ჩვენი წყაროს თქმით, ეს ინფორმაცია ბაღების ხელმძღვანელობისთვის ცნობილია, თუმცა, არავის განმარტება არ გაუკეთებია. უფრო მეტიც, ბაღების დირექტორებს, როგორც გავიგეთ, არც მშობლები გაუფრთხილებიათ.
საქმის კურსში არც ჩოხატაურის მუნიციპალიტეტის ხელმძღვანელობაა _ საკრებულოს თავმჯდომარის, ანტონ ხუნდაძის თქმით, ამის შესახებ ინფორმაცია პირველად ჩვენგან გაიგო.
_ ძალიან დიდი მადლობა რომ გამაგებინეთ. შესაბამის სამსახურებს ჩავაყენებ საქმის კურსში, _ გვითხრა ხუნდაძემ.
_ მშობლებს რატომღაც ერიდებათ ამის გახმაურება, მაგრამ ეს არ არის დასამალი _ პირიქით, ამ ავადმყოფობას აუცილებლად სჭირდება ყურადღების მიქცევა, რადგან ზოგს ალერგიაში ერევა და ალერგიაზე მკურნალობენ, რაც არ შეიძლება, _ ამბობენ ჩვენთან საუბრისას სპეციალისტები.
აღნიშნულის შესახებ საქმის კურსში არ აღმოჩნდა ააიპ სააღმზრდელო დაწესებულება “მომავლის” დირექტორი ნინო ბარამიძე: _ პირველად მესმის, აუცილებლად გადავამოწმებ. გეთანხმებით, რომ ეს არ არის ის თემა, რომლის დამალვაც შეიძლება. ცუდი ამინდები იყო, მშობლებს ბავშვები არ დაჰყავდათ ბაღში და ალბათ, ამიტომაც ვერ გავიგეთ. ორშაბათიდან (საუბარი ჩაწერილია 13 დეკემბერს.) პირად კონტროლზე ავიყვან ყველა ბაღს.
აღსანიშნავია, რომ ყველა საბავშვო ბაღს ექთანი ჰყავს და სხვას თუ არა, ეს ინფორმაცია მათ მაინც უნდა ჰქონოდათ. დაავადების გავრცელების შესახებ ჯანდაცვის ცენტრიც უნდა ყოფილიყო საქმის კურსში და შესაბამისი რეაგირებაც მოეხდინა, თუმცა, როგორც ზემოთ აღვნიშნეთ, ამ დრომდე არავინ არაფერი იცის; ან იცის და არ საუბრობს.
ჩვენი წყაროს თქმით, მუნის (ბღერის) დიაგნოზი სკოლის რამდენიმე მოსწავლესაც დაუსვეს. რამდენიმე შემთხვევა უფრო მოზრდილებშიც დაფიქსირდა.
მუნი (ბღერი) კანის ინფექციურ-პარაზიტული დაავადებაა, რომელსაც იწვევს მუნის ტკიპა Aცარუს სცაბიეი. ახასიათებს კანის საფარველის ინტენსიური ქავილი, განსაკუთრებით, ღამით, კანზე ნაკაწრებისა და წყვილ-წყვილი ხვრელების არსებობა. მუნის გამომწვევი პარაზიტი ისეთი მცირე ზომისაა (200-400 მკ), რომ შეუიარაღებელი თვალით პრაქტიკულად არ ჩანს. პარაზიტები დაახლოებით 1 თვეს ცოცხლობენ. მდედრი კანის რქოვან შრეში აკეთებს ხვრელს, სადაც დღეში 2-3 კვერცხს დებს. კვერცხიდან იჩეკება მატლი, რომელიც 10-14 დღეში გაივლის რამდენიმე სტადიას და ზრდასრულ ტკიპად გადაიქცევა.
მუნი (ბღერი) კონტაგიოზური (გადამდები) დაავადებაა. ბავშვებში უფრო იოლად ვრცელდება, გადადის ავადმყოფთან უშუალო და ხანგრძლივი კონტაქტით, მის მიერ გამოყენებული საგნების (ჭუჭყიანი თეთრეული, ტანსაცმელი, პირადი ნივთები) საშუალებით, სქესობრივი კონტაქტით.
საინკუბაციო პერიოდი 7-10 დღეს შეადგენს, რის შემდეგაც იწყება კლინიკური გამოვლინება: კანის ძლიერი ქავილი, რომელიც ძლიერდება ღამით და სითბოში, მაგალითად, ლოგინში ჩაწოლისას, თბილი აბაზანის მიღებისას. ქავილი ინტენსიურია ყველგან, გარდა სახისა.
გამონაყარი უმთავრესად კანის ნაზ უბნებში ჩნდება. ეს არის წვრილი, ქინძისთავისოდენა, ხაზოვნად დალაგებული ბუშტუკები და კვანძები, ეროზიები, რომლებიც თხელი სისხლიანი ქერქით არის დაფარული.
გამონაყარის ტიპური ლოკალიზაციაა ზემო და ქვემო კიდურების მომხრელი ზედაპირი, მაჯები, ხელის თითების ნაოჭები და გვერდითი ზედაპირები, წელი, მუცელი და დუნდულები, ქალებში _ სარძევე ჯირკვლების კანი, მამაკაცებში _ გენიტალიუმის არე, ბავშვებში _ ხელისგულები და ფეხისგულები, შესაძლოა თავიც, განსხვავებით მოზრდილებისაგან.
გამონაყარის ელემენტები წყვილ-წყვილად არის განლაგებული. ხვრელები ერთმანეთისაგან 0,5-1 სანტიმეტრითაა დაშორებული.
გარდა ჩამოთვლილი სიმპტომებისა, ამ ავადმყოფობისთვის დამახასიათებელია ე. წ. სამკუთხედის ნიშანი _ ხვრელების თავისებური, სამკუთხა განლაგება კუდუსუნის მიდამოში, მწვერვალით დუნდულებს შორის არსებული ნაოჭისკენ. ნაკაწრები (ექსკორიაციები) განსაკუთრებით ფეხებზეა გამოხატული.
გვხვდება მუნის (ბღერის) ატიპური ფორმებიც, როდესაც დაავადებისთვის დამახასიათებელი სურათი წაშლილია. მაგალითად, მას, ვინც ყოველდღე ბანაობს, აქვს ნაკლებად შესამჩნევი გამონაყარი, რომელიც ნელა ვრცელდება.
მუნის (ბღერის) ყველაზე ხშირი გართულებებია: მეორეული პიოდერმია _ ქავილის შედეგად ხდება მეორეული ჩირქოვანი ინფექციის თანდართვა. ახასიათებს პუსტულები და ეროზიები, სეროზულ-ჰემორაგიული და ჩირქოვანი ქერქები, თანმხლები ძლიერი ქავილი.
დერმატიტი _ ვითარდება ბღერის (მუნის) საწინააღმდეგო პრეპარატებით მკურნალობის შემდეგ და კანის ანთებითი მოვლენები ახასიათებს. კანზე წარმოიქმნება ერითემა (სიწითლე), წვრილი ნახეთქები, თხელფირფიტოვანი აქერცვლა, წვრილი კვანძები, ურტიკარიული პაპულები.
ლიმფოპლაზია _ კვანძების გაჩენას იწვევს დაავადებულის იმუნურ-ალერგიული რეაქცია მუნის გამომწვევის ცხოველქმედების პროდუქტებზე. რეინვაზიის შემთხვევაში ძველ ადგილებში შეიმჩნევა ლიმფოპლაზია, მაგრამ არ ჩანს მუნის ხვრელები.
იშვიათია ეგზემა და ჭინჭრის ციება, რასაც აკარიციდული პრეპარატების ჭარბი გამოყენება იწვევს.
მუნის (ბღერის) დიაგნოზს კლინიკური სურათის მიხედვით სვამენ. მთავარი სადიაგნოზო ნიშანი, რომელიც მას სხვა ქავანა დერმატოზებისგან განასხვავებს, არის მუნის ხვრელების არსებობა.
დღეს მუნის (ბღერის) სამკურნალოდ გამოიყენება:
გოგირდის 33%-იანი მალამო: 5 დღე _ წასმა, მე-7 დღეს – დაბანა;
ბენზილ-ბენზოატის 25%-იანი (ბავშვებში _ 10%-იანი) ხსნარი: 3 დღე _ წასმა 12-საათიანი შუალედებით, მე-6 დღეს _ დაბანა;
სპრეგალი (აეროზოლი): ერთჯერადი მიფრქვევა საღამოს, 12 საათის შემდეგ _ დაბანა. გამოიყენება გაურთულებელი ბღერის შემთხვევაში.
მკურნალობის შემდეგ საჭიროა ავადმყოფის ორჯერადი გასინჯვა ერთკვირიანი შუალედით
აუცილებელია ავადმყოფის იზოლაცია, მისი თეთრეულისა და ტანსაცმლის დეზინფექცია, ავადმყოფთან კონტაქტში მყოფი ყველა პირის ერთდროული პროფილაქტიკური დამუშავება.
