“გურია ნიუსის” რედაქციას ჩოხატაურის მუნიციპალიტეტის სოფელ შუაფარცხმიდან ნინა ბერძენიშვილი პრობლემის მოგვარებაში დახმარებას სთხოვს. როგორც ავტორი წერს, გასულ თვეებში ელექტროენერგიის გადასახადი დამატებით ერიცხებოდა და იმაზე მეტ თანხას იხდიდა, ვიდრე თავად ხარჯავდა; შემდეგ, ძველი მრიცხველების ახლით ჩანაცვლება მოხდა, თუმცა, როგორც თავად ამბობს, აღნიშნული პრობლემა მაინც არ მოგვარდა. ზედმეტ გადასახადსაც ყოველთვის იხდიდა და როცა ელექტროენერგიის ვაუჩერები დარიგდა, სიაში მაინც 3
არ აღმოჩნდა და შესაბამისად, ვაუჩერის გარეშეც დარჩა. შევეცადეთ გაგვერკვია, ხომ არ იყო სხვაგანაც მსგავსი პრობლემა და რამდენიმე ადამიანს გავესაუბრეთ.
40 წლის ქალბატონი: _ მსგავსი პრობლემები ჩვენთანაც არის. ყოფილა შემთხვევა, როცა იმაზე გაცილებით მეტი გადამიხდია, ვიდრე გასულ თვეში. როცა ვიკითხეთ, თუ რატომ ვიხდით ამხელა თანხას, გვითხრეს, რომ ასე საერთო მრიცხველის ჩვენების შემდეგ განაწილდა. რასაც ვხარჯავთ, იმისი გადახდა გვიჭირს ზოგჯერ და როგორია დამატებითი თანხის გადახდა?!
45 წლის ქალბატონი: _ ერთხელ, ერთ თვეში ხუთი ლარი გადავიხადე, მეორე თვეში კი _ 15. ამხელა სხვაობა შეიძლება? ასე იმიტომ ხდება, რომ ვიღაც იპარავს ელექტროენერგიას, ერთი ადამიანის გულისთვის კი მთელი სოფელი ვზარალდებით.
38 წლის ქალბატონი: _ ბევრჯერ გადამიხდია დამატებითი გადასახადი. საერთო მრიცხველის ჩვენებას თანაბრად ყოფენ მოსახლეობაზე. ასე არ უნდა იყოს. მე რომ თვიდან _ თვემდე ყოველთვის ხუთ ლარს ვიხდი, რატომ უნდა გადავიხადო შემდეგ 15 და 17 ლარი?! უნდა გაიგონ ვინ იპარავს დენს და სერიოზული ჯარიმაც უნდა მიაკრან.
50 წლის მამაკაცი: _ ამბობენ, ახალი გამრიცხველიანება ხდებაო და იმედია, მსგავსი პრობლემები აღარ იქნება. ისე უნდა იყოს, რომ ვერავინ შეძლოს ეგრეთწოდებული “ლევი” დენით სარგებლობა, თუ ვინმე ხარჯავს დიდი რაოდენობის ელექტროენერგიას თავადვე გადაიხადოს იმდენი, რამდენიც დახარჯა. რა დავაშავეთ იმ ადამიანებმა, რომლებიც ელექტროენერგიას ეკონომიურად მოვიხმართ, მაგრამ თვის ბოლოს მაინც იგივე თანხას ვიხდით, რამდენსაც ის ადამიანები, რომლებიც დენს იპარავენ?! ეს სისტემა უნდა შეიცვალოს და იმედია, ახალი მრიცხველების დადგმის შემდეგ მსგავსი პრობლემები აღარ იქნება.
აღნიშნულ თემაზე ვესაუბრეთ “ენერგო პრო ჯორჯიას” ჩოხატაურის ფილიალის დირექტორს, სერგო გეგეშიძეს, რომელსაც ვთხოვეთ გავერკვიეთ, რატომ უწევდა მოსახლეობას ელექტროენერგიის მოხმარებისთვის დამატებითი თანხის გადახდა.
_ კომპანიას რომ ვინმესთვის დამატებითი თანხა დაეწეროს _ გამორიცხულია; ყურადღება უნდა მიექცეს ძველ მრიცხველებს, ისინი დამონტაჟებული უნდა იყოს ზუსტად, რათა სწორად ხდებოდეს მრიცხველზე დახარჯული ელექტროენერგიის აღწერა. მნიშვნელობა აქვს ძალიან მცირე დეტალსაც კი _ შესაძლოა, მრიცხველი ოდნავ იყოს გადახრილი, ამ შემთხვევაში, დახარჯული ელექტროენერგიის ზუსტი ასახვა არ მოხდება; ასევე, ამის მიზეზი შეიძლება იყოს ქარი, წვიმა, თოვლი, და სხვა ნებისმიერი გარეშე ფაქტორი, გამომდინარე იქედან, რომ ძველი მრიცხველი არაა დაცული. აღსანიშნავია, რომ ექვს თვეში ერთხელ თუ არა, წელიწადში ერთხელ მაინც, უნდა ხდებოდეს მრიცხველების შემოწმება, რაც არ ხდება. საერთო მრიცხველში აღიწერება მთლიანად სოფლის მოსახლეობის მიერ დახარჯული ელექტროენერგიის რაოდენობა და შემდეგ ნაწილდება ოჯახებზე, იმის მიხედვით, ვინ რა რაოდენობის ელექტროენერგიას მოიხმარს. ამას ანაწილებს ის პიროვნება, რომელიც ამა თუ იმ სოფლის ელექტროენერგიის აღმრიცხველია. ამ საკითხში კომპანია საერთოდ არ ერევა. ამჟამად მიმდინარეობს ძველი მრიცხველების ახლით ჩანაცვლება, რომელიც აბსოლუტურად დაცულია ყოველგვარი დამაზიანებელი ფაქტორისგან და ახალი გამრიცხველიანების შემდეგ, მსგავსი პრობლემები აღარ იქნება. ახლახან დამთავრდა გამრიცხველიანება შუაფარცხმაში, გოგოლესუბანში და გრძელდება მუნიციპალიტეტის სხვადასხვა სოფელში. დაახლოებით ორ წელში მთლიანად ჩოხატაურში დამთავრდება გამრიცხველიანება და მოსახლეობა გადაიხდის ზუსტად იმდენს, რამდენსაც დახარჯავს. ასევე, გვარდება ბახმაროს ელექტროსისტემა და აღარც დამსვენებლებს ექნებათ პრობლემა.
რაც შეეხება ფაქტს, რომ შუაფარცხმელ ქალატონს არ მიუღია ენერგოვაუჩერი; როგორც იცით, თავდაპირველად, იმისთვის, რომ მომხმარებელს ვაუჩერი მიეღო, ელექტროენერგიის დანახარჯი ექვსი თვის მანძილზე უნდა ყოფილიყო 200 კილოვატი; შესაძლოა, ამ ქალბატონს არ ჰქონდა ამდენი დანახარჯი და თავიდან ამიტომაც ვერ მიიღებდა ვაუჩერს, მაგრამ შემდეგ მთავრობამ გადაწყვიტა, რომ ვაუჩერი ყველა ოჯახს მიეღო და შეიქმნა დამატებითი სიები. ეს ქალბატონი უნდა მიბრძანებულიყო გამგეობაში ან სოციალური დახმარების ცენტრში და დაეწერა განცხადება, რის შემდეგაც მოხვდებოდა დამატებით სიებში, და შესაბამისად მიიღებდა ენერგოვაუჩერს, _ გვითხრა გეგეშიძემ.
