კუკავამ აღნიშნა, რომ აუცილებელია შეჩერდეს რაიონების დაყოფა, რადგან ეს გამოიწვევს სახელმწიფო ბიუჯეტის ხარჯების ბიუროკრატიულ ზრდას.
“დღეისთვის გვაქვს 64 მუნიციპალიტეტი და მთავრობის გადაწყვეტილებით კიდევ უნდა მოხდეს დაყოფა და მუნიციპალიტეტების რიცხვის გაზრდა. ეს არ უნდა გადაწყდეს მელაშვილისა და ნარმანიას კაბინეტებში, საზოგადოებას უნდა ჰქონდეს არჩევანის საშუალება. ჩვენი ერთ-ერთი მოთხოვნაა შეჩერდეს რაიონების დაყოფა, რადაგან ეს გამოიწვევს სახელმწიფო ბიუჯეტის ხარჯების ბიუროკრატიულ ზრდას. თუ ახლა ერთ რაიონს ჰყავს ერთი გამგებელი, მერე ეყოლება-სამი, თუ ერთ გამგებელს ჰყავს სამი მოადგილე, მერე მათი რიცხვი გაიზრდება ცხრამდე, თუ ახლა ერთი მერსედესი ჰყავს, მერე სამ გამგებელს სამი მერსედესი მოუნდება და ეს ყველაფერი ცუდ ახასვას ჰპოვებს ბიუჯეტზე და განსაკუთრებით არჩევნების წინ”.
კუკავას განცხადებით, საჭიროა გაატარონ პირველი ეტაპი, რათა 2014 წლის არჩევნები მეტ-ნაკლებად ნორმალურ ვითარებაში ჩატარდეს და განისაზღვროს ყველა ის საკითხი, რომლის ჩამოყალიბებაც არჩევნების შემდეგ მოხდება.
“თავისუფალი საქართველოს” ლიდერი შეეხო ასოცირების ხელმოწერის თემას და მთავრობისგან ასოცირების ხელშეკრულების სრული ტექსტის გამოქვეყნება მოითხოვა.
“როგორ შეიძლება ერის არჩევანი იყოს გასაიდუმლოებული, ან რატომ უნდა გამოქვეყნდეს ხელშეკრულების ტექსტი ერთი კვირის მერე და არა თუნდაც დღეს! ვთვლი, რომ საქართველოს ევროპული არჩევანი კითხვის ნიშნის ქვეშ დგას, მაგრამ საქართველოს სწრაფვა ევროპისკენ არ ნიშნავს იმას, რომ რასაც კი ევროპელები შემოგვთავაზებენ განხილვისა და მსჯელობის გარეშე უნდა მოვაწეროთ ხელი. ველოდებით ხელშეკრულების ტექსტის გამოქვეყნებას!”
ბევრი კითხვა და შენიშვნა აქვს ადგილობრივი თვითმმართველობის კანონის ირგვლივ თბილისის საკრებულოს თავმჯდომარე ირაკლი შიხიაშვილსაც. როგორც მან დღეს ჟურნალისტებთან საუბრისას აღნიშნა, კანონპროექტი დასახვეწია და მისი აზრით ნაჩქარევი გადაწყვეტილებებია მიღებული.
“ადგილობრივი კანონის მზადების პროცესი იმ ტემპით არ მიმდინარეობს, რომელიც შეიძლება მოგწონდეს. მე, როგორც რიგით მოქალაქეს ბევრი კითხვა მაქვს როგორც თბილისთან, ასევე მთლიანად რაიონებთან მიმართებაში”.
საკრებულოს თავმჯდომარე აცხადებს, რომ სხვა რომელიმე ქვეყნის მოწყობის კალკირება ჩვენი ქვეყნისთვის მიზანშეწონილი არ არის. გასათვალისწინებელია ბევრი წინაპირობა. შიხიაშვილი არ ეთანხმება შეთავაზებულ არჩევნების 3 წლიან ვადას და ამბობს, რომ საარჩევნო 4 წელი აპრობირებულია და ასე უნდა იყოს.
“არჩევნებისთვის აპრობირებულია 4 წელი და ასე უნდა იყოს, შეთავაზებული 3 წლიანი ვადა არასაკმარისი იქნება. კიდევ ერთი საკითხი – საბჭოების შექმნა, გამოიწვევს გაუგებრობებს. სიახლოვე არ ნიშნავს მჭიდრო კავშირს. გასათვლელია რამდენად საჭირო და ეფექტური იქნება ეს ორგანო ხალხისთვის და რამდენად ექნება ხალხს სიახლოვე ამ ორგანოებთან. განსასაზღვრია მექანიკური დაყოფა გვჭირდება თუ უკვე დაყოფილის დელეგირება”.
შიხიაშვილი აცხადებს, რომ მთავარია ძალაუფლების სწორი და რაციონალური გადანაწილება.
