დღევანდელ დღეს, 2004 წლის 16 აგვისტოს, ეროვნული გმირი ზაზა დამენია ცხინვალის მისადგომებთან დაიღუპა. სანგარში, რომელშიც ქართველი სამხედროები იმყოფებოდნენ, შეტევაზე გადმოსულმა მტერმა ხელყუმბარა ჩააგდო. დამენია დაუფიქრებლად გადაეფარა და დანარჩენი თანამებრძოლები სიკვდილისგან იხსნა.
დღეს, ოზურგეთში, ომში დაღუპულთა სახელობის პარკში, გმირის საფლავთან ოჯახის წევრები, ასევე ოზურგეთის მუნიციპალიტეტის მერიის წარმოადგენლები და საქართველოს დასავლეთის სარდლობის ჯარისკაცები მივიდნენ.
განსაკუთრებული რიდით იდგნენ გმირის საფლავთან საქველმოქმედო „გურიას“ წარმომადგენლები.
_ზაზა დამენია არის ეროვნული გმირი, რჩეული რჩეულთა შორის, რომელმაც დაჭრილმაც კი არ მიატოვა საბრძოლო პოზიციები და აფეთქებულ ყუმბარას გადაეფარა, რათა ჩვენს სამშობლოში სხვათა სიცოცხლე გაგრძელებულიყო. ამიტომაც ჩვენ, სანამ ვცოცხლობთ, როგორც შეგვეძლება, მაქსიმალურად პატივს მივაგებთ მის ხსოვნას და ჩვენს შვილებს , შვილიშვილებს, მომავალ თაობას ვუამბობთ, ვინ არის და როგორი უნდა იყოს ეროვნული გმირი, -თქვა გმირის საფლავთან ოზურგეთის მუნიციპალიტეტის მერის მოადგილემ ირაკლი სირაძემ.
გმირის საფლავთან მოწიწებით გაშალეს საქართველოს დროშები და ხსოვნას პატივი მიაგეს დასავლეთ საქართველოს სარდლობის , მეორე ქვეითი ბრიგადის ხელმძღვანელებმა და ჯარისკაცებმა.
_ჩვენ ახალწვეულები ვართ. რამდენიმე თვეა, რაც არმიაში ვმსახურობთ. ჩვენთვის სამაგალითოა ეროვნული გმირი, ზაზა დამენია და ჩვენი საქმით უნდა გავაგრძელოთ სამშობლოს სამსახური ისე, როგორც ის ემსახურებოდა, – გვითხრეს სამხედრო სამსახურში ახლახან ფეხშედგმულმა გიორგი ჭოჭუამ და დავით აბაშიძემ.
ზაზა დამენიას დედამ, ქალბატონმა ციური წერეთელმა, ასევე მეუღლემ გულისტკივილი და საყვედური გამოთქვეს იმის გამო, რომ ზაზა დამენია სათანადოდ არ არის დაფასებული. კერძოდ, მათ აღნიშნეს, რომ მისი სახელი ნაკლებად ისმის, სხვა გმირების ფონზე.
_გმირები რომ ჰყავს ჩვენს ქვეყანას, ამიტომაც მოვედით დღემდე. მე გული მტკივა იმის გამო, რომ როცა აგვისტოს ომზე თუ ზოგადად ტერიტორიული მთლიანობისთვის დაღუპულ გმირებზეა საუბარი, არსად არ ისმის ზაზას სახელი. განა ვინმეს წინააღმდეგი ვარ. გმირი გმირია და ერთს თუ ახსენებენ გამუდმებით ან მეორეს, ზაზამ რა დააშავა? ის ხომ პირველი იყო, ვინც ცხინვალის მისადგომებთან დაიღუპა. თავი დადო დაუფიქრებლად, სიცოცხლე დათმო საკუთარი ნებით ისე, რომ არ შეყოყმანებულა. მას შვილი ჰყავს, გიორგი დამენია. ის უკვე სრულწლოვანია, მამის სახელი ეამაყება, თუმცა ზოგჯერ ითრგუნება, რომ მამის სახელი არ ესმის გმირების გვერდით, ზოგჯერ თავს შეურაცხყოფილადაც კი ვგრძნობთ, _თქვა „გურია ნიუსთან“ ზაზა დამენიას დედამ, ქალბატონმა ციური წერეთელმა.
საქველმოქმედო ასოციაცია „გურიას“ წარმოადგენელმა, თამუნა ლურსმანაშვილმა ისაუბრა გმირის ოჯახის შესახებ:
_დღეს ძალზე მძიმე და ამავე დროს სამაყო დღეა. ჩვენ ვმეგობრობთ ზაზას მეუღლესთან, ხათუნა დამენიასთან. ის თავად მოვიდა ჩვენთან, საქველმოქმედო ასოციაციაში.სახლშიც არაერთი ჩვენი წევრი მოინახულა. ჩვენ სულ მოვალთ ზაზა დამენიას საფლავთან. მუდამ მოვიხრით ქედს მისი ხსოვნის წინაშე. მეამაყება, რომ გვყავს ეროვნული გმირები, განსაკუთრებით ოზურგეთში, – თქვა ქალბატონმა თამუნამ.
ცნობისთვის, ზაზა დამენია 1972 წლის 22 ოქტომბერს, ოზურგეთში დაიბადა. სწავლობდა ყაზანის სამშენებლო ინსტიტუტში 1990-1992 წლებში. 2003 წელს დაუსწრებლად დაამთავრა საქართველოს ტექნიკური უნივერსიტეტის ბათუმის ფილიალი სამრეწველო სამოქალაქო მშენებლობის სპეციალობით.
1992 წლიდან მსახურობდა საქართველოს შეიარაღებული ძალების სადაზვერვო ბატალიონში; 1993 წელს იბრძოდა აფხაზეთის ომში. 1995 წელს იყო გურიის სამხარეო შს სამმართველოს განსაკუთრებულ დავალებათა სამსახურის უზრუნველყოფის ჯგუფის უფროსი.
2002 წელს ჩაირიცხა ვაზიანის მე-11 მექანიზებული მსუბუქი ქვეითი კომანდოს მესამე ასეულში.
2004 წლის აგვისტოში დაიღუპა ცხინვალის მისადმგომებთან.
საქართველოს პრეზიდენტის მიხეილ სააკაშვილის 2004 წლის 26 აგვისტოს განკარგულებით ზაზა დამენიას ეროვნული გმირის წოდება მიენიჭა „სამშობლოს დაცვისა და ერთიანობისთვის ბრძოლებში გამოჩენილი მამაცობისა და გამორჩეული გმირობისათვის“
ოზურგეთის მუნიციპალიტეტის სოფელ ოზურგეთის საჯარო სკოლას საქართველოს ეროვნული გმირის, ზაზა დამენიას სახელი მიენიჭა. აგრეთვე, ოზურგეთის ერთ-ერთი ქუჩა მის სახელს ატარებს.
[sexy_author_bio]
