თქვენი 2013 წლის 28 მაისის განცხადებისა და 2013 წლის 29 აგვისტოსა და 15 ოქტომბრის დამატებითი განცხადების პასუხად, რომლებიც შეეხებოდა საქართველოსა და პატარკაციშვილების ოჯახს შორის 2011 წლის 6 ივლისს გაფორმებული მორიგების ხელშეკრულებას გაცნობებთ შემდეგს:
საქართველოს მთავრობის 2013 წლის 5 სექტემბრისა და საქართველოს პრეზიდენტის 2013 წლის 17 სექტემბრის განკარგულების საფუძველზე, განსაიდუმლოებული იქნა საქართველოსა და პატარკაციშვილების ოჯახს შორის გაფორმებული ხელშეკრულება. თუმცა, როგორც თქვენთვის ცნობილია, მორიგების ხელშეკრულება შეიცავს კონფიდენციალურობის შესახებ დებულებას. რომლის მიხედვითაც, მორიგების ხელშეკრულების არცერთ მხარეს არ აქვს მეორე მხარის თანხმობის გარეშე დოკუმენტის მესამე პირებისთვის გადაცემის ან მისი შინაარსის გამხელის უფლება. ამჟამად, მორიგების ხელშეკრულების მხრიდან ხელმოწერილი ყველა პირის თანხმობის არარსებობის პირობებში, იუსტიციის სამინისტრო, როგორც საქართველოს სახელმწიფოს სახელით ხელმომწერი უწყება, შებოჭილია ვალდებულებით, დაიცვას დოკუმენტის კონფიდენციალურობა, ამ და მასთან დაკავშირებული დოკუმენტების განსაიდუმლოების პირობებშიც კი. საგულისხმოა ის ფაქტი, რომ ხელშეკრულება იმართება ინგლისური სამართლით და, შესაბამისად, კონფიდენციალურობის ვალდებულების დაცვისა და მხარეთა მიერ დოკუმენტის გაცემის საკითხებიც რეგულირდება ინგლისური სამართლის ნორმებით.
მხარეთა შორის მიმდინარეობს მოლაპარაკებები მორიგების ხელშეკრულების გასაჯაროების შესახებ, თუმცა მოცემული მომენტისთვის არ არის მიღწეული საბოლოო შეთანხმება.
პატივისცემით თეა წულუკიანი
თეა წულუკიანის ამ წერილს პასუხად მოყვა “ქართული ფოლადის” დირექტორის, ნათია ჯაყელის განცხადება:
“ჩვენმა ადვოკატებმა იუსტიციის მინისტრის ქალბატონ თეა წულუკიანის წერილი მიიღეს. თურმე, საქართველოს მთავრობასა და პატარკაციშვილების ოჯახს შორის 2011 წლის 6 ივლისს გაფორმებულ ხელშეკრულებას, საქართველოს მთავრობის 2013 წლის 5 სექტემბრისა და საქართველოს პრეზიდენტის 17 სექტემბრის განკარგულების საფუძველზე გრიფი “საიდუმლო” მოეხსნა.
ეს მისასალმებელი ფაქტი იქნებოდა, რომ არა რამდენიმე გარემოება:
თურმე მორიგების არცერთ მხარეს არ ჰქონია უფლება გაამჟღავნოს ხელშეკრულების დეტალები, თუ ორივე მხარე, ანუ ინა გუდავაძე და საქართველოს სახელმწიფო, თანახმა არ იქნება.
შემდეგ ირკვევა, რომ “მეორე მხრიდან ხელმომწერი ყველა პირის თანხმობის არარსებობის გამო მხარეებს შორის მიმდინარეობს მოლაპარაკებები, თუმცა არ არის მიღწეული საბოლოო შეთანხმება!” ანუ ინა გუდავაძის ხელმომწერთა მხრიდან თანხმობა არ ყოფილა!
აი ეს კი სიურპრიზი ნამდვილად არ ყოფილა! აკი ვაცხადებდით კიდეც, რომ ინა გუდავაძე და მისი გუნდი ყველაფერს გააკეთებს, რომ ეს დოკუმენტი არ გასაჯაროვდეს და კიდევ ერთხელ სცადონ სახელმწიფოს, საზოგადოებისა და სასამართლოს დაშანტაჟება. ყველა იმ კითხვას, რაც საზოგადოებას წლებია დაუგროვდა, არ გაეცეს პასუხი!
და კიდევ ერთი: თუ რა დაუჯდება საქართველოს ბიუჯეტს ამ ხელშეკრულების დარღვევა.
აქვე გიპასუხებთ _ არაფერი! თუ რატომ, ეს იურიდული ნიუანსებია და იურისტები უკეთ ახსნიან. მაგრამ ჩემ ხელთ არსებული ინფორმაციით, ინა გუდავაძემ და მისმა გუნდმა საქართველოს ბიუჯეტში ჯერ ის თანხა დააბრუნონ, რაც მოიპარეს, თუნდაც 39 მილიონი, და შემდეგ “იდარდონ” თქვენს, ჩემს და ჩვენი შვილების ზარალზე!
“ჩემი კლიენტის, ინა გუდავაძისა და მისი ოჯახის სახელით გამოგზავნილი ბოლო შეტყობინების შემდეგ, (რომელზეც მე თქვენი პასუხი არ მიმიღია), რომელიც ეხებოდა ჩვენს შემოთავაზებას მორიგების შესახებ შეთანხმებაში გათვალისწინებული კონფიდენციალურობის პირობების შემსუბუქებას, მე შევიტყვე, რომ საქართველოში კვლავ მიმდინარეობს მსჯელობა მორიგების შესახებ შეთანხმების ბუნებისა და შინაარსის თაობაზე.
2013 წლის 15 ოქტომბერს პატარკაციშვილების მხრიდან გავრცელებულ წერილში ვკითხულობთ:
“ახლა ჩვენთვის აშკარაა, რომ მიუხედავად იმისა, თუ როგორ მოხდა ეს, მორიგების არსებითი შინაარსი გამჟღავნდა საქართველოში და მასთან დაკავშირებით ვრცელდება არასწორი მოსაზრებები.
შესაბამისად, ჩემს კლიენტებს სურთ გამოხატონ მზადყოფნა, რომ დაუყოვნებლივ იქნას მიღებული ზომები ამ საკითხთან დაკავშირებით და თანახმა არიან უარი თქვან მორიგების შეთანხმებით გათვალისწინებულ კონფიდენციალურობის შეზღუდვებზე” _ ამ შინაარსის წერილს, რომელიც 2013 წლის 15 ოქტომბრითაა დათარიღებული, პატარკაციშვილების წარმომადგენელი სიგნიჩა ლითიგეიშენ ლლფ აწერს ხელს.
წერილის ადრესატი კი ამგვარდაა განსაზღვრული:
ბატონებო,
მთავარი სარჩელი _ HC08C0549, სალფორდის სარჩელი _ HC0900711, მეტალოინვესტის სარჩელი _ HC09C00494 (ერთობლივად: საკანცელარიო სასამართლოში შეტანილი სარჩელები).
საინტერესოა, თუკი ერთი თვის წინ დოკუმენტზე სააიდუმლო გრიფის ახსნის ინიციატივით გამოდიოდნენ, ახლა რა უშლით ხელს, როდესაც სახელმწიფო მზადყოფნას აცხადებს ამისთვის?
როგორც ამბობენ, პატარკაციშვილების მთავარი პრობლემა ისაა, რომ საზოგადოება უკვე დოკუმენტალურად შეიტყობს, რის ფასად გაიყიდა “იმედი”.
პატარკაციშვილების ოჯახი დღემდე კატეგორიულად უარყოფს 400 მილიონის სანაცვლოდ ტელევიზიის დათმობას.
მაგრამ, რასაც უარყოფენ პატარკაციშვილები, იმაზე ექსკლუზიურად “გურია ნიუსთან“ საუბრობს საქართველოს ყოფილი პრემიერ მინისტრი ბიძინა ივანიშვილი:
“მინდოდა, რომ რაც შეიძლება ადრე გამომზეურებულიყო ეს მასალები. მე ვითვალისწინებ ოჯახის პოზიციას, რომელიც ყველაზე დიდი დაზარალებულია. გარიგებაშიც კი, იკვეთება რამდენად ცუდ დღეში ჰყავდათ ოჯახი. მათ ოდესღაც წაართვეს რაღაცეები და შემდგომ, ტელევიზიის სანაცვლოდ უკან დაუბრუნეს. როგორც მახსოვს 400 მილიონზეა საუბარი მათი შეფასებით, მაგრამ ეს რამდენად შესატყვისია და რამდენად სწორად იყო შეფასებული ცალკე საანალიზოა. პირადად მე არ წამიკითხავს. მხოლოდ იუსტიციის მინისტრის მოხსენება წავიკითხე. ამ საქმეს პროკურატურა იძიებს. შოკის მომგვრელი იყო ჩემთვის, რომ სახელმწიფო ჩინოვნიკი ხელს აწერს სუპერ კონფიდენციალურ დოკუმენტს, რომლის გახსნის უფლება ქვეყნის არსებობის ისტორიის მანძილზე არავის არ აქვს. ამ დოკუმენტს მეორე მხრიდან ოჯახის ყველა წევრი აწერს ხელს და იქ აშკარად ჩანს, როგორ ათმობინებენ ოჯახს ტელევიზიას და სანაცვლოს უბრუნებენ სახელმწიფო ქონების დიდი ნაწილს. ოჯახის სახელით გამოგზავნილი”, _ განაცხადა რამდენიმე ხნის წინ პრემიერ მინისტრმა “გურია ნიუსისთვის” მიცემულ ინტერვიუში.
