კვირიკაშვილის განმარტებით, პრემიერიმა შექმნა ეკონომიკური საბჭო, რომელთან ერთადაც იმუშავებს საკოორდინაციო ჯგუფი. როგორც ეკონომიკის მინისტრმა აღნიშნა, ეს ჯგუფი გაუწევს ორგანიზებას გზამკვლევის აღსრულების ნაწილს.
“გზამკვლევი ეხება რეფორმებს ბევრ სფეროში, მათ შორის არის ხარისხის ინფრასტრუქტურის შექმნა, ურთიერთაღიარების მექანიზმების შექმნა, კანომდებლობა სურსათის უვნებლობისა და კონკურენციის ნაწილში და ა.შ. ჩვენ გვექნება ძალიან დატვირთული 9-10 თვე, რომლის განმავლობაშიც დიდი სამუშაო უნდა შევასრულოთ”, _ განაცხადა გიორგი კვირიკაშვილმა.
ეკონომიკის მინისტრის განმარტებით, საუბარია საქონლის, მომსახურების და კაპიტალის გადაადგილების ლიბერალიზაციაზე, რასაც საქართველოს ეკონომიკაზე ძალიან დადებითი შედეგი ექნება.
“საუბარია იმაზე, რომ მოხდეს კომპეტენციის აღიარება და ქართველმა პროფესიონალებმა თავისუფლად მიაწოდონ სერვისები ევროპულ ქვეყნებს. ასევე საუბარია იმაზე, რომ ევროპულ ქვეყნებში სახელმწიფო შესყიდვებში მონაწილეობა მიიღონ ქართულმა კომპანიებმა და შეძლონ საქონლისა და სერვისების შეთავაზება. ჩვენ გველოდება მრავლისმომცველი და ტექნიკურად დატვირთული სამუშაო, რომელსაც აუცილებლად წარმატებით დავასრულებთ”, _ აღნიშნა გიორგი კვირიკაშვილმა.
