სოფელ მელექედურის დეპუტატი ავთანდილ ხინთიბიძე ამბობს, რომ თვითმმართველობის კოდექსის განხილვას ოზურგეთში დაესწრო, მაგრამ ეს არ არის საკმარისი.
“ზოგადი ინფორმაცია მაქვს, ეს კი არ არის საკმარისი. ჩემის აზრით, განხილვა კიდევ არის საჭირო, ეს ძალიან სერიოზული საკითხია და ყველა დონეზე უნდა განვიხილოთ. სოფლებშიც უნდა მოხდეს თვითმმართველობის კოდექსის განხილვა, რადგან როგორც გავიგე, რამდენიმე სოფლის შეერთება მოხდება. როგორ მოხდება ეს პროცესი საინტერესოა,” _ ამბობს ხინთიბიძე.
დაბა ნარუჯის დეპუტატი ვალოდია ბერიძე კოდექსს ბოლოდემ არ გაცნობია.
“მთლიანად არ ვიცნობ კოდექსს, მხოლოდ ერთ შეხვედრას დავესწარი, რომელიც ახალაგზრდა პედაგოგთა კავშირის დარბაზში შედგა. მთლიანობაში, ეს კოდექსი მისაღებია. მისაღებია ის, რომ რამდენიმე სოფელი გაერთიანდება, რომელსაც ექნება თავიანთი დაფინანსება და არ ვიქნებით დროში გაწელილი. მაგალითად, პატარა საქმე რომ გაგეკეთებინა, რამდენიმე ინსტანცია უნდა გაევლო. ახალი კოდექსით კი, ადგილზე იქნება შესაძლებელი ამ პრობლემის მოგვარება,” _ უთხრა “გურია ნიუსს” ბერიძემ.
სოფელ კონჭკათის დეპუტატ ალეკო ტუღუშის თქმით, კოდექსს ბოლომდე არც ის გასცნობია და ვრცელ კომენტარს ამ ეტაპზე ვერ გააკეთებს.
“სხვათაშორის არ ვარ გაცნობილი. ერთ შეხვედრას დავესწარი, იქედან რაღაც ინფორმაცია კი მივიღე, მაგრამ კარგად არ ისმოდა ხმა, მიკროფონი არ იყო. როგორც გავიგე მთლიანად იცვლება ყველაფერი და ვნახოთ რა იქნება,” _ ამბობს ტუღუში.
თემურ ქინქლაძე, სოფელ ნატანების დეპუტატი: “მე როგორც ვიცი კოდექსი ბოლომდე არ არის ჩამოყალიბებული. საბოლოო ვარიანტის განხილვა პარლამენტში არ არის დაწყებული და როდესაც ეს პროცესი დასრულდება, შემიძლია ამის შემდეგ გაგცეთ პასუხი.”
თამაზ სალუქვაძე, სოფელ ლიხაურის დეპუტატი: “რა თქმა უნდა, გავეცანი, მაგრამ ჯერ მიღებული არ არის ეს კოდექსი.საკრებულოში სამუშაო განხილვას ნამდვილად ვაპირებთ. გარკვეული მოსაზრებები მაქვს, მაგრამ ამ ეტაპზე არ ვაპირებ კომენტარის გაკეთებას. მაგალითად, სოფლების გაერთიანებს მთლად დადებითად არ ვუყურებ. შეიძლება ამ კუთხით რაღაც ცვლილებები შევიდეს და აქედან გამომდინარე შემდეგ მირჩევნია ვისაუბრო”.
ლევან ნინიძე, სოფელ ასკანის დეპუტატი: “ბევრი რამ ბუნდოვანია ჩემთვის. როგორც გავიგე არჩევნები პროპროციული სისტემით უნდა მოხდეს და ამასთან დაკავშირებით ვერ მივიღე პასუხი. ასევე საინტერესოა, როგორ მოხდება ტრანსფერით მოსული თანხის განაწილება, რაც მნიშვნელოვანია საკითხია. მთლიანად ჩახედული არ ვარ ამ საკითხში, მაგრამ რაც ვიცი ის გითხარით.”
საკრებულოს დეპუტატი ირინა საჯაია თვითმმართველობის კოდექსს არ უჭერს მხარს.
“თვითმმართველობის კოდექსს გავეცანი და არ მომწონს. მე მგონი, ამისთვის არ არის მზად მთლიანად ქვეყანა. იმიტომ, რომ ეს არის თვითმმართველობის მოწყობის ახალი მოდელი, რომელიც მთლიან რეფორმას ითვალისწინებს. ოზურგეთის მაგალითზე რომ ავიღოთ, აქ მოხდება რამდენიმე სოფლის შეერთება და თვითმმართველი ქალაქი ხდება ოზურგეთი, ეს თავისთავად შეიძლება არ იყოს იდეაში ცუდი, მაგრამ ჯერ ამისთვის ჩვენი საზოგადოება მზად არ არის. ახალი კოდექსით საზოგადოებრივი საბჭოები იქმნება, რომელიც გამოიწვევს ბევრ გაურკვევლობას და არეულობას. ეს ყველაფერი ასევე დიდ ფინანსებთან არის დაკავშირებული და ამდენი ადმინისტრაციული ხარჯები თუ აქვს ქვეყანას და ადმინისტრაციული ცენტრებისთვის შეუძლია ფინანსები გაიღოს, ძალიან არარეალურია,” _ აცხადებს საჯაია.
დეპუტატი კახა ღლონტის განცხადებით, კარგი იქნება თუ კოდექსის განხილვას სისტემატური ხასიათი თუ ექნება.
“თვითმმართველობის ახალი კოდექსი არის ნოვატორული პროექტია, რომელიც მთლიანად ცვლის სახელმწიფო მოწყობას ადგილობრივ თვითმმართველობის დონეზე. აქამდე ჩვენ გვქონდა ერთდონიანი თვითმმართველობა და ახალი კოდექსის მიღების შემდეგ კი ორდონიანი სისტემით იცვლება. კოდექსის განხილვაზე მხოლოდ ერთი მხარე განვიხილეთ, სადაც არ იყო გაერთიანებული ფინანსური მხარე ანუ რა ფინანსური მხარით უნდა იარსებობს ამ ახალმა საკრებულოებმა. ყველაფერი არის კარგად ასაწონი და უნდა მოხდეს რაც შეიძლება მეტი საჯარო განხილვა. ამ კოდექსს აქვს როგორც დადებითი, ასევე უარყოფითი მხარე და აქედან გამომდინარე, უნდა დაველოდოთ რა იქნება შემდგომში. იმედს ვიტოვებ, რომ დაიხვეწება ეს კოდექსი,” _ ამბობს ღლონტი.
ოზურგეთის საკრებულოს დეპუტატი ლელა ნაცვალაძე “გურია ნიუსთან” საუბრისას აცხადებს, რომ ყველაზე მეტად დეცენტრალიზაციის საკითხი მოსწონს.
“სიმართლეს გეტყვით, სრულად არ ვარ გაცნობილი, ახლა ვეცნობი და როდესაც მთლიანად მომიწევს შესწავლა ამ კოდექსის, შემდეგ მირჩევნია ვრცლად ვისაუბრო. მოკლედ შემიძლია გითხრათ, რომ დეცენტრალიზაციის მომხრე ვარ, რადგან ადგილზე უნდა წყებოდეს ყველაფერი, მაგრამ ეს მაშინ არის კარგი თუ დაფინანსება შესაბამისი არსებობს. დეცენტრალიზაცია თუ იქნება დაფინანსების გარეშე, ამას, რა თქმა უნდა, არ ვემხრობი. ის, რომ თვითმმართველი ქალაქი ხდება ოზურგეთი, ამას მივესალმები, რადგან ნამდვილად გვჭირდება ეს. და ბოლოს, როდესაც ახალი რამ იწყება, ყოველთვის ახლავს პრობლემები და უარყოფითი მხარეები, მაგრამ იმედს ვიტოვებ, ყველაფერი მოგვარდება. ვნახოთ, რა იქნება,” _ უთხრა “გურია ნიუსს” ნაცვალაძემ.
საკრებულოს კიდევ ერთი დეპუტატი მერაბ მჟავია კოდექსის განხილვა მეგობრულ წრეში დაასრულა, მაგრამ დეტალურად მაინც არ საუბრობს მედიის წარმომადგენლებთან.
მერაბ მჟავია:
_ ჯერ არ წამიკითხვას. ახლა ვიწყებთ ამის განხილვას. დღეს ვიწყებ ამ საკითხთან დაკავშირებით ჩამოყალიბებას. გადაკითხულიც გვაქვს და გადამუშავებულიც, მაგრამ ცოტა მოგვიანებით გავაკეთებ კომენტარს.
_ როგორც ამბობთ, გადამუშავებული და გადაკითხული გაქვთ კოდექსი. ორიოდე სიტყვით შეაფასეთ, რა აღმოაჩინეთ დადებითი ან უარყოფითი?
_ ცუდი არაფერი წერია იქ, ყველაფერი არის გადასარევი.
_ ანუ კონკრეტულად არ შეგიძლიათ გვითხრათ?
_ უბრალოდ ამ წუთში არ მინდა ვისაუბრო ამ საკითხთან დაკავშირებით. ბოლოსდაბოლოს დაიხვეწება ეს ყველაფერი და ჩამოყალიბდება საბოლოო აზრი. კარგია, რაა და მოერგება ყველას ეს კოდექსი, ამაში დარწმუნებული ვარ.
_ როდესაც ამბობთ, რომ კარგი არის, რატომ არ გვეუბნებით რა არის კარგი?
_ შემიძლია მას შემდეგ გიპასუხოთ, როდესაც გავივლით ამ საკითხს მეგობრებში.
_ მეგობრები რა შუაში თვითმმართველობის კოდექსთან?
_ მეგობრებში ამ შემთხვევაში ვგულისხმობ საკრებულოს წევრებს.
_ ანუ ერთად აპირებთ კოდექსის გადაკითხვას?
_ გადაკითხული, დამუშავებული გვაქვს ეს კოდექსი, მაგრამ გვინდა, პატარა ნიუანსებს, რომელზეც კითხვის ნიშნები გვაქვს, გაეცეს პასუხი.
_ რა კითხვებით გაქვთ?
_ იცით, რა მინდა გითხრათ? სიჩქარე არის საქმის გამფუჭებელი, ყოველთვის არის საჭირო დაფიქრება და ამის გამო ვერ გცემთ კონკრეტულად პასუხს. ამ ეტაპზე მირჩევნია თავშეკავებული ვიყო და მოგვიანებით გიპასუხოთ.
