როგორც ასოციაციის გამგეობის თავმჯდომარე იაგორ კალანდაძემ ჟურნალისტებთან განაცხადა, ასოციაცია წევრობაზეა დაფუძნებული და გარდა 10 კლინიკისა, მასში გაწევრიანება სხვა კლინიკებსაც შეუძლიათ, თუ ისინი ასოციაციის წესდებას ეთანხმებიან.
“იმედი გვაქვს, რომ ასოციაცია ფორმალური გაერთიანება არ იქნება და ის მოქმედი გახდება, რადგან არა კერძო მერკანტილურ, არამედ საზოგადოებრივ ინტერესს წარმოადგენს. ეს ინტერესი უპირველეს ყოვლისა ეფუძნება იმ გამოწვევებს, რომლებიც დღეს არის თავმოყრილი ჯანდაცვის სექტორში. განწყობა და მიზანი აბსოლუტუტად კონსტრუქციულია, რომელიც პირველ რიგში ორიენტირებული იქნება ჰოსპიტლების სერვისის გაუმჯობესებაზე და საზოგადოებისთვის მის მიწოდებაზე. აქ გაერთიანებული ჰოსპიტლები ორიენტირებულები არიან, რომ დიცვან შიდა ქსელური ხარისხის მაღალი თამასა, ამის შემდეგ კი ეტაპობრივად ის ხარვეზები აღმოვფხვრათ, რაც ჯანდაცვის სექტორშია,” _ განაცხადა კალანდაძემ.
როგორც ასოციაციის დამფუძნებლებმა განაცხადეს, “ერთ-ერთი პრიორიტეტული საკითხი, რასაც ასოციაცია განიხილავს კლინიკებში დაწესებული ფასებია”.
“აქამდე შეჯერებული ფასები არ არსებობდა, რის გამოც ხშირად პრობლემები იქმნებოდა. ამიტომ, ასოციაციამ გადაწყვიტა ამ საკითხზე უპირველესად იმსჯელოს და შეჯერებული ვარიანტი მიიღოს. ამჟამად, არის როგორც ძალიან მაღალი ფასები, ასევე ძალიან დაბალიც, რაც შემდგომ პაციენტის მკურნალობის ხარისხზე აისახება”.
ამასთან, შეხვედრაზე აღინიშნა, რომ ჯანდაცვის სამინისტროს საყოველთაო ჯანდაცვის პროგრამა გარკვეული ხარვეზებით მუშაობს, რის გამოსწორებასაც ასოციაციის დამფუძნებლები საკანონმდებლო ინიციატივებით და წინადადებებით აპირებენ.
“ხშირად გვაკითხავენ პაციენტები და ითხოვენ მომსახურებებს, რაც ამ პროგრამით გაწერილი არ არის, ეს კი მოსახლეობის არაინფორმირებულობის გამო ხდება. ასოციაცია ეცდება სამინისტროსა და საზოგადოებას შორის ეს პრობლემა აღმოფხვრას, რომ შემდგომ ნებისმიერი გაუგებრობა გამოსწორდეს. არ გამოვრიცხავთ, რომ მომავალში საკანონმდებლო ინიციატივითაც შევიდეთ პარლამენტში, რადგან “საყოველთაო ჯანდაცვის შესახებ” დადგენილებაში ბევრი საკითხია გასასწორებელი,” _ განაცხადა “ჩაჩავას კლინიკის” ხელმძღვანელმა ელგუჯა გოცირიძემ.
ასოციაციის დამფუძნებელთა განცხადებით, საზოგადოებას მათი საქმიანობის შესახებ პერიდულად ანგარიშებით ეცნობება.
შეგახსენებთ, რომ ჰოსპიტალტა ასოციაციაში 10 წამყვანი კლინიკაა გაერთიანებული. მათ შორის: შპს “მაღალი სამედიცინო ტექნოლოგიების ცენტრი, საუნივერსიტეტო კლინიკა”; სს “ალ. წულუკიძის სახელობის უროლოგიის ეროვნული ცენტრი”; სს “ჩაჩავას კლინიკა”; შპს “თბილისის მ. გურამიშვილის სახელობის პედიატრიული კლინიკა”; შპს “აკადემიკოს ნიკოლოზ ყიფშიძის სახელობის ცენტრალური საუნივერსიტეტო კლინიკა; შსპ “აკადემიკოს გ. ჩაფიძის სახელობის გადაუდებელი კარდიოლოგიის ცენტრი”; შპს “ამტელ ჰოსპიტალ პირველი კლინიკური”; შპს “ნიუ ჰოსპიტალსი” და შპს “აკადემიკოს ო. ღუდუშაურის სახელობის ეროვნული სამედიცინო ცენტრი”.
