35 რეკომენდაცია ეუთოსგან, ხარვეზები საარჩევნო კოდექსში, ნაკლები პოლიტიკური კულტურა და კონკურენცია, დახარჯული მილიონები და სამი არჩევნები მომავალი სამი წლის მანძილზე _ ეს ის ძირითადი საკითხებია, რომლებზეც საქართველოს ცენტრალური საარჩევნო კომისიის თავმჯდომარემ ზურაბ ხარატიშვილმა ოზურგეთში 7 ივლისს ისაუბრა.
რაოდენ გასაკვირიც უნდა იყოს, #60 საარჩევნო ოლქში სამსაათიანი შეხვედრის დროს, ფაქტობრივად, გასულ არჩევნებზე არსებული დარღვევების შესახებ, ოპოზიციური პარტიების და არასამთავრობო ორგანიზაციების წარმომადგენლებს არ უსაუბრიათ. მეტიც, შეიძლება ითქვას, მათი მხრიდან დასმული, სულ რაღაც, რამდენიმე შეკითხვა, საარჩევნო გარემოს შეცვლასა თუ საარჩევნო კოდექსში არსებულ ხარვეზებს ნაკლებად შეეხებოდა.
ცესკოს თავმჯდომარე ყველა ოლქის შემოვლას და არსებული პრობლემების გაცნობას ადგილებზე გეგმავს. ამის მიზეზი კი, მისი თქმით, იმ შენიშვნებისა და მოსაზრებების მოსმენაა, რაც ამომრჩევლებს აქვთ: “უშუალოდ შეხვედრების დროს, მოქალაქეებისგან, პოლიტიკური პარტიებისა და არასამთავრობო ორგანიზაციების წარმომადგენლებისგან მინდა მოვისმინო ის შენიშვნები, რაც მათ აქვთ, ანუ რისი გაკეთება შეიძლება იმისთვის, რომ არჩევნები კიდევ უკეთესად ჩატარდეს, რა უნდა გააკეთოს ადმინისტრაციამ და რისი გაკეთება შეგვიძლია ერთობლივი ძალისხმევით”, _ თქვა მან.
“საკმაოდ კარგი და საინტერესო შეხვედრები იყო ლანჩხუთისა და ჩოხატაურის ოლქებში. ორი ძირითადი საკითხია, რისთვისაც გთხოვეთ აქ მოსვლა: პირველი ჴ 2012, 2013 და 2014 წლებში ჩვენ გველოდება საპარლამენტო, საპრეზიდენტო და ადგილობრივი თვითმმართველობის არჩევნები. აქედან გამომდინარე, საკმაოდ დაძაბული რეჟიმია _ არჩევნების კასკადი გამოდის. ამიტომ, ჩვენ ვცდილობთ, მაქსიმალურად მოვემზადოთ ამ არასაარჩევნო წელს და შემდგომი არჩევნები ჩავატაროთ ისე, რომ მან ქართული საზოგადოების მხრიდან ნდობა დაიმსახუროს. მთელი ჩვენი საქმიანობა სწორედ აქეთკენ არის მიმართული. მომავალი სამი წლის პერიოდი კრიტიკულად მნიშვნელოვანი და, ფაქტობრივად, ტესტი იქნება საქართველოსთვის, თუ რამდენად არის ის შემდგარი სახელმწიფო, დემოკრატიული და თავისუფალი ქვეყანა. ეს საკმაოდ მნიშვნელოვანი გამოწვევაა და ვფიქრობ, ამ პროცესებში მთელი საზოგადოება უნდა ჩაერთოს, რათა მივაღწიოთ დასახულ მიზანს. კარგი არჩევნები ცუდი არჩევნებისგან იმით განსხვავდება, თუ რამდენად მაღალი იქნება საზოგადოების მხრიდან ნდობის ხარისხი”, _ აღნიშნა ხარატიშვილმა.
ცესკოს საზოგადოებასთან ურთიერთობის და კომუნიკიციების განყოფილების ხელმძღვანელმა ნიკა პროსტოსევდოვმა, როგორც სამომავლო გეგმების და მიდგომების შესახებ, ასევე საარჩევნო გარემოს გაუმჯობესების პროცესში საარჩევნო ადმინისტრაციის წვლილზე ისაუბრა.
ცესკოს ინიციატივით, 16 რეგიონული რესურსცენტრი შეიქმნება, რომელიც იქნება, როგორც პოლიტიკური პარტიების, ისე არასამთავრობო ორგანიზაციებისა თუ მედიის წარმომადგენლების შეხვედრების ადგილი. გარდა ამისა, ამომრჩეველს ექნება საშუალება, მივიდეს რესურსცენტრში და ისარგებლოს, როგორც კომპიუტერული ტექნიკით, ასევე ინტერნეტითა და სხვა რესურსებით.
კიდევ ერთი მნიშვნელოვანი საკითხი, რაზედაც ცესკოს წარმომადგენლებმა ისაუბრეს, საოლქო სარჩევნო კომისიის ოფისების, ადმინისტრაციული შენობებიდან გატანაა.
ხარატიშვილის განცხადებით, ცესკო რეგიონულ მედიას ძალიან დიდ ყურადღებას უთმობს: “ჩვენ ვგეგმავთ არაერთ ტრენინგსა თუ შეხვედრებს რეგიონულ ჟურნალისტებთან. ძალიან დიდია მედიის როლი საარჩევნო ადმინისტრაციის მუშაობასა და არჩევნების პროცესის გაშუქებაში. ასევე, გვაქვს იდეა, რომ ყველა უბანში თუ დასახლებაში შეიქმნას აქტიური ამომრჩევლების ქსელი”, _ აღნიშნა ცესკოს თავმჯდომარემ.
ამომრჩეველთა მხრიდან ყველაზე პრობლემურ საკითხად დღემდე განიხილება ამომრჩეველთა სიები: “გაზაფხულამდე მოგვარდება საარჩევნო სიებთან დაკავშირებული ყველა პრობლემა. გვინდა შეიქმნას კომისია, რომელიც დაკომპლექტება პოლიტიკური პარტიების, მათ შორის, ოპოზიციური პარტიებისა და არასამთავრობო ორგანიზაციების წარმომადგენლებისგან. კომისიის თავმჯდომარე აუცილებლად უნდა იყოს ოპოზიციიდან წარმოდგენილი და 2011 წლის 1 ოქტომბრიდან 2012 წლის ივლისამდე, უნდა ჩატარდეს ამომრჩეველთა სიების მონიტორინგი. ვფიქრობ, ამის შემდეგ საარჩევნო სიები საბოლოოდ გაიფილტრება და ხარვეზებიც აღმოიფხვრება”, _ ამბობს ცესკოს პირველი პირი.
“ეუთომ 2010 წლის თვითმმართველობის არჩევნების შემდეგ, 35 რეკომენდაცია დაწერა, ანუ რა უნდა გააკეთოს საქართველომ, რომ ეუთოს სტანდარტებთან შესაბამისობაში მოვიდეს. თუმცა, “რვიანმა” ამ რეკომენდაციებზე სათანადო ყურადღება არ გაამახვილა და ბიომეტრული პასპორტების შემოღება მთავარ პრიორიტეტად მიიჩნია. ბიომეტრია კი ამ რეკომენდაციაში არ არის გაწერილი. რატომ იწყებ იმ საკითხით, რომელიც არ არის ამ რეკომენდაციებში? იმით დაიწყე, რასაც საერთაშორისო ორგანიზაცია გთავაზობს და 36-ე საკითხად დააყენე ბიომეტრია”, _ მიიჩნევს ხარატიშვილი.
