ამ დრომდე ასობით ოჯახს არ მიეწოდება ელექტროენერგია. განსაკუთრებით მძიმე მდგომარეობაშია მაღალმთიანი სოფლები, სადაც ამ დრომდე გაუწმენდავია ცენტრალური გზები.
_ იქნებ მიაწვდინოთ ხელისუფლებას ხმა. არც დენი გვაქვს და არც გზა. ორი დღეა ასეთ მდგომარეობაში ვართ. ის მაინც გაგვაგებინონ 21-ე საუკუნე თუა ჩოხატაურის ხელისუფლების კალენდარზე, _ აღნიშნავენ “გურია ნიუსთან” საუბრისას ჩოხატაურის მუნიციპალიტეტის სოფელ სურების მაცხოვრებლები.
ანალოგიური მდგომარეობაა სოფელ ზოტში, შუა ამაღლებაში, ქვენობანში, ხიდისთავში, ზემოხეთში, ნაბეღლავში. როგორც “გურია ნიუსის” რედაქციაში შემოსული სატალეფონო ზარებიდან ირკვევა, ჩოხატაურის მუნიციპალიტეტის სოფლების 90%-ს ელექტროენერგია არ მიეწოდება.
“ენერგო პრო ჯორჯიას” ჩოხატაურის სერვისცენტრის ხელმძღვანელის, ვანო ჭარბაძის თქმით, ამის მიზეზი გაუწმენდავი გზებია:
_ რა ვქნათ, რასაც ვაკეთებთ, ვაკეთებთ და ფიზიკურად ვერ მივდივართ სხვაგან, _ გვითხრა ჭარბაძემ.
_ უგზოობის გამო ვერ ხერხდება ელექტროენერგიის ჩართვა სოფლებში?
_ დიახ, ასეა. თანაც ერთი ავტომანქანით ვმოძრაობთ.
_ ბატონო ვანო, უფრო რომ დავაკონკრეტოთ, სოფლებში გზები არ არის გაწმენდილი და ამის გამო ვერ ახერხებთ მუშაობას თუ სხვა პრობლემებიც არის?
_ სადაც მიდის ჩვენი მანქანა იქ ვრთავთ დენს და თავს ზევით ძალა არ არის. მისასვლელი სადაც არის იქ აღდგენილია. მაღალმთიან სოფლებში ნამდვილად ვერ ავდივართ.
_ ბატონო ვანო, მაგალითად, შუა ამაღლება მაღალმთიანი სოფელი არ არის, თუმცა, შუქი არც იქაა…
_ გუშინ აღვადგინეთ შუა ამაღლებაში ელექტროენერგია. რამდენიმე ადგილი დარჩა. ერთი მანქანით ყველგან ვერ მივალთ. ერთი “ნივის” მეტი არ გვყავს, _ დაგვიკონკრეტა ჭარბაძემ.
ჩოხატაურის მუნიციპალიტეტის გამგებლის მოვალეობის შესრულებლის, თამაზ ჯინჭარაძის თქმით გზები თითქმის ყველა სოფელში გაწმენდილია.
_ ბატონო თამაზ, “ენერგო პრო ჯორჯიაში” ამბობენ, რომ სოფლებში, ელექტროენერგიის აღდგენა გაუწმენდავი გზების გამო ვერ ხერხდება…
_ აბსულუტურად ყველა სოფელშია გზა გაწმენდილი. ბუკნარი დარჩა გუშინ, რომელიც ამ წუთებში იწმინდება. დარჩენილია სურების ზოლი, რომელსაც ზევიდან მოყვებიან. ახლა აიტანეს საწვავი. რომელ სოფელში ვერ მიდიან მე არ ვიცი, გზა აბსულუტურად ყველგან გაწმენდილია (?!).
_ ზოტში რა ხდება? გვეუბნებიან, რომ გზა იქაც არ არის გაწმენდილი…
_ ზოტი გუშინ გაიწმინდა. თუმცა, წუხანდელი თოვის შედეგად ისევ გასაწმენდია და უკვე იწყებენ მუშაობს. რას ჰქვია შუქის გასაკეთებლად ვერ მიდიან?! თქვან სად აქვთ პრობლემა. გზა ყველგანაა გაწმენდილი. ერთ-ორ საათში ყველა სოფლის გზა სრულად გაიწმინდება. აქვე გეტყვით, რომ შუქთან დაკავშირებით პრობლემები მთელ დასავლეთ საქართველოშია.
_ ეგ ვიცით, თუმცა, “ენერგო პრო ჯორჯიაში” აკონკრეტებენ, რომ ჩოხატაურის სოფლებში ელექტროენერგიის აღდგენა უგზოობის გამო ვერ ხერხდება…
_ თუკი ათ სოფელშია შუქის პრობლემა, ხუთ სოფელში შეუძლიათ დაიწყონ. მაინდამაინც ზოტიდან თუ უნდათ დაწყება არ ვიცი. გოგოლესუბნიდან დაიწყონ, _ გვითხრა ჯინჭარაძემ.
აღსანიშნავია, რომ გამგებლის მოვალეობის შემსრულებლის კომენტარს, რომლის თანახამად გზები ყველა სოფელში გაწმენდილია, მოსახლეობა უარყოფს. უფრო მეტიც, როგორც სოფელ ზემოხეთის მაცხოვრებლებმა გვითხრეს, სოფელში ტრაქტორი საერთოდ არ ასულა:
_ რა გაწმენდაზე საუბრობენ. ტრაქტორი თვალით არ გვინახავს. სახლებიდან ვერ გამოდის ხალხი. გზაზე ხეებია წაქცეული და მისი აღებაც ვერ მოახერხეს, _ ამბობენ “გურია ნიუსთან” სატელეფონო საუბარში ზემოხეთელები.
