“საქართველოს 25-ე ეროვნულ ჩემპიონატში ს/კ “ლანჩხუთის გურიას” მონაწილეობაზე და ზოგადად მის მომავალზე ჩემპიონატის დაწყებამდე ბევრი ითქვა და დაიწერა. საზოგადოებაში ის აზრიც მუსირებდა, რომ გურია იქნებოდა ჩემპიონატის ერთ-ერთი მაჩანჩალა და ხელწამოსაკრავი გუნდი, ვისთანაც მოწინააღმდეგეები წინასწარ დაგეგმავდნენ ქულებს, თუმცა, 13 ტურის შემდეგ, გუნდი ლიდერთა სამეულშია და ერთადერთია ჩემპიონატში, რომელსაც „საშინაო თამაშებში“ ქულაც არა აქვს დაკარგული. “საშინაო თამაშები” ვახსენეთ და ვიტყვით, რომ კლუბს აქამდე ერთი მატჩიც არ ჩაუტარებია ლანჩხუთში. აღნიშნული შედეგი ფეხბურთელების უანგარო შრომის, მაღალი პროფესიონალიზმის და საქმისადმი სიყვარულის დამსახურებაა. აგრეთვე კლუბის მესავეურებისა და დირექტორატის თავგანწირული, რუტინული შრომის ფასადაა მიღწეული.
რაიონის ბიუჯეტიდან ს/კ “ლანჩხუთის გურიას” მიმდინარე გათამაშების პერიოდში მხოლოდ ერთხელ(ისიც გამგებლის დაჟინებული თხოვნის საფუძველზე) გამოეყო 85 000 ლარი (?!).
2014 წლის ბიუჯეტში პროექტის სახით წარვადგინეთ მოთხოვნა 1 700 000 ლარზე, თანხის ნაწილი უნდა მოხმარდეს ფეხბურთელთა, კლუბის თანამშრომელთა მიმდინარე წლის სახელფასო დავალიანების დაფარვას. ადგილობრივი პრესის ფურცლებზე საკრებულოს თავმჯდომარის მხრიდან კეთდება განცხადება თითქოს და ამ თანხის გამოყოფის შემთხვევაში ბიუჯეტი ვერ დააფინანსებს საბავშვო ბაღებს და „მთელი ლანჩხუთი კლუბ “გურიად” გადაიქცევა.
როცა კლუბის მხრიდან კეთდება საბიუჯეტო მოთხოვნა, ყოველთვის საბავშვო ბაღების თემატიკა გაიჟღერებს. მიგვაჩნია, რომ ეს თემით სპეკულირებაა და მეტი არაფერი. მითუმეტეს იმ ფონზე, რომ გასულ ჩემპიონატში, როცა გურია პირველ ლიგაში გამოდიოდა, ადგილობრივი ბიუჯეტიდან კლუბის დასაფინანსებლად გამოიყო 900 000 ლარი, ამის გარდა ბანკიდან აღებულ იქნა 400 000 ლარის კრედიტი. საქმე გვაქვს პარადოქსთან: თუ პირველი ლიგაში ჯამში დაიხარჯა 1 300 000 ლარი, უმაღლეს ლიგაში წარმატებულად მოასპარეზე გუნდისთვის 1 700 000 ლარით დაფინანსებაზე უარს ამბობენ (ამ თანხაში გათვალისწინებულია ჩვენი წინამორბედების დროს აღებული ზემოთხსენებული კრედიტის დაფარვა).
და ბოლოს, გვინდა აღვნიშნოთ, რომ საფეხბურთო კლუბი “ლანჩხუთის გურია” წარმოადგენს მუნიციპალიტეტის მიერ დაფუძნებულ არასამეწარმეო (არაკომერციული) იურიდიულ პირს და მისი დაფინანსება სწორედ მუნიციპალიტეტის ვალდებულებაა, რომელმაც ან უნდა შეინახოს, ანდა გამოაცხადოს მისი ლიკვიდაცია”.
