მისი განცხადებით, ამ დანიშვნებით ნათელი ხდება, რომ პრემიერ-მინისტრი და ზოგადად, გადაწყვეტილების მიმღები პირები არ ენდობიან, ან არ მიიჩნევენ ამ თანამდებობისათვის შესაფერისად გურიის კოალიცია “ქართული ოცნების” აქტივისტებს.
“ეს ფაქტი, სავარაუდოდ, გამოწვეულია შიდაკოალიციური მწვავე დაპირისპირებებით, რასაც მთელი ამ დროის მანძილზე თან ახლდა კოალიციის წევრთა და მხარდამჭერთა ერთმანეთის მიმართ “ძირგამომთხრელი” საქმიანობა. სწორედ ეს იყო კოალიციის აქტივისტთა ძირითადი საქმიანობა პირველი ოქტომბრის საპარლამენტო არჩევნების შემდეგ. “ქართულმა ოცნებამ” სწორედ ამის გამო ვერ შეძლო მისი მხარდამჭერთა მოქმედებების სათანადო კონტროლი და კოორდინაცია. აქვე გასათვალისწინებელია ისიც, რომ კოალიციაში და მის მხარდამჭერ დარბაზებში არსებული დაჯგუფებების დაპირისპირებას კიდევ უფრო გაამწვავებს რომელიმე მათგანის წარმომადგენლის გუბერნატორად დანიშვნა.
იგივე შედეგი შეიძლება ჰქონდეს “უცხო” პირის “გაგუბერნატორებას”, რაც პოლიტიკური და ეკონომიკური კრიზისის პირას მყოფ ხელისუფლებას ადგილობრივი არჩევნებისათვის უკიდურესად არასახარბიელო მდგომარეობას შეუქმნის. ზემოხსენებული ვარაუდს ამყარებს ის გარემოებაც, რომ პოლიციის უფროსების “გაგუბერნატორება” მთელი ქვეყნის მასშტაბით იგეგმება, მაგრამ აქვე გასათვალისწინებელია ისიც, რომ გურიაშიც ისეთივე მდგომარეობაა, რაც საქართველოს სხვა მხარეებში. არსებული სიტუაციის ჩემეული ანალიზით ნათელია, რომ დღევანდელ ხელისუფლებას სწორედ პოლიციის უფროსი და პროკურორი მიაჩნიათ იმ პირებად, ვისაც შეუძლიათ დაპირისპირებულ ჯგუფებზე სერიოზული გავლენა მოიპოვონ, რამეთუ მათ ამ ჯგუფების “ცოდვილ” წარმომადგენლებზე და მათ “ცოდვებზე” საკმაოდ დიდი ინფორმაცია აქვთ დაგროვებული წლების განმავლობაში როგორც ოფიციალური, ისე არაოფიციალური წყაროებიდან.
საიდუმლო არ გახლავთ ის, რომ “ქართული ოცნების” წარმომადგენლებზე შექმნილი საქმეები პოლიციასა და პროკურატურაში თაროებზეა შემოდებული. ასევე, არსებობს საკმაოდ დიდი მაკომპრომიტირებელი ინფორმაცია მათი პირადი ცხოვრების შესახებ, რომელიც უკანონოდაა მოპოვებული “ნაციონალების” ზეობის ხანაში. იგივე სახის ინფორმაცია არსებობს, როგორც მოწინააღმდეგე პოლიტიკური ძალების, საჯარო მოსამსახურეების და საზოგადოების სხვადასხვა ფენების წარმომადგენლების შესახებ. შესაბამისად, სხვადასხვა კატეგორიის ადამიანების ცნობიერებაზე და მათი მოქმედებების კონტროლზე ასეთ გუბერნატორს სერიოზული გავლენა ექნება და საჭირო აღარ იქნება მათი პოლიციასა და პროკურატურაში დაბარება და “მეგობრული” რჩევების მიცემა.
გარდა ზემოხსენებულისა გასათვალისწინებელია ისიც, რომ “ქართულმა ოცნებამ” პირველი ოქტომბრის შემდეგ თავისი ქვეშევრდომობის ქვეშ თითქმის მთლიანად აიყვანა “ნაციონალური მოძრაობის” ყველაზე უფრო კორუმპირებული და მედროვე ნაწილი. ამ ფაქტმა მთლიანად ააჭრელა ისედაც ჭრელი და ამორფული “ქართული ოცნება” და იმდენად მოუქნელი და ამღვრეული გახადა ეს პოლიტიკური ძალა, რომ უკვე შეუძლებელია მისი ხელმძღვანელობა სამოქალაქო, საჯარო ან პოლიტიკური მოღვაწეობის გამოცდილების მქონე პირების მიერ. შესაბამისად, პილიციელისა და პროკურორის დანიშვნით ხელისუფლება ფიქრობს ძალიან რთული პრობლემების მარტივად გადაჭრას, რაც მეტად სარისკო საქმე გახლავთ და სამომავლოდ ძალიან სერიოზულ პრობლემებს წარმოშობს”, _აცხადებს თამარ ნადირიძე და იმ მოსალოდნელ პრობლემებზე საუბრობს, რაც შეიძლება ფერსაშვილის დანიშვნით მოხდეს.
“პრობლემები აუცილებლად სერიოზული იქნება, ვინაიდან პირველ რიგში ყოფილი პოლიციელი, რომელიც მთელი თავისი ცხოვრების განმავლობაში მუშაობდა საზოგადოებისათვის ყველაზე უფრო ნაკლებად გამჭვირვალე ორგანოში და არა აქვს საზოგადოებასთან, პრესასთან და პოლიტიკურ ოპონენტებთან ურთიერთობის გამოცდილება, სავარაუდოდ, ვერ შეძლებს საქმიანობის განხორციელებას იმ სამართლებრივ რეჟიმში, რასაც აწესებს მოქმედი კანონმდებლობა. ასევე, ვერ შეძლებს საზოგადოებისა და პრესისაგან მომეტებული ინტერესის ტვირთის ჯეროვნად ზიდვას, რომ არაფერი ვთქვათ იმაზე, რომ იგი პოლიტიკური და საზოგადოებრივი ინტერესის გათვალისწინებით სრულიად უცნობი პიროვნებაა და მისი წარსულისა და დღევანდელი დღის გაანალიზებით, სრულიად შეუძლებელია მისი მოქმედებების პროგნოზირება, რაც პოლიტიკური თანამდებობის მაძიებლის საზოგადოებრივი შეფასებისათვის, ერთ-ერთი მთავარი კრიტერიუმია.
ამასთან, არც გუბერნატორობის მაძიებელია მარტივ მდგომარეობაში. იგი “ნაციონალების” ზეობის ხანაში პირნათლად ემსახურებოდა რეჟიმს და, სავარაუდოდ, პირადად იყო მონაწილე იმ რეპრესიებისა, რაც უშუალოდ პოლიციის ხელით კეთდებოდა. “ნაციონალებთან” ცხრაწლიანი ბრძოლოს გამოცდილების მქონე არაერთი ოპოზიციონერი გამოთქვამს პრეტენზიებს ამ კუთხით და პირად თუ საჯარო გამოსვლებში აშკარად უთითებს იმაზე, რომ ეს პირი უშუალოდ მონაწილეობდა აქციების დარბევაში, ოპოზიციონერების მანქანები დალეწვაში და მათთვის ლურსმნების დაყრაში და ა.შ. ზემოხსენებულ შემთხვევაში ალბათ არ იქნება სწორი ამ ადამიანებს მოვთხოვოთ მტკიცებულებები, რომლებიც ამ შემთხვევებს დაადასტურებს, ვინაიდან ასეთი მტკიცებებულებები საგამოძიებო მოქმედებების შედეგად მოიპოვება. მაგრამ ფაქტი ისაა, რომ რეპრესიებში მონაწილე არცერთი პირი პასუხისგებაში მიცემული ჯერ არ გახლავთ, რაც, თავის მხრივ, ამყარებს ადამიანების საპროტესტო შინაგან რწმენას. შესაბამისად, არამარტო მომავალ გუბერნატორს, არამედ მთლიანობაში ხელისუფლებას, ძალიან ბევრ კითხვაზე მოუწევს პასუხის გაცემა და ამ შემთხვევაში პასუხი – “იგი თავის მოვალეობას ასრულებდა,”- სრულიად მიუღებელი იქნება საზოგადოებისათვის”, _აღნიშნავს “გურია ნიუსთან” “დემოკრატიული მოძრაობა–ერთიანი საქართველოს” ოზურგეთის პარტიული ორგანიზაციის ხელმძღვანელი.
აღნიშნულ განცხადებასთან დაკავშირებით დავუკავშირდით შს გურიის სამხარეო მთავარი სამმართველოს უფროს გოჩა ფერსაშვილს.
_ ბატონო გოჩა, როგორც ოპოზიციის წარმომადგენლები აცხადებენ, თქვენ უშუალოდ მონაწილეობდით აქციებში. აშანტაჟებით, ემუქრებოდით და ა.შ.
_ გამორიცხულია, გამორიცხულია. კარგად გაიკითხონ, კარგად! თუ რაიმე აინტერესებთ დამატებით, მიმართონ პრესსამსახურს და ჯერჯერობით ისინი გასცემენ პასუხს და მე მეტ კომენტარს ვერ გავაკეთებ ამ ეტაპზე. მე ჩემი წარსული ისეთი სუფთა მაქვს, რომ ვერავინ ვერ ჩაიხედავს ცუდად შიგ.
_ აცხადებენ იმას, რომ თქვენ “ნაციონალების” მიერ დავალებულ ძალიან ბევ უკანონო დავალებებს ასრულებდით, გაქვთ ძალიან ბევრი მაკომპრომატებელი მტკიცებულებები საზოგადოებაზე, ოპოზიციონერებზე….
_ ერთს გეტყვით, სისულელეა ყველაფერი, _გვითხრა ფესაშვილმა.
