ბოლო დროის საქართველოს #1 ფეხბურთელი კახა კალაძეა. ქართველი ვარსკვლავი არა მარტო საქართველოშია პოპულარული. კახა კარგადაც თამაშობს და ფეხბურთს გარეთაც პოპულარული ადამიანია _ ის იტალიაში ჯორჯო არმანის ჩვენებაში მონაწილეობს, შუაგულ მილანში საკუთარი რესტორანი აქვს, საქართველოში კი გამოკითხვის შედეგად ქალთა უმრავლესობამ 8 მარტის გატარება მიხეილ სააკაშვილის შემდეგ, სწორედ მასთან ისურვა. მართალია, პრეზიდენტთან მეგობრობდა, მაგრამ რაც ხელისუფლებას შენიშვნები ღიად მისცა, ბიზნესში პრობლემები შეექმნა. კახა ხმაურიან განცხადებებსაც არ ერიდება და ყოველთვის გმობს ძალადობას. კალაძე ნაკრების ერთადერთ წევრია, რომელმაც გაბედა და გიორგი დემეტრაძეს მხარდაჭერა გამოუცხადა.
კახა მეზობელ სამტრედიაში დაიბადა და გაიზარდა. ბევრს არ ეცოდინება, რომ იგი “გურიაში” არ მიიღეს და დაიწუნეს. კახა 16 წლისაც არ იყო, როცა მშობლიური “სამტრედიიდან” გამოუშვეს _ მაშინ მას გასახდელში ცრემლებიც წამოსვლია და ფეხბურთს მაინც ვითამაშებო, უთქვამს. სამტრედიიდან მამას, კარლო კალაძეს ვაჟი “გურიაში” მიუყვანია, ოღონდ ძირითადში დაყენებას ითხოვდა. ლანჩხუთის კლუბი ამ დროს კარგი თამაშით არ გამოირჩეოდა, მაგრამ კახა არ მიუღიათ. სხვათა შორის, გასაკვირი ეს სულაც არ არის _ 15-16 წლის ბიჭი ჯერ კიდევ ვერ დატოვებდა კარგ შთაბეჭდილებას, მით უმეტეს, ბევრი ამბობს, რომ მას ბავშვობაში დიდი ტალანტი არ ეტყობოდა და ყველაფერს დიდი შრომის ფასად მიაღწია. ისედაც, “გურიაში” მისი დაწუნება გასაკვირი სულაც არ არის _ ცნობილი ამბავია, რომ თითქმის იმავე პერიოდში დათო კვირკველიაც დაიწუნეს, რომელსაც სპეციალისტები თავიდანვე დიდ მომავალს უწინასწარმეტყველებდნენ. დღეს “კვირკვე” კალაძის მხარდამხარ ეროვნული ნაკრების ღირსებას იცავს.
ჰოდა, ისე მოხდა, რომ მამამ კახა თბილისის “დინამოში” მიიყვანა. “დინამოში” ის თადარიგში იყო თავიდან, მაგრამ დავით ყიფიანი ენდო და დღეს კალაძე მარტო საქართველოს კი არა ევროპის ერთ-ერთი გამორჩეული მცველია. დღევანდელი გადასახედიდან, როგორც კალაძემ, ასევე კვირკველიამ მადლობაც კი უნდა გადაუხადონ იმ ადამიანებს, რომლებმაც ისინი “გურიაში” დაიწუნეს. სხვა შემთხვევაში, გაცილებით ნაკლები შანსი იყო მათ ასეთი კარიერა ჰქონოდათ. ხუმრობა იქით იყოს და კახასა და დათოს წარმატება “გურიიდან” რომ დაწყებულიყო, ეს კლუბის რეკლამის თვალსაზრისით ძალიან კარგი საქმე იქნებოდა.
“კვირკვეს” ჩვენთან საუბარში არ დაუმალავს, რომ “გურიაში” დაიწუნეს და 18 კაცში ვერ მოხვდა. “კალაძის საქმეზე” ბევრს დავეკითხეთ: “არა, ასეთი რამ არ ყოფილა. თუ მწვრთნელს მამამ სთხოვა და უარი მიიღო, ეგ არ ვიცი და სინჯებზე არ კახა არ ყოფილა,” _ გვითხრეს რესპონდენტებმა.
ჩვენ კახა კალაძესთან დაკავშირება მისი პრეს-შეფის, ოთარ ჩრდილელის დახმარებით მოვახერხეთ:
_ კახა, გამარჯობა, როგორ ხართ?
_ კარგად, თქვენ ხომ კარგად?
_ გმადლობთ. ერთი ინფორმაციის დასაზუსტებლად გირეკავთ _ კარიერის დასაწყისში “გურიასთან” ხომ არ ყოფილხართ დაკავშირებული?
_ ნუ, “გურიაში” არ მითამაშია, თუმცა, გავლით ვიყავი.
_ რა მოხდა, რატომ არ დარჩით?
_ უბრალოდ, არ მოხერხდა შეთანხმება.
