ოზურგეთის მუნიციპალიტეტის გამგებლის მოვალეობის შემსრულებელმა, კონსტანტინე შარაშენიძემ განაცხადა, რომ ამ ნუსხაში 20 000 000 ლარის სხვადასხვა მიმართულების პროექტი დევს და ისტორიულ მუზეუმის სრულ რემონტს დაახლოებით ამდენივე თანხა დასჭირდება.
საკრებულოს რიგგარეშე სხდომაზე კი ამ საკითხთან დაკავშირებით შემდეგი სახის პოლემიკა შედგა.
კონსტანტინე შარაშენიძე: _ ეს საკითხი მაშინ გამოგეტანათ საკრებულოზე და გეთქვათ, როდესაც იუსტიციის სახლი “დასვით” ცენტრში. არაფერი იმ შენობას არ აქვს ლამაზი.
საკრებულოს დეპუტატთა ერთი ნაწილი: _ ვინ გვკითხავს?!
კონსტანტინე შარაშენიძე: _ რომ არავინ არ გეკითხებოდათ იმას ვამბობ.
ავთანდილ მექვაბიშვილი, ოზურგეთის მუნიციპალიტეტის საკრებულოს თავმჯდომარის მოადგილე: _ იქ უნიკალური ნივთებია. სამი წლის განმავლობაში ისტორილი მუზეუმის დირექტორი ვიყავი და მე კარგად ვიცი, რა პრობლემებიც არის იქ. სამასხრო თემა ნამდვილად არ არის. ეს არის სამუშაო თემა. მეტი რა გვაქვს? გურული სიმღერები და ისტორია. რომელმა თქვენთაგანმა იცით იქ რა ნივთებია? სტუმარი, რომ ჩამოდის მუზეუმში უნდა მივიყვანოთ და არა პირდაპირ რესტორანში. სტუმარს პირდაპირ რესტორანში თუ წაიყვან, დათრვება, წავა მერე და დაავიწყდება გურია. მუზეუმი უნდა ანახო და ჩვენი ტრადიციები. აუცილებლად მოსაგვარებელი საკითხია, რადგან ეს შენობა ინგრევა და არ არის გამორიცხული, რომ მსხვერპლით დასრულდეს. ასევე ვთხოვოთ კულტურის სამინისტროს და სხვა პირებს, იმედია დაგვეხმარებიან. იმაში ვეთანხმები გამგებელს, რომ 40 თანამშრომელს, რომ შეამცირებს, იმის ხარჯზე ბევრ რამეს გააკეთებენ.
კონსტანტინე შარაშენიძის განცხადებით ამ საკითხთან დაკავშირებით აუცილებლად იმუშავებენ და არ არის გამორიცხული, რომ ისტორიული მუზეუმი სხვა ადგილას გადავიდეს.
“მუზეუმის საკითხი ყოველთვის იდგა და ყოველთვის ყბადაღებული თემა იყო სახურავი, ახლა სახურავის პრობლემა მოგვარებულია, სამი დღის წინ დასრულდა სარემონტო სამუშაოები. ჩვენ უნდა ვიფიქროთ, თვალსაჩინო ადგილზე ვნახოთ ახალი ადგილი. დამიჯერეთ, ისტორიულ მუზეუმს რომ რემონტი დასჭირდება, ამაში დიდი თანხა წავა. შესაძლებელია ასევე კულტურის ცენტრი როდესაც გადავა სოფელ ოზურგეთში, სწორედ ამ ადგილას გარემონტდეს შენობა და იქ მოხდეს ისტორიული მუზეუმის გადმოტანა. შესაძლებელია კარგი კაპიტალური რემონტი გავაკეთოთ. ერთი რამ ნათელია, რომ 20 მილიონი ლარი არ ეყოფა ისტორიული მუზეუმის შენობის გარემონტებას..” _ განაცხადა შარაშენიძემ.
თემურ მოქია, ოზურგეთის მუნიციპალიტეტის დეპუტატი: _ საერთოდ, ამ შენობას ისტორიული მუზეუმი რატომ ჰქვია ვერ გავიგე. ეს შენობა ყველაფერს გავს მუზეუმის გარდა. ან ისტორული მუზეუმი ვინ მოუფიქრა და რას ნიშნავს, იქნებ მითხრათ ვინმემ?!
