უნივერსიტეტში არსებულ პრობლემებზე საუბრის და მათი გადაჭრის გზების ძიების მიზნით, იურიდიული ფაკულტეტის რამდენიმე სტუდენტმა მოძრაობა – “არა! უთანასწორო მიდგომებს თსუ-ში” – წამოიწყო. სტუდენტთა საინიციატივო ჯგუფის ხელმძღვანელი იურიდიული ფაკულტეტის მესამე კურსის სტუდენტი ბექა ცხადაძე “გურია ნიუსს” თსუ-ში არსებულ მდგომარეობაზე უფრო დეტალურად ესაუბრება.
_ ბევრ სტუდენტს გვაწუხებს ის არათანაბარი პირობები, რომლებშიც სხვადასხვა ლექტორის საგანზე დასწრებისას ვიმყოფებით. ზოგიერთი ლექტორი სტუდენტების მიმართ ახორციელებს თვითნებურ საგანმანათლებლო პოლიტიკას, ხელმძღვანელობს რა, სასწავლო მასალის სემესტრული გეგმის შედგენის დროს, მხოლოდ საკუთარი გადაწყვეტილებებით. არ არსებობს კოორდინაცია პროფესორ-მასწავლებლებს შორის, რაც საბოლოოდ ხელს უწყობს დისკრიმინაციული გარემოს ჩამოყალიებას სხვადასხვა ლექტორთან მყოფი სტუდენტების მიმართ. დროა მოვითხოვოთ ღირსეული, თანასწორუფლებიანი პირობების შექმნა თითოეული ჩვენგანისთვის, რაც პირველ რიგში, უნდა აისახოს სემესტრული სასწავლო გეგმისა და შეფასების საერთო სტანდარტების დამკვიდრებით. იმედს ვიტოვებ, ახალი ხელისუფლების პირობებში მოხდება ერთიანი სასწავლო გეგმის ჩამოყალიბება. განათლების სფეროში ჩადებული თანხა უკვალოდ გაქრება, როგორც ეს გასულ წლებში ხდებოდა, თუ არ მოხდება საგანმანათლებლო პოლიტიკის გადახედვა, ერთიანი სტანდარტების დამკვიდრება თითოეული უნივერსიტეტისთვის. ამჟამად, საინიციატივო ჯგუფში გაერთიანებულია თსუ-ს იურიდიული ფაკულტეტის 5 სტუდენტი.სამოქალაქო აქტივიზმის პირველ ეტაპზე დავიწყებთ მოლაპარაკებას თბილისის ივანე ჯავახიშვილის სახელმწიფო უნივერსიტეტის იურიდიული ფაკულტეტის ადმინისტრაციასთან. შეთანხმების მიუღწევლობის შემთხვევაში შედგენილ იქნება პეტიციის ფორმა ზემოთხსენებული მოთხოვნით, რომელიც გადაეგზავნება საქართველოს განათლების სამინისტროს, განათლების საკითხებზე მომუშავე არასამთავრობო ორგანიზაციებს და საქართველოს პრეზიდენტს. ვითანამშრომლებთ ნებისმიერ ძალასთან, რომელიც აცნობიერებს საკითხის პრობლემატურობას.
ლექტორი, თავის გადაწყვეტილებაში, რა ასწავლოს სტუდენტს, თავისუფალია. მას სასწავლო გეგმას, ე.წ. სილაბუსს უწონებს უნივერსიტეტი. რატომ თვლით, რომ ზოგიერთი ლექტორი სტუდენტების მიმართ ახორციელებს თვითნებურ საგანმანათლებლო პოლიტიკას და რას გულისხმობთ ამაში, იქნებ უფრო კონკრეტულად გვითხრათ?
ასისტენტ-პროფესორებს, ხშირშემთხვევაში, არ აქვთ ინფორმაცია, რომელი ლექტორის სტუდენტს მოსთხოვონ რეფერატის მომზადება. მქონდა ისეთი შემთხვევაც, როცა ერთ-ერთმა ასისტენტ-პროფესორმა საერთოდ არ იცოდა, რომ მის საგანში სილაბუსით რეფერატი გვქონდა მოსამზადებელი. გარდა ამისა, არის საგნები, რომლებშიც ერთ ლექტორი სემესტრული გეგმით განსაზღვარავს 30-ქულიან შეფასებას დასწრება-აქტიურობისთვის, ერთ 30 ქულიან კოლოქვიუმს და ფინალურ, 40 ქულიან გამოცდას. ხოლო მეორე ლექტორი ამავე საგანში სემესტრული სასწავლო გეგმით აწესებს 20 ქულას დასწრება-აქტიურობისთვის, ორ 20-ქულიან კოლოქვიუმს და 40-ქულიან ფინალურ გამოცას, რაც არათანაბარ პირობებში აყენებს სტუდენტებს.
_ რა არ მოგწონთ, სხვადასხვა ლექტორი სხვადასხვანაირად რომ აფასებს სტუდენტს: ერთი კოლოქვიუმზე აწესებს მაღალ ქულას და არ აღნიშნავს დასწრებას და მეორე -პირიქით, დასწრება-აქტიურობაზეც ანაწილებს ქულებს?
_ დიახ, ზოგი ლექტორი დასწრებაში წერს ქულას, ზოგი – არა. ზოგს 1 კოლოქვიუმი აქვს, ზოგს – 2
_ ეს ხომ ლექტორის უფლებაა, თავისი შეხედულებისამებრ გაანაწილოს ქულები?
_ დიახ, ლექტორის უფლებაა, მაგრამ სტუდენტების უფლებაცაა, იმყოფებოდნენ თანაბარ პირობებში. შეფასება უნდა მოხდეს ერთიანი სისტემით, რომელზეც პირველ რიგში, უნივერსიტეტის აკადემიური საბჭო თანხმდება. ეს არანაიარად არ ზღუდავს ლქტორის უფლებას, დააფიქსიროს საკუთარი აზრი სემესტრულ სასწავლო გეგმაში, უბრალოდ, საჭიროა შეთანხმება.
_ თუ მიგიმართავთ თქვენი წინადადებით ასისტენტ-პროფესორებისთვის, რომლებზეც ამბობთ, რომ თვითნებურ საგანმანათლებლო საქმიანობას ეწევიან უნივერსიტეტში და რა პასუხები გაუციათ მათ?
_ ასისტენტ პროფესორისთვის – არა, პროფესორისთვის – კი. პასუხი მარტივი იყო: “ეს არის ამერიკული სტანდარტი”. საინტერესოა ეს “ამერიკული სტანდარტი” რატომ არ ვრცელდება ამავე საგანზე, სხვა პროფესორებთან?!
_ სხვა სტუდენტებს, გარდა თქვენ ხუთისა, რა დამოკიდებულება აქვთ აღნიშნულთან დაკავშირებით?
_ მეგობრებისგან ბევრი საუბრობს ამაზე, ძირითადად, ხმის ამოღებისგან თავს იკავებენ – შეიძლება უარესობისკენ შეიცვალოს ყველაფერიო. ერთმა ისიც მითხრა, კორუფცია აღარ არის და ყველაფერი კარგადააო. რა გამოდის, რაკი კორუფცია მოისპო, სხვა ყველა პრობლემაზე თვალი უნდა დავხუჭოთ?!
