“ოცნების” ხმოსნების არჩეულმა პრეზიდენტმა მიხეილ ყაველაშვილმა ნათლისღების დღესასწაულთან დაკავშირებით 159 მსჯავრდებული შეიწყალა, თუმცა 20 იანვრის მდგომარეობით, პენიტენციური დაწესებულება ჯერჯერობით არცერთ მათგანს არ დაუტოვებია.
აღნიშნულ საკითხთან დაკავშირებით “გურია ნიუსი” საქართველოს ახალგაზრდა იურისტთა ასოციაციის სისხლის სამართლის ანალიტიკოსის თამარ ბოჭორიშვილს ესაუბრა. მისი თქმით, შეწყალებულ პირებს პენიტენციური დაწესებულება დაუყოვნებლივ უნდა დაეტოვებინათ.
_ პრეზიდენტს აქვს უფლებამოსილება შეიწყალოს ნებისმიერი პირი. გვახსოვს ყაველაშვილის მიერ შეწყალებული პოლიტიკოსები ბადრი ჯაფარიძე და მამუკა ხაზარაძე. ისინი თავისი ინიციატივით შეიწყალა. ამ შემთხვევაშიც იქნება ეს მზია ამაღლობელის შემთხვევა თუ სხვა ნებისმიერი აქტივისტი, ჰქონდა შესაძლებლობა რომ მიმართვის გარეშე შეეწყალებინა გარკვეული პირები.
რამდენიმე დღით ადრე დაანონსებული იყო რომ ნათლისღების დღესასწაულთან დაკავშირებით მოხდებოდა პრეზიდენტის მხრიდან გარკვეული პირების შეწყალება და საკმაოდ გვიან, უკვე საღამოს 10 საათის შემდეგ გახმაურდა მედია საშუალებებით ინფორმაცია, რომ 159 პირი შეიწყალა ყაველაშვილმა, თუმცა მას შემდეგ, უკვე მეორე დღის შუადღეა და არ გვაქვს ინფორმაცია, თუ ვინ არის შეწყალებული. სახელდებით თუ ვის ათავისუფლებდნენ არც წინა წლებში არ საჯაროვდებოდა, მაგრამ ამ დრომდე არ არის ინფორმაცია რომ 1-მა შეწყალებულმა მაინც დატოვა პენიტენციური დაწესებულება.
როდესაც მიღებულია მსგავსი შეწყალების გადაწყვეტილება, პირები დაუყონებლივ თავისუფლდებიან და არ ექვემდებარება ეს არც არასამუშაო საათებს და არც დასვენების დღეებს. მაგალითისთვის, წინა წლებში გვქონია შემთხვევები, როცა ღამის საათებში გაუთავისუფლებიათ პირები პენიტენციური დაწესებულებები. გაურკვეველია ჯერ რატომ მოხდა ინფორმაციის გვიან გასაჯაროება და ამდენი საათი გავიდა და რატომ არ კონკრეტდება 1 ადამიანი მაინც ვინც ამ დროისთვის უკვე დატოვა დაწესებულება,_ ამბობს თამარ ბოჭორიშვილი.
თამარ ბოჭორიშვილის თქმითვე, წინა პერიოდში ყაველაშვილმა 2025 წელს, როცა უფლებამოსილებას შეუდგა 600 პირი შეიწყალა, შემდეგ სექტემბერში ორი პოლიტიკოსი შეიწყალა, შემდეგ 14 ოქტომბერს 60 პირი შეიწყალა და ახლა მეოთხე შეწყალებაა ყაველაშვილის მიერ როცა 159 პირი შეიწყალა. ჯამში, ყაველაშვილს 850-ზე მეტი პირი ჰყავს შეწყალებული ერთ წელში და ეს რომ წინა პრეზიდენტების მიერ გახორციელებულ შეწყალებებს შევადაროთ,, მათ შეიძლება ჯამში არ ჰყავდეთ ამდენი ადამიანი შეწყალებული.
_სამწუხაროა, რომ ამ დრომდე ჯერ კიდევ ერთი პირიც კი არ არის ცნობილი ვინც დატოვა სასჯელაღსრულების დაწესებულება.
_თუ გაქვთ ინფორმაცია, რა კრიტერიუმებით შეირჩნენ შეწყალებული პირები?
_ არ გამოვრიცხავთ, რომ იყვნენ მძიმე კატეგორიის დანაშაულებში მსჯავრდებული პირები , თუმცა ჯერჯერობით უცნობია, ვინ არიან შეწყალებულთა სიაში.
ავტორი
