მას შემდეგ ის სხვადასხვა ინსტანციებში ეძებდა სამართალს, ითხოვდა სოციალური სააგენტოდან პასუხს, რის საფუძველზე მოეხსნა პენსიონერ შეზღუდული შესაძლებლობების მქონე, ეკონომიურად სიღარიბის ზღვარს ქვემოთ მყოფ პირს დახმარება, მაგრამ ამაოდ _ პასუხს ვერსად ვერ პოულობდა.
იურისტის ია მემარნიშვილის თქმით, ბეჟან ირემაძემ დახმარებისთვის სასჯელაღსრულების, პრობაციისა და იურიდიული დახმარების საკითხთა სამინისტროს იურიდიული დახმარების სამსახურს მიმართა.
2013 წლის 31 ოქტომბერს ოზურგეთის რაიონული სასამართლოს მოსამართლემ გიორგი ზვიადაძემ გადაწყვიტა, რომ მოსარჩელე ბეჟან ირემაძის სარჩელი მოპასუხე სოციალური მომსახურების სააგენტოს ოზურგეთის რაიონული განყოფილების მიმართ დაკმაყოფილდეს; სოციალური მომსახურების სააგენტოს ოზურგეთის განყოფილებას კი დაევალოს გადაწყვეტილების სამოტივაციო ნაწილში მითითებული გარემოებების შესწავლის შემდეგ, გამოსცეს ინდივიდუალური ადმინისტრაციულ-სამართლებრივი აქტი ბეჟან ირემაძის მიმართ შეწყვეტილი შემწეობის (სოციალური დახმარების) ანაზღაურების თაობაზე.
_ ვცდილობდი, სასამართლოს გარეშე, მიმართვით გამერკვია სიტუაცია მაგრამ, უშედეგოდ _ კონკრეტულ პასუხს ,თუ რატომ მოხდა ბეჟან ირემაძის ოჯახის ხელმეორე გადამოწმება, ვერავინ მაძლევდა, _ ამბობს მემარნიშვილი “გურია ნიუსთან”.
_ ქვეყანაში სიღატაკის დონის შემცირებისა და მოსახლეობის სოციალური დაცვის სრულყოფის ღონისძიებათა შესახებ საქართველოს მთავრობის 2010 წლის 24 აპრილის #126 დადგენილების თანახმად, სააგენტო უფლებამოსილია მიღებული ან აღმოჩენილი ინფორმაციის საფუძველზე, რომელიც უკავშირდება მონაცემთა ბაზაში რეგისტრირებული ოჯახის სოციალურ ეკონომიური მდგომარეობის არსებით შეცვლას ან ოჯახის წევრის მიერ არასწორი ინფორმაციის მიწოდებას, მიიღოს გადაწყვეტილება სარეიტინგო ქულის არსებული წესით შეცვლაზე, რაც ეცნობება დაინტერესებულ მხარეს. სოციალური მომსახურების სააგენტოს დადასტურებული ინფორმაციის საფუძველზე მიღებული ან აღმოჩენილი გამოვლენილი გარემოება, რომელიც უკავშირდება მონაცემთა ბაზაში რეგისტრირებული ოჯახის, ამ შემთხვევაში ბეჟან ირემაძის ოჯახის სოციალურად ეკონომიკური მდგომარეობის არსებით შეცვლას ან ოჯახის წევრის (უფლებამოსილი პირის) მიერ არასწორი მონაცემის მიწოდების დახმარების შეწყვეტის მომენტისათვის, არ არსებობდა. ბეჟან ირემაძეს გააჩნდა შესაბამისი სარეიტინგო ქულა, რომლის არასწორად მიჩნევის ან შეცვლის დადასტურებული საფუძველი ადმინისტრაციული წარმოებისას არ გამოვლენილა.
კანონის თანახმად, სოცაგანტები ოჯახის მდგომარეობის გადამოწმებას უნდა ახდენდნენ ზემოთ ჩამოთვლილი გარემოების არსებობისას.
საბოლოოდ, მოქალაქესთან ერთად, მივიღეთ გადაწყვეტილება, მიგვემართა სასამართლოსთვის. ოზურგეთის რაიონულმა სასამართლომ მიიღო კანონიერი და სამართლიანი გადაწყვეტილება. ასეთი პრეცედენტის შექმნა მისასალმებელია, რადგან ბევრი სოციალურად დაუცველი ოჯახია მსგავსს სიტუაციაში, მაგრამ თავს იკავებენ სასამართლოსთვის მიმართვისგან. იმედია, ამიერიდან ბევრი მათგანი შეეცდება სამართლებრივი გზით თავიანთი პრობლემის გადაჭრას.
რაიონული სასამართლოს გადაწყვეტილება 14 დღის ვადაში შევა კანონიერ ძალაში, თუ მას მხარეები არ გაასაჩივრებენ, _ ამბობს ია მემარნიშვილი.
