გთხოვთ გაუწიოთ დახმარება,” _ აღნიშნულია წერილში, რომელსაც საზოგადოებრივი მაუწყებლის გენერალური დირექტორის მოვალეობის შემსრულებელი თამაზ ტყემალაძე ჩოხატაურის მუნიციპალიტეტის გამგებლის მოვალეობის შემსრულებელს უგზავნის.
თამაზ ჯინჭარაძის განმარტებით, საზოგადოებრივი მაუწყებლიდან ჟურნალისტების ტრანსპორტირებსაც ითხოვდნენ:
_ დამირეკეს და მითხრეს, რომ უნდა გამეგზავნა მიკროავტობუსი თბილისში, ჩამომეყვანა ჟურნალისტები, აქაც ტრანსპორტი უნდა მომსახურებოდა, მერე კი უკან დამებრუნებინა. მათი მოთხოვნების შესასრულებლად, 3 000 ლარი მაინც იქნებოდა საჭირო. ერთადერთი რაც შევძელით, მათი სასტუმროში განთავსება და კვება იყო, _ გვითხრა ჯინჭარაძემ.
საზოგადოებრივი მაუწყებლის ჟურნალისტებისთვის დახმარების გაწევა ტყემალაძემ ლანჩხუთის მუნიციპალიტეტის საკრებულოს თავმჯდომარეს, ამირან გიგინეიშვილსაც სთხოვა ოდნავ განსხვავებული ტექსტით. დოკუმენტში, რომელიც საზოგადოებრივი მაუწყებლის სამეთვალყურეო საბჭოს წევრმა ნინო დანელიამ გაასაჯაროვა, ტყემალაძე გიგინეიშვილს სთხოვს, რომ გადაცემა “ლიხს იქით და ლიხს აქეთ” შემოქმედებითი ჯგუფის რაიონში ტრანსპორტირება და ადგილზე დახმარება უზრუნველყოს. ამავე წერილით, ტყემალაძე ინტერესდება, შეუძლია თუ არა ლანჩხუთის მუნიციპალიტეტის საკრებულოს, რომ გადამღებ ჯგუფს სათანადო საყოფაცხოვრებო და სამუშაო პირობები შეუქმნას.
აღნიშნული გადაცემა, რომლის პროექტის ავტორი თავად თამაზ ტყემალაძეა, საზოგადოებრივ მაუწყებელზე 15 ოქტომბრიდან გადის. ჩვენი წყაროებით დავადგინეთ, რომ გადაცემას სოლიდური ბიუჯეტიც აქვს. კითხვაზე, წერილებში მითითებულ სატელეფონო ნომერზე არავინ გვიპასუხა, რომ გაგვერკვია, რატომ ითხოვს ბიუჯეტიდან დაფინანსებული მაუწყებელი ჟურნალისტების დაფინანსებას ადგილობრივი ბიუჯეტიდან.
ტყემალაძის წერილის საფუძველზე, საზოგადოებრივი მაუწყებლის გადამღებ ჯგუფს ჩოხატაურის მუნიციპალიტეტის ბიუჯეტიდან “კვების ქირა” გადაუხადეს.
“მოგახსენებთ, რომ საზოგადოებრივი მაუწყებლის გენერალური დირექტორის მოვალეობის შემსრულებლის თამაზ ტყემალაძის #4248/0128 28.10.2013 წ. წერილის საფუძველზე (ტყემალაძის წერილს არც თარიღი აწერია და არც ნომერი. ავტ), 30 ოქტომბრიდან 3 ნოემბრის ჩათვლით, ჩოხატაურის მუნიციპალიტეტში იმყოფებოდა გადაცემა “ლიხს იქით და ლიხს აქეთ” გადამღები ჯგუფი _ ჩოხატაურის მუნიციპალიტეტზე ფილმის გადასაღებად. გადამღები ჯგუფი შედგებოდა 5 წევრისგან, რომლებიც დაბინავებული იყვნენ ი/მ ავთანდილ კოტრიკაძის საოჯახო ტიპის სასტუმროში.
გთხოვთ, გაუწიოთ ფინანსური დახმარება ჯგუფს კვების ქირის გადასახდელად 450 ლარით”, _ ასეთ წერილს უგზავნის 4 ნოემბერს თამაზ ჯინჭარაძეს კულტურის სამსახურის უფროსი ქეთევან გიორგაძე.
გამგეობიდან ოფიციალურად გამოთხოვილი დოკუმენტაციით (ანგარიშ-ფაქტურა ინვოისი #2) ირკვევა, რომ “კვების ქირა” _ 450 ლარი ჩოხატაურის მუნიციპალიტეტის სტუმრების (5 წევრი) 5 დღით 3-ჯერადი კვების ღირებულებაა.
ინვოისი 5 ნოემბერს არის გაცემული და მასზე აღნიშნულია, რომ კოტრიკაძემ თანხა ხელზე ფულის სახით მიიღო. თუმცა, სალაროს შემოსავლის ორდერი, სადაც წერია, რომ მუნიციპალიტეტის სტუმრების კვების ღირებულება ავთანდილ კოტრიკაძემ ჯინჭარაძისგან მიიღო, 4 ნოემბრით თარიღდება.
ავთანდილ კოტრიკაძე ინდმეწარმედ 09/07/2013 წელსაა დარეგისტრირებული. საჯარო რეესტრის მონაცემებით, მის სახელზე არანაირი ქონება არ ირიცხება. მის სახელზე არც კვების ობიექტი და არც საოჯახო ტიპის სასტუმროა რეგისტრირებული. თუმცა, ჩვენთან საუბრისას ამბობს, რომ სასტუმრო აქვს და ერთი ადამიანის მომსახურება სამჯერადი კვებით ერთი დღე-ღამის განმავლობაში 50 ლარი ჯდება.
_ კი, მყავდა პირველი არხის ჟურნალისტები სტუმრად, მაგრამ ფული ჯერ არ მოუციათ, ველოდები, _ ამბობს კოტრიკაძე, რომლის თქმით, ეს საკითხი “ჩვენი გასარკვევი არ არის, რადგან არავინ გვეკითხება”.
ჩოხატაურის გამგებლის მოვალეობის შემსრულებელი თამაზ ჯინჭარაძე ამბობს, რომ თანხა ნამდვილად გაიცა:
_ ზუსტი დეტალები მეც არ ვიცოდი. თქვენი შეკითხვის შემდეგ გავარკვიე, რომ საბუთზე ხელი, კოტრიკაძის ნაცვლად, მისმა მეუღლემ მოაწერა და კულტურის სამსახურის უფროსმა პირადად გადასცა ეს ფული. თანაც ქეთევან გიორგაძე ამ ოჯახის რძალია, საკმაოდ ახლო ნათესავია და არანაირი პრობლემა არ არის. ოჯახმა გაწეული მომსახურების ანაზღაურება მიიღო. დოკუმენტზე კოტრიკაძის ნაცვლად, მეუღლის ხელმოწერა იმან გამოიწვია, რომ თავად 4 ნოემბერს არ იმყოფებოდა ჩოხატაურში, _ განგვიმარტა ჯინჭარაძემ.
ჩვენ შევეცდებით გავიგოთ, გადაცემის “ლიხს იქით და ლიხს აქეთ” დასაფინანსებლად სხვა მუნიციპალიტეტების ხელისუფლებამაც გაიღო თუ არა ადგილობრივი ბიუჯეტის ფული.
