უკვე რამდენიმე დღეა, დაბა ჩოხატაურის მოსახლეობაში მითქმა-მოთქმაა ატეხილი. როგორც ამბობენ, სოციალური დახმარების პროგრამა შეჩერებულია, რის გამოც, მოქალაქეები აღშფოთებას ვერ მალავენ. გადავწყვიტეთ, რამდენიმე რესპონდენტს გავსაუბრებოდით.
45 წლის ქალბატონი: _ ამბობენ, სოციალური დახმარება შეჩერდაო. ისედაც გაჭირვებულ ხალხს, კიდევ უფრო უჭირვებენ ცხოვრებას. 30 ლარი შეჭირვებული ოჯახისთვის ცოტა ნამდვილად არაა.
50 წლის ქალბატონი: _ ეს ინფორმაცია გავრცელდა და მართლა რომ მოიხსნას დახმარება, გაგიჟდება ხალხი, ისედაც გაგიჟებულები ვართ ამ ცხოვრებით.
60 წლის მამაკაცი: _ როგორ გამოგვაცალონ ლუკმა პირიდან, იმას ფიქრობენ სულ. მაგი თუ გააკეთა ჩვენმა მთავრობამ, ბევრს დაკარგავენ არჩევნებისთვის, ამას არ შეურიგდება საზოგადოება.
70 წლის ქალბატონი: _ მაი დახმარება რომ მეიხსნას, რა ვუყო მერე ჩემ სამ შვილიშვილს, რა ვაჭამო?! სკოლის ბაღნები არიან. მაგითი გვიდგას სული პირში. შვილი და რძალი არ მუშაობენ, მარტო ჩემი პენსიის და დახმარების იმედად ვართ. 87 ლარი პენსია მაქვს, 140 ლარს ვიღებთ დახმარებას. აი ფული, ნენა, მარტო საჭმელს უნდა. დახმარება რომ მოგვიხსნან, ამოგვხდება სული”.
56 წლის მამაკაცი: _ გავიგე სოციალური დახმარება ჩერდებაო, მეუღლე ლაპარაკობდა წუხელ სახლში; მე სულ არ მაქვს, ბიძია, დახმარება, განცხადება დავწერე და იყვნენ შემოწმებაზე, მერე ისეთი მაღალი ქულა მომივიდა, მე თვითონ დავრჩი გაკვირვებული. რა მჭირს დასახმარებელი-მეთქი, გავიფიქრე. ისეთი ადამიანები იღებენ დახმარებას, ვინც ჩემზე და ბევრზე კარგად ცხოვრობენ.
47 წლის ქალბატონი: _ ამის შესახებ არაფერი გამიგია, თუ სიმართლეა, ძალიან ცუდია. იმის მაგივრად, რომ ხალხს მიეხმარონ, პირიქით ხდება _ ლუკმას აცლიან.
75 წლის ქალბატონი: _ კი გევიგე რაცხა, ბებია, ქალები ლაპარაკობდნენ. მე მარტოხელა ქალი ვარ. დახმარება სულ არ მაქვს, არ დამინიშნეს. ალბათ, იფიქრეს, მარტოა და თავისი პენსიაც ეყოფაო.
67 წლის მამაკაცი: _ ალბათ, პენსიას რომ გვიმატებენ, იმიტომ წყდება დახმარება; რა გამოდის, გვიმატებენ 10 ლარს და გვაკლებენ _ 20-ს?! ვინ რას გააკეთებს გლეხების სასარგებლოდ.
ამ ინფორმაციის გადამოწმება ვცადეთ ჩოხატაურის მუნიციპალიტეტის სოციალური დახმარების ფონდში, სადაც გვითხრეს, რომ მსგავსი რამ პირველად ესმით და ინფორმაციას სოციალური დახმარების შეჩერების თაობაზე, არ ადასტურებენ.
