ოზურგეთის მუნიპალიტეტის გამგეობის საბიუჯეტო-საფინანსო სამსახურის უფროს ალეკო ბერიძის განცხადებით, სამუშაოებისთვის თანხას კონსტანტინე შარაშენიძე იხდის.
_ მოთხოვნა ამ სამუშაოსთან დაკავშირებით ჩემთან არ არის შემოსული და სჯობს, რომ საჯარო ინფორმაციით მოგვმართოთ.
_ ბატონო ალეკო, კონკრეტულად მაინტერესებს სარემონტო სამუშაოებისთვის არის თუ არა თანხა ბიუჯეტიდან გამოყოფილი, ამისთვის რა საჭიროა საჯარო ინფორმაციის შემოტანა?
_ გასაგებია, მაგრამ… მე, როგორც ვიცი გამგებელი ამ სარემონტო სამუშაოებს აკეთებს უშუალოდ თავისი თანხით და ბიუჯეტიდან თანხა არ გადის,_ გვითხრა ალეკო ბერიძემ.
“გურია ნიუსმა” უკვე მიმართა ოზურგეთის მუნიციპალიტეტის გამგეობას საჯარო ინფორმაციით. სადაც წერია: გათვალისწინებულია თუ არა ოზურგეთის მუნიციპალიტეტის 2013 წლის ბიუჯეტით გამგებლის მოვალეობის შემსრულებლისა და მისი მოადგილის სამუშაო ოთახების რემონტის ხარჯები; ადგილობრივ ბიუჯეტში აღნიშნული ხარჯების გაუთვალისწინებლობის შემთხვევაში რა წარმოადგენს სარემონტო სამუშაოების დაფინანსების წყაროს.
მიუხედავად იმისა, რომ ეს ინფორმაცია დაუყოვნებლივ უნდა გაცემულიყო ასე არ მოხდა და გამგეობის პრესსამსახურში გვითხრეს, რომ ხვალისთვის მივიღებდით პასუხს (განცხადების შეტანა 26 ნოემბერს მოხდა, ავტ.).
“საქართველოს ახალგაზრდა იურისტთა ასოციაციის” ოზურგეთის ოფისის იურისტ ქეთი თოიძის განმარტებით, ზოგადი წესის მიხედვით საჯარო დაწესებულება ვალდებულია გასცეს საჯარო ინფორმაცია დაუყოვნებლივ. რამდენადაც კანონი არ განმარტავს დაუყოვნებლივ გაცემის ცნებას, ასეთ პერიოდად გონივრული ვადები უნდა ჩაითვალოს. თეორიაში სხვადასხვა ავტორების მიერ გამოთქმულია საკმაოდ საფუძვლიანი მოსაზრება, რომ საჯარო ინფორმაციის დაუყოვნებლივ გაცემა (ანუ გონივრული ვადა ამ ინფორმაციის გაცემისათვის) იმავე დღეს ან განცხადების რეგისტრაციიდან არა უგვიანეს მეორე დღეს გულისხმობს.
“ინფორმაციის დაუყოვნებლივ გაცემის ზოგადი წესიდან არსებობს გამონაკლისი, როდესაც ინფორმაცია შეიძლება გაიცეს არა უგვიანეს 10 დღისა, მაგრამ ამ შემთხვევაში უნდა არსებობდეს კანონით პირდაპირ დადგენილი წინაპირობები, კერძოდ, საჯარო ინფორმაციის მოთხოვნაზე პასუხის გაცემა უნდა მოითხოვდეს: 1. სხვა დასახლებულ პუნქტში არსებული მისი სტრუქტურული ქვედანაყოფიდან ან სხვა საჯარო დაწესებულებიდან ინფორმაციის მოძიებასა და დამუშავებას; 2. მნიშვნელოვანი მოცულობის ერთმანეთთან დაუკავშირებელი ცალკეული დოკუმენტების მოძიებასა და დამუშავებას; 3. სხვა დასახლებულ პუნქტში არსებულ მის სტრუქტურულ ქვედანაყოფთან ან სხვა საჯარო დაწესებულებასთან კონსულტაციას.
აქვე აუცილებლად გასათვალისწინებელია ის გარემოებაც, რომ თუ საჯარო ინფორმაციის გაცემისათვის საჭიროა 10-დღიანი ვადა, საჯარო დაწესებულება ვალდებულია მოთხოვნისთანავე აცნობოს ამის შესახებ განმცხადებელს”, _ გვითხრა ქეთი თოიძემ.
“გურია ნიუსი” დაელოდება ოზურგეთის მუნიციპალიტეტის გამგეობიდან ოფიციალური პასუხის გამოგზავნას, რომელსაც მიღებისთანავე გამოვაქვეყნებთ.
