უმცირესობის წევრ გიორგი ბარამიძის განცხადებით, საგანელიძის მიერ დასახელებული მიზეზი პოლიტიკიდან წასვლასთან დაკავშირებით არადამაჯერებელია.
“ფაქტია, რომ მიზეზი, რაც გამოცხადდა საგანელიძის წასვლასთან დაკავშირებით, არ არის დამაჯერებელი და იმედი გვაქვს, რომ საზოგადოება ამის ნამდვილ მიზეზს გაიგებს. საზოგადოებას არც ის გაუგია, რატომ მოხსნეს “ქართული ოცნების” ფრაქციის თავმჯდომარეობიდან ბატონი ქუცნაშვილი. ყოველ შემთხვევაში, ამის შესახებ არავის არავითარი განმარტება არ გაუკეთებია. ეს საკითხიც გაურკვეველი დარჩა ისევე, როგორც ის, თუ რა პროცესები მიდის რეალურად “ქართული ოცნების” შიგნით. ამ კოალიციის თითოეული კანდიდატი გაკვირვებას იწვევს, რადგანაც ისინი შეუსაბამო არიან თავიანთ პოზიციებთან და აქედან გამომდინარე ბევრი კითხვის ნიშანი ჩნდება. “ქართული ოცნება” არ არის იდეებით გაერთიანებული ძალა. იქ არიან პოლიტიკოსები, რომლებიც დიამეტრულად განსხვავებული შეხედულებების არიან. ერთი არის გამოკვეთილად პროდასავლური, მეორე საპარალამენტო ტრიბუნიდანაც კი არ მალავს, რომ განიხილავს ევრაზიული კავშირის მიმართულებით საქართველოს ნაბიჯების გადადგმას. ვფიქრიბ, ასეთი ეკლექტური მიმართულებით პოლიტიკაში დიდი დრო არ უწერიათ”.
ექსპერტ გია ნოდიას თქმით, ეს პირველი შემთხვევა არ არის და საგანელიძეს აქვს პოლიტიკიდან წასვლის გამოცდილება.
“საგანელიძეს აქვს პოლიტიკიდან წასვლის და ბიზნესში დაბრუნების გამოცდილება. ერთხელ მან ეს უკვე გააკეთა და “ახალი მემარჯვენეები” დატოვა. თუ ივანიშვილი მართლა წავიდა პოლიტიკიდან და ის გამაერთიანებელი ძალა აღარ იქნება, მაშინ რთული იქნება კოალიციის შენარჩუნება და შესაძლებელია საგანელიძე პირველი მერცხალი იყოს”.
დავით საგანელიძის პოლიტიკიდან შესაძლო წასვლას გამოეხმაურა უმრავლესობის წევრი ზურაბ ტყემალაძე და ჟურნალისტებთან საუბრისას განაცხადა, რომ ამ სურვილის შესახებ საგანელიძემ ჯერ კიდევ საპრეზიდენტო არჩევნების შემდეგ ისაუბრა.
“დავით საგანელიძემ პოლიტიკიდან წასვლის და ბიზნესში დაბრუნების შესახებ საპრეზიდენტო არჩევნების შემდეგ გამართულ შემაჯამებელ შეხვედრაზე ისაუბრა, რომელსაც ბიძინა ივანიშვილი და გიორგი მარგველაშვილიც ესწრებოდნენ. ბატონმა ბიძინამ მადლობა გადაუხადა გაწეული საქმიანობისთვის”.
პარლამენტის ვიცე-სპიკერი ზვიად ძიძიგური კი აცხადებს, რომ საგანელიძე არსად არ მიდის.
“ასეთი ვარაუდი დათოს ბოლო ორი წლის განმავლობაში რამდენჯერემ გამოუთქვამს, ერთ-ერთი ასეთი ვარაუდი მივიდა ჟურნალსიტების ყურამდე და დაიწყო რაღაც სქემების აგება, რომ აი დაიშალა უმრავლესობა, საგანელიძე მიდის და.ა.შ. ჩემი აზრით, დათო არსადაც არ მიდის.
დათო იყო გიორგი მარგველაშვილის შტაბის უფროსი და ღებულობიდა ისეთ გადაწყვეტილებებს, რომელიც საჭირო იყო საარჩევნო გარემოსთვის. ასე რომ, ვითომდა უმრავლესობა იშლება, კოალიციაში პრობლემებია და დაერივნენ ერთმანეთსო რეალობას მოკლებულია”.
თავად დავით საგანელიძე აცხადებს, რომ არანაირი გადაწყვეტილება არ აქვს მიღებული და არც თარიღის კონკრეტიკაზე ყოფილა ლაპარაკი. მისი განცხადებით არაა გამორიცხული გადაიფიქროს და დარჩეს პოლიტიკაში.
“მე საპრეზიდენტო არჩევნების შემდეგ კოალიციის ლიდერებთან ერთ-ერთ არაოფიციალურ შეხვედრაზე განვაცხადე, რომ შესაძლებელია ვიფიქრო პარლამენტიდან წასვლაზე და ბიზნესის სფეროში დაბრუნებაზე, თუმცა რაიმე კონკრეტულ თარიღზე საუბარი არ ყოფილა და არ არის გამორიცხული ეს მოხდეს საპარლამენტო ვადის ამოწურვის შემდეგ. გიდასტურებთ, რომ ამაზე ვფიქრობ, მაგრამ კონკრეტული გადაწყვეტილება არ მიმიღია. მეოთხე მოწვევის დეპუტატი ვარ, პოლიტიკაში ყოფნის 15 წლის მანძილზე ბოლო წლის გარდა, სულ ოპოზიციაში ვიყავი, ჩემი მთავარი ამოცანა იყო ქვეყანა გამოსულიყო იმ მძიმე მდგომარეობიდან, საითკენაც წინა ძალადობრივი ხელისუფლებები მიაქანებდათ. ამაყი ვარ იმით, რომ ჩემი მოკრძალებული წვლილი შევიტანე იმ დიდ გამარჯვებაში, რასაც ქართველმა ხალხმა ერთი წლის წინ მიაღწია ბიძინა ივანიშვილის ხელმძღვანელობით.თუ პოლიტიკიდან რომელიმე სფეროში გადავინაცვლებ ეს იქნება ჩემი მხრიდან კარგად აწონილ-დაწონილი გადაწყვეტილება და მე ყოვლთვის ვიქნები იქ, სადაც უფრო მეტად გამოვადგები ჩემს სამშობლოს, ჩემს ხალხს და ოჯახს, თუმცა ამ ეტაპზე მინდა დავარწმუნო ჩემი ამომრჩეველი და გულშემატკივარი, რომ ჯერ -ჯერობით არსად წასვლას არ ვაპირებ”.
