ჩოხატაურის მუნიციპალიტეტის კულტურის ცენტრთან არსებულმა სახალხო თეატრმა (ხელმძღვანელი გოგი ცინცაძე), 19 ივლისს, პრემიერა გამართა _ ნოდარ დუმბაძის მოთხრობების მიხედვით შექმნილი სპექტაკლი “სისხლის ძახილი" მწერლის იუბილეს მიეძღვნა.
მიუხედავად იმისა, რომ ჩოხატაურელ მსახიობებს სარეპეტიციოდ არც სცენა ჰქონდათ და არც სხვა საჭირო პირობები, პრემიერამ დამსახურებული ოვაციების ფონზე ჩაიარა _ დიდი ხანია, ჩოხატაურელ მაყურებელს ასეთი მხურვალე ტაში არავისთვის დაუკრავს.
სპექტაკლში ბევრი ახალბედა მსახიობი მონაწილეობდა, ბევრიც _ ყოფილი. მათ შორის, ჩოხატაურის მუნიციპალიტეტის საფინანსო სამსახურის ერთ-ერთი განყოფილების უფროსი, ჯემალ სიხარულიძე, რომელმაც ჩვენთან საუბრისას აღნიშნა, რომ სპექტაკლში თამაშით ახალგაზრდობა გაიხსენა.
აღსანიშნავია სპექტაკლში მონაწილე პატარა ბავშვები, რომლებიც მთელი ოსტატობით ასახიერებდნენ დუმბაძის უკვდავ პერსონაჟებს.
მართალია, სცენა და კულისები ძალიან ვიწრო გახლდათ და რეკვიზიტებიც სხვა რაიონებიდან ითხოვეს, მაგრამ მთავარი მაინც ის არის, რომ პრემიერა წარმატებით შედგა!
