლოვანი შვილი დარჩა. სოფლის მცხოვრებლები ამბობენ, რომ ამ ოჯახის, მათი ცოლქმრობის შესახებ მხოლოდ დადებითის თქმა შეუძლიათ, ნანას სამაგალითო პიროვნებად ასახელებენ, გაკვირვებული და შეძრწუნებული არიან ამ ტრაგედიით.
აღნიშნულ საქმეზე შსს ოზურგეთის რაიონული სამმართველო მუშაობს და საქმეს გამომძიებელი ბესიკ მგელაძე იძიებს.
ოზურგეთის რაიონულ პროკურატურაში აცხადებენ, რომ ექსპერტიზის დასკვნას ელოდებიან და ამის შემდეგ გამოძიება იმუშავებს თვითმკვლელობის ან თვითმკვლელობამდე მიყვანის ვერსიებზე.
შოთა ჩხაიძე, ოზურგეთის რაიონული პროკურატურის პროკურორი: _ 2013 წლის 5 ნოემბერს, ოზურგეთის მუნიციპალიტეტის სოფელ მაკვანეთში მცხოვრებმა 24 წლის ნანა არობელიძემ, საცხოვრებელი სახლის გვერდით, ცაცხვის ხეზე, თოკის გამოყენებით ჩამოიხრჩო თავი. იმავე დღეს აღნიშნულ ფაქტზე დაიწყო გამოძიება ს.ს.კ. 115-ე მუხლით. ცხედარს იმავე დღეს ჩაუტარდა სასამართლო სამედიცინო ექსპერტიზა და მიმდინარეობს გამოძიება. ჯერჯერობით, რაიმე ვერსია ჩვენთვის ცნობილი არაა. დაიკითხებიან მეუღლე, ახლობლები, ოჯახის სხვა წევრები და ამის შემდეგ იქნება მიღებული გადაწყვეტილება.
გია არობელიძე, ნანა არობელიძის მეუღლე თვითმკვლელობამდე რამდენიმე საათით ადრე განვითარებული მოვლენების შესახებ “გურია ნიუსთან” ჰყვება: _ ახლა მე რასაც თქვენ გეტყვით, ეს პოლიციაშიც დავწერე ჩვენების სახით. ძალიან მაინტერესებს, რა მოხდა, რის გამო მოიკლა თავი. შვიდი წელია ერთად ვცხოვრობთ და მე ნანასთვის ცუდი რამ არ შემიმჩნევია. ასე რომ ყოფილიყო, წლების განმავლობაში სამუშაოდ არსად წავიდოდი. თურქეთშიც დავდიოდი. ამ ბოლოს თბილისშიც ვიყავი სამუშაოდ. ისეთი ცოლქმრობა გვქონდა მე და ნანას, რომ თითით საჩვენებელი ვიყავით. ამის შესახებ თქვენც გეტყვიან სოფელში. ათასი გაჭირვება გადაგვიტანია, მაგრამ მეც ამიტომ ვმუშაობდი, რომ ნანასთვის ეს პრობლემები შემემსუბუქებინა. ამ ბოლოს მძიმე ოპერაცია ჰქონდა გადატანილი და მაგის გამო თავს ვევლებოდი, რომ რაიმე არ წყენოდა. ვერაფერს ვატყობდი, რომ ნანას ფსიქოლოგიურად რაიმე პრობლემა ჰქონოდა. დაგვყავდა კონსულტაციებზე ექიმთან. ამ ბოლოს მთხოვა, მართვის მოწმობის აღება მინდა და ვივლიო. კი -მეთქი, დავეთანხმე, ხელი არ შემიშლია. ახალი წლისთვის მანქანის ყიდვას ვფიქრობდი და ძალიან უხაროდა. ამის გამოც წავედი თბილისში სამუშაოდ, რომ ეს თანხა გადამეხადა მისთვის. ბავშვის ცეკვის ფულიც მჭირდებოდა. მე წავედი 23 ოქტომბერს თბილისში და იქ დამირეკა, ჩამოდიო.
_ რატომ გთხოვათ ჩამოსვლა, არაფერი უთქვამს მანამდე?
_ არა, ნამდვილად არაფერი და არც შემიმჩნევია რაიმე. ხშირად მისი ტელეფონი მე მქონდა, როცა ოზურგეთში ვიყავი. დამირეკა ოქტომბრის ბოლოს და მითხრა, რომ დამდევს თეთრი ფერის ავტომანქანა, მირეკავს ძალიან ხშირადო.
ჩამოვედი 4 ნოემბერს, ღამის 4 საათზე და ვილაპარაკეთ ჩვეულებრივად. ნანამ მითხრა, რომ მანქანის პატრონი პოლიციელი იყო (გია ავტომანქანის მარკას და ნომერსაც იხსენებს, თუმცა, უდანაშაულობის პრეზუმპციიდან გამომდინარე, მარკას და ნომერს არ ვასახელებთ). დამდევს ხშირად, მირეკავს, კაფეშიც დამპატიჟაო… ვკითხე ნანას, ეს შენი ნომერი საიდან ჰქონდა-მეთქი. არ ვიციო, მითხრა. წასულა ნანა შეხვედრაზე რესტორან “ფიროსმანში”. რესტორანში წასვლის მიზეზი რომ ვკითხე, მიპასუხა: ვიფიქრე, სიურპრიზს შენ მიკეთებდიო და აქეთ-იქეთ ვიხედებოდი, შეიძლება მოვიდესო. შეკითხვაზე,რა გელაპარაკა,-მეთქი, ასე მითხრა, შენი გაცნობა და დაახლოება მინდაო. ცეკვაზე რომ მივიყვანე ბავშვი, ზუსტად იმ დროს დამირეკაო, დრო მქონდა საათნახევარიო… ანუ იცოდა იმ პოლიციელმა, რა დროს იყო ნანა თავისუფალი. ნანას თქმით, სოფელ მაკვანეთის ცენტრში ხვდებოდა მანქანით გაჩერებული, მერე მიყვებოდა თურმე ქალაქში. იქ დამხვდა, აფთიაქში შევედი და შემომყვაო, ასევე ერთ-ერთ სუპერმარკეტშიცო. მერე, როცა ერთმანეთს შეხვედრიან, ნანას უთქვამს, დამანებე თავი, მე ქმარი და შვილი მყავსო. სად ცხოვრობო, უკითხავს. ნანას უთქვამს ოზურგეთშიო და იმ დღეს მაკვანეთის ცენტრში ამოსულ ნანას, იქ დახვდა, თურმე, მანქანით. ამ ყველაფერს ნანა წინა ღამით მიყვებოდა. მე წავალ და ვნახავ მაგ ბიჭს,-მეთქი; არაო, ხვალ ერთად წავიდეთ და ერთად გავარკვიოთ, რა უნდა მაგ ბიჭს ჩემთანო.
ერთ დღეს ძალიან ბევრი კომპოტები გაუკეთებია, საღამოს როცა ბავშვის გამოსაყვანად გასულა ბაღში, იქ დახვედრია მანქანით; ანუ იცოდა, რომ ნანა ბავშვს ბაღში აუცილებლად მიაკითხავდა. ეს ყველაფერი მომიყვა, ვისაუბრეთ, გვქონდა ხმამაღალი საუბარიც.
_ გია, ამბობენ, რომ თქვენ მეუღლეს ფიზიკური შეურაცხყოფა მიაყენეთ, ასე იყო?
_ არა, მე მისთვის ხელი არ დამირტყამს, თითიც კი არ დამიკარებია. უბრალოდ, ხმამაღალი საუბარი გვქონდა ნამდვილად და შევთანხმდით იმაზე, რომ მეორე დილით ამ ბიჭის სანახავად უნდა წავსულიყავით; პოლიციაში სატელეფონო საუბრები და მესიჯები უნდა ამოგვეღო. წავედით დასაძინებლად. დილით, როცა გამეღვიძა, გამთენიისას, ვნახე, ლოგინში არ იყო, არ გამკვირვებია იმიტომ, რომ ვიფიქრე, ადრე ადგა და ყავას მიხარშავს -მეთქი. ვნახე, რომ სახლში არსად იყო და მერე დავინახე მაღალი ცაცხვის ხეზე, წითელი “კურტკით” იყო ჩამოკიდებული. გავიქეცი დანით, ჩამოვხსენი, შევატყობინე ჩემს ბიძას, სახლში შემოვასვენეთ და მერე მოვიდა პოლიცია.
_ თქვენი აზრით, იყო თუ არა ეს ყოველივე თვითმკვლელობის მიზეზი?
_ რაც მან მომიყვა და გითხარით, ჩემი აზრით, მხოლოდ ეს არ უნდა ყოფილიყო ნანას თვითმკვლელობის მიზეზი. ვფიქრობ, რომ რაღაც იმალება კიდევ და მას ჩემთვის ბოლომდე არ უთქვამს ყველაფერი. მისი სისუსტე სწორედ ეს იყო. თუ რაიმე დამალულია, ალბათ გამოძიება დაადგენს ამას, თუ გამოძიება ისე წარიმართება როგორც საჭიროა. მაეჭვებს ერთი რამ, თვითონ რომ დამთანხმდა მესიჯების ამოღებაზე, მაშინ რატომღა გააკეთა ეს?! მაგას ვფიქრობ. რას ელოდებოდა? ალბათ, იფიქრა, ამ ყველაფერს გაიგებსო და იცოდა, რომ უკან არაფერზე დავიხევდი. მინდა, რომ სიმართლე დადგინდეს. მე ახლაც შემიძლია, გავუსწორდე იმ პოლიციელს, რომლის მანქანაც ვიცი. მაგრამ ათასი კაცია ოზურგეთში და ათასი აზრია, ასე არ მინდა ავყვე ვიღაცეებს. დაველოდები გამოძიებას, ექსპერტიზის დასკვნას და მერე დავამტკიცებ ჩემს სიმართლეს, _ ამბობს გარდაცვლილის მეუღლე.
ჩვენ დავუკავშირდით აღნიშნულ პიროვნებას, რომლის სავარაუდო ურთიერთობებზეც მოგვიყვა გარდაცვლილის მეუღლე. აღნიშნული პიროვნება ოზურგეთის რაიონული პოლიციის თანამშრომელია, რომლის ვინაობასაც, ისევ უდანაშაულობის პრეზუმპციიდან გამომდინარე, არ ვასახელებთ:
_ რა ურთიერთობა გაკავშირებდათ მაკვანეთში მცხოვრებ 24 წლის ნანა არობელიძესთან?
_ არ ვიცი, ვისზე მეუბნებით.
_ 24 წლის გოგონას თვითმკვლელობამდე მიყვანის ერთ-ერთ ვერსიად თქვენ მიერ შევიწროვება სახელდება; როგორც ოჯახის წევრები ამბობენ, მესიჯებს წერდით, ავტომანქანით დასდევდით.
_ საქმეზე ვარ, ძალიან გთხოვთ და ნუ მაწყვეტინებთ რა, ძალიან გთხოვთ, _ გვითხრა რესპონდენტმა და ტელეფონი გაგვითიშა.
ჩვენ დავუკავშირდით შსს გურიის სამხარეო მთავარი სამმართველოს უფროსს გოჩა ფერსაშვილს, რომელმაც აღნიშნულ საქმესთან დაკავშირებით კომენტარი არ გააკეთა.
_ ბატონო გოჩა, 24 წლის გოგონას თვითმკვლელობამდე მიყვანის ერთ-ერთ სავარაუდო ვერსიად თქვენი თანამშრომლის მიერ შევიწროვება სახელდება; ამის შესახებ რამე ინფორმაციას ფლობთ?
_ ვერ გავაკეთებ კომენტარს, _ გვითხრა ფერსაშვილმა.
