სამართლიანობის აღდგენის მოთხოვნით ხვალ პარლამენტის შენობასთან საპროტესტო აქციებს იწყებს “თავისუფალი საქართველო”. პარტიის ლიდერ კახა კუკავას განცხადებით, უსამართლოდ დაჩაგრულები დღეს აღარავის სჭირდება და ხელისუფლება შეგნებულად არიდებს თავს ხარვეზების დამდგენი კომისიის შექმნას.
“საუბარი იმაზე, რომ მართლმსაჯულების ხარვეზების დამგენი კომისიის შექმნას ხელს უშლიდა ფინანსები, აბსურდია. საქართველოს მთავრობამ 600 მილიონი სესხის სახით აიღო. ეს სესხი მოხმარდება ძალოვანი სტრუქტურების და პრეზიდენტის ხელფასის ზრდას, ვალი სწორედ ამისთვის აიღეს. რეპრესირებულებსა და დაზარალებულებს კი, რომლებიც კუთვნილი ქონების დაბრუნებას ითხოვენ, ამაზე სახელმწიფო დღემდე უარს აცხადებს. “ქართული ოცნება” ფეხებზე იკიდებს მთავრ ვალდებულებას და დაპირებას – აღადგინოს სამართლიანობა, ან როგორ უნდა გააკეთოს ეს, როცა დღევანდელი ხელისუფლება შეეზარდა კრიმინალურ, კორუმპირებულ ოლიგარქიას, რომელიც განაგებდა “ნაციონალური მოძრაობის” დროს ამ ბიზნესს. მე შემიძლია გვარები დაგისახელოთ. ვისთვის უნდა აღადგინოს ხელისუფლებამ სამართლიანობა როდესაც ბეჟუაშვილმა დატოვა “ნაციონალური მოძრაობა” და შეუერთდა “ქართულ ოცნებას,” იგივე გააკეთა გოგი ლიპარტელიანმა. მთელი ის ოლიგარქია, რომელსაც „ქართული ოცნება” და მთელი ოპოზიციური ფლანგი ვუწოდებდით, რომ ეს არის “ნაციონალური მოძრაობის” და კეზერაშვილის მიერ ხელდასმული ბიზნესი”.
კუკავას განცხადებით, აქციის მთავარი გზავნილია სამართლიანობის აღდგენა და დასძენს, რომ ასეთი საპროტესტო აქციები მომავალში კომერციული ბანკების მიერ დაზარალებული მოსახლეობის მონაწილეობითაც გაიმართება.
“ლეიბორისტული პარტიის” წევრი გიორგი გუგავა კი ამ ხელისუფლების პერიოდში სამართლიანობის აღდგენას შეუძლებლად მიიჩნევს და აცხადებს, რომ ეს იგივეა, კედელს შეყრილი ფეტვის შეკავება მოსთხოვოს ვინმემ.
“თუ არ შეიცვლება ხელისუფლება, არ შეიცვლება რეჟიმი, არანაირი სამართლიანობის აღდგენა არ იქნება, ეს იგივეა კედელს ცერცვი შევაყაროთ და გვჯეროდეს, რომ ეს ცერცვი კედელზე გაჩერდება. როგორც პილატემ დაიბანა ხელი, ისე დაიბანა ხელი ამ ხელისუფლებამ და ხალხს განუცხადა, სამართალი თქვენთვის პურს არ სჭამსო”.
მართლმსაჯულების ხარვეზების დამდგენი კომისიის შექმნას მოითხოვს “მარო მაყაშვილის ქალთა საზოგადოებაც”, წინააღმდეგ შემთხვევაში პერმანენტული აქციების ჩატარებას გეგმავს. როგორ საზოგადოების წარმომადგენელი, ლიკა გამრეკელი ამბობს, ორგანიზაცია სამართლიანობის აღდგენის მოთხოვნით დაგეგმილ აქციას უერთდება და ხელისუფლებას მოუწოდებს წინასაარჩევნო დაპირებების შესრულებას.
“ჩვენ, წარმოდგენილმა არასამთავრობო ორგანიზაციებმა, გადავწყვიტთ შევუერთდეთ აქციას, რომელიც ხვალ გაიმართება და რომლის ძირითადი მოთხოვნა იქნება მართლმსაჯულების ხარვეზების დამდგენი კომისიის შექმნა. ამაზე უარის თქმით ხელისუფლებამ იმედი გაუცრუა უამრავ პატიმარს და დაუკარგა რწმენა ხალხს, რომ ამ ხელისუფლების პირობებში სამართლიანობის აღგენისკენ ერთი ნაბიჯი მაინც გადაიდგმებოდა. თუ ხელისუფლება არ შეცვლის საკუთარ გადაწყვეტილებას კომისიის შექმნასთან დაკავშირებით, მაშინ აქციები პერმანენტული გახდება და ვადამდელი საპარლამენტო არჩევნების ჩატარების მოთხოვნით ჩვენ გამოსვლებს გავაგრძელებთ. მოვუწოდებთ ხელისუფლებას დაიცვას საკუთარი, ქართველი ერის ღირსება და გაასამართლოს დამნაშვე რეჟიმი, რომელმაც ამ 9 წლის განმავლობაში ძაძებით შემოსა საქართველო. მერწმუნეთ, თუ თქვენ არ გამოიჩენთ შნოს და უნარს ქართველი ერის წინაშე, ქართველი ხალხი არავის შეარჩენს ღირსების აყრას”.
ხვალ 13 საათზე აშშ-ს საელჩოსთან საპროტესტო აქციას აწყობს “იბერიულ-კავკასიური საზოგადოება”. საინიციატივო ჯგუფის წარმომადგენელთა განცხადებით ეს იქნება აქცია-პერფომანსი, სადაც მიტანილი იქნება მიხეილ სააკაშვილის ჩუჩელა.
“სააკაშვილი არის ეროვნული ნიღბით მოვლენილი ანტიქრისტე, ადამიანი, რომელიც იშვა აშშ-ს კვერდციდან, როგორც ეს სალვადორ დალის სურათზეა გამოხატული. მოვითხოვთ გასამართლდეს სააკაშვილი თავის რეჟიმთან ერთად და უცხო ქვეყნის სპეცსამსახურებმა , რომლებმაც შემოიყვანეს საქართველოში, უკან წაიყვანონ”, _ ამბობენ საზოგადოების წარმომადგენლები.
ხვალვე, საგარეო საქმეთა სამინისტროსთან “ახალგაზრდული ორგანიზაცია” 15 საათზე იწყებს საპროტესტო აქციას, რომელიც “რესპუბლიკური პარტიის” ოფისთან გადაინაცვლებს. აქციის მონაწილეები თვითმმართველობის კოდექსის პარლამენტიდან გამოთხოვას და სამართლიანობის აღდგენას ითხოვენ.
