ისინი მადლობას უხდიან გულშემატკივრებს მხარდაჭერისა და ერთგული ქომაგობისთვის, თუმცა, ამდენი შეუსრულებელი დაპირების შემდეგ, “სიონთან” შეხვედრაში მონაწილეობას არ მიიღებენ. “სამწუხაროა, რომ არანაირი ხელშეწყობა არ აქვს კლუბს, რომელიც მესამე ადგილზე იმყოფება და ახლა დაშლის საფრთხის ქვეშ დგას. ჩვენ ყველაფერი გავაკეთეთ, რომ შედეგი დაგვედო და დავდეთ კიდეც, თუმცა, საპასუხოდ მხოლოდ დაპირებები მივიღეთ. ასე გაგრძელება შეუძლებელია” _ ეს “გურია ნიუსს” ფეხბურთელებმა განუცხადეს და მთელი გუნდის სახელით გვთხოვეს მათი პოზიციის დაფიქსირება.
19.10 სთ.. ჩვენ დავუკავშირდით ლანჩხუთის გამგებელ ზაზა ურუშაძეს, რომელმაც გვითხრა, რომ ბოიკოტის თაობაზე ინფორმირებული არ არის: “ვერაფერს გეტყვით, არ ვიცი… კლუბს ჰყავს დირექტორი და მან უნდა მოაგვაროს ეს საკითხი,” _ გვითხრა გამგებელმა.
19.20 სთ. ჩვენ დავუკავშირდით “გურიას” პრესსამსახურს, რომელსაც გვიან საღამოს გავრცელებულ ინფორმაციაზე ასევე არ ჰქონდა ინფორმაცია: “დღეს კლუბის ოფისში იყო შეხვედრა, სადაც შეთანხმება შედგა, რომ გუნდი თამაშზე აუცილებლად გავა. ამ საღამოს ინფორმაციას არ ვფლობთ, თქვენგან გავიგეთ,” _ გვითხრა “გურიას” მედიაოფიცერმა, ლევან გიორგაძემ.
20.00 სთ. ჩვენ დავუკავშირდით რამდენიმე ფეხბურთელს. მათ დაგვიდასტურეს ინფორმაცია. ასევე გავიგეთ, რომ კლუბის მწვრთნელი რომან პოკორა გვიან საღამოს ფეხბურთელებს შეხვდა.
შაბათი, 30 ნოემბერი. 00.05 სთ. “გურიას” პრესსამსახურიდან აცნობეს, რომ სულ მალე გაავრცელებენ ინფორმაციას შესაძლო ბოიკოტზე.
00.20 სთ. ს/კ ლანჩხუთის „გურიას“ განცხადება: ინტერნეტ სივრცეში გაჩნდა საკმაოდ არასასიამოვნო ინფორმაცია ლანჩხუთის „გურიას“ ირგვლივ, ბოლნისის “სიონთან” გასამართ თამაშთან დაკავშირებით. გვინდა გამოვეხმაუროთ აღნიშნულ ფაქტს და განვაცხადოთ: რომ კლუბის ხელმძღვანელობა მაქსიმუმს აკეთებს იმისთვის, რომ გუნდი ხვალინდელ მატჩზე გავიდეს სათამაშოდ და წარმატებული გამოსვლა გააგრძელოს საქართველოს 25-ე ეროვნულ ჩემპიონატში. ასევე გვინდა დავამშვიდოთ „გურიას“ მრავალრიცხოვანი გულშემატკივარი და პირველ რიგში მადლობა გადავუხადოთ ერთგულებისთვის და დავპირდეთ, რომ ლანჩხუთის „გურია“ არ დაიშლება და იგი კვლავ, არაერთგზის გაახარებს მათ იმ თამაშით, რომელმაც ჩემპიონატის მსვლელობაში ერთი-ორად გაზარდა ქომაგთა ინტერესი და ფეხბურთის სპეციალისტთა მოწონება დაიმსახურა.
11.00 სთ. ჯერ კიდევ არ არის გადაწყვეტილი, “გურია” მიიღებს თუ არა ბოლნისის “სიონთან” შეხვედრაში მონაწილეობას.
12.00 სთ. გამოინახა სახსრები პრემიალურის დასარიგებლად, თუმცა მიუღებელია ხელფასები. ფეხბურთელები ბოლო მომენტში დათანხმდნენ თამაშს.
სამწუხაროდ, განვითარებულმა მოვლენებმა “გურიას” თამაშზე გავლენა მოახდინა და ზედიზედ 6 “საშინაო” მოგების შემდეგ, გუნდმა პირველად წააგო ქობულეთის “ჩელე არენაზე” _ 1:2. ამით “გურიამ” მოწინავე ექვსეულში მოხვედრის შანსები ცოტათი გაირთულა. მორიგ მატჩს ლანჩხუთელები თბილისში “დინამოსთან” გამართავენ.
პ.ს. შაბათს, 14 საათზე, მივიღეთ ინფორმაცია, რომ “გურია” ხვალ, ბოლნისის “სიონთან” შეხვედრას გამართავს _ გუნდმა ეს გადაწყვეტილება “გურიას” გულშემატკივრების” თხოვნით და მამა საბას ხათრით მიიღო.
