თანაც პრემიალურის ნაწილიც გაუსტუმრეს. შაბათის თამაშის შემდეგ “გურიის” მოთამაშეებმა გრიგოლეთი დატოვეს და სახლებს მიაშურეს. არადა, 4 დეკემბერს მატჩი აქვთ თბილისში “დინამოსთან”.
ჩვენ მიერ მოპოვებული ინფორმაციით, გუნდი დატოვა უკრაინელმა მთავარმა მწვრთნელმა, რომან პოკორამ. თუმცა ინფორმაცია ოფიციალურად არ დაგვიდასტურეს.
“ბატონი რომანი უკრაინაში პრო-ლიცენზიის გასახანგრძლივებად გაემგზავრა და როგორც ვიცი, უკვე საქართველოსკენ მოფრინავს. რაც შეეხება ფეხბურთელებს, როგორც იცით, საწვრთნელი პროცესი შეჩერებულია. კლუბის წარმომადგენლები ორშაბათს თბილისში მიემგზავრებიან და ფეხბურთელებს დაელაპარაკებიან. თამაში “დინამოსთან”, ალბათ, აუცილებლად შედგება _ საკითხავია, ძირითადი გუნდი ითამაშებს თუ არა? რა თქმა უნდა, ჩვენი სურვილია, მოლაპარაკება შედეგიანი აღმოჩნდეს და მთავარმა გუნდმა ითამაშოს. ესაა, რომ ერთი დღე დაგვრჩა სავარჯიშოდ. თუ ყველაფერი კარგად გადაწყდა, ფეხბურთელები თბილისში არიან, აქედანაც წავალთ ნაწილი ფეხბურთელებისა და სამწვრთნელო შტაბი” _ გვითხრა კლუბის წარმომადგენელმა.
ორშაბათის გვიან საღამომდე “გურიის” მესვეურებს იმედი ჰქონდათ, რომ ფეხბურთელთა დაყოლიებას შეძლებდნენ. კლუბის დირექტორმა მათთან საკრებულოს თავმჯდომარის საგარანტიო წერილები ჩაიტანა. მოლაპარაკებამ თითქმის გამთენიამდე გასტანა, თუმცა უშედეგოდ დასრულდა _ მოთამაშეებმა უარი თქვეს “დინამოს” წინააღმდეგ თამაშზე.
სწორედ ამის შემდეგ დადგა დღის წესრიგში თბილისში დუბლშემადგენლობის გამგზავრება. თუმცა ამასაც გაურკვევლობა და როგორც ამბობენ, შეხლა-შემოხლაც მოჰყოლია _ დუბლშემადგენლობის ნაწილი მთავარი გუნდის სოლიდარობის მომხრე იყო, თუმცა საბოლოოდ, მეორე გუნდი თამაშზე გაემგზავრა.
ჩვენი ინფორმაციით, უკრაინელ სპეციალისტს რომან პოკორას გუნდიდან უშვებენ, თუმცა ამის შესახებ ჯერ ოფიციალური კომენტარი არ კეთდება. კლუბში მისით უკმაყოფილოები ყოფილან (?!), რაც ცოტა გასაკვირიც კი არის _ “გურია” გაფიცვებამდე საუცხოოდ თამაშობდა. როგორც კულუარებში აცხადებენ, პოკორა ზაზა ურუშაძემ მოიწვია. თუ გახსოვთ, წარმატებები ჰქონდა დავით მახარაძეს და მისი შეცვლა არაკორექტულად გამოუვიდათ. კლუბის დღევანდელ მმართველებს კი, იმავე ხმების თანახმად, ურუშაძესთან ურთიერთობა დაეძაბა და უკრაინელის გაშვებაც ამიტომ გადაწყვეტილა. თავად ურუშაძე ჩვენთან საუბარში ამბობს, რომ ასეთ ინფორმაციას არ ფლობს.
როგორც გავიგეთ, “დინამოსთან” “გურიას” მთავარი გუნდის სამწვრთნელო შტაბიც არ გაიყვანს. ჩვენ რომან პოკორას თანაშემწეს დავით მახარაძეს შევეხმიანეთ:
_ როგორც იცით, დუბლშემადგენლობა უკვე გაემგზავრა. მთავარია, შეხვედრა შედგეს, რომ არ მოგვხსნან გათამაშებიდან.
_ თქვენ გუნდთან ერთად ხართ?
_ არა, კლუბის წარმომადგენლებმა მითხრეს, წავსულიყავი თამაშზე, არ მაქვს ამის პრობლემაც, მაგრამ წესია, რომ თუ გადის დუბლშემადგენლობა, ის მისმა მწვრთნელებმა უნდა გაიყვანოს.
_ უკვე ორი დღეა, საუბრობენ, რომ რომან პოკორა გუნდიდან გაუშვეს.
_ არაფერი მსგავსი არ გამიგია. მე დღეს ვესაუბრე მას ტელეფონით, მოფრინავს, გზაშია და ხვალ დილით თბილისში იქნება. ის თამაშზეც მივა.
_ თუმცა, ირწმუნებიან, რომ ბატონი პოკორა დათხოვნილია…
_ მას საუბრისას არაფერი მსგავსი არ გამოუმჟღავნებია. თუ რაიმე ცვლილება ხდება, მას ხომ ეტყოდნენ?!
_ ასე თქვენც ჟურნალისტებიდან გაიგეთ, რომ უკრაინელი გცვლიდათ…
_ კი, ბატონო, ასე იყო, მაგრამ ვთვლი, რომ ეს კლუბის მხრიდან იყო შეცდომა. დარწმუნებული ვარ, იგივე არ განმეორდება.
ჩვენ ლანჩხუთის მაჟორიტარ თემურ ჩხაიძესთან დაკავშირებაც ვცადეთ, მაგრამ მან ჩვენს ზარებს არ უპასუხა.
