მესამე დღეა დაიწყო ქალთა მიმართ ძალადობის წინააღმდეგ 16-დღიანი საერთაშორისო კამპანია, რომელიც ბოლო რამდენიმე წელია, განსაკუთრებულ აქცენტს აკეთებს ქალთა შრომით უფლებებზე.
წლევანდელი საერთაშორისო კამპანიის სამიზნეა – გენდერული ძალადობა, დისკრიმინაცია და კოვიდ-19-ის საგანგაშო შედეგები ქალთა უფლებრივ მდგომარეობაზე, რადგან, სტატისტიკის მიხედვით, მსოფლიოში ქალთა 60% არაფორმალურ ეკონომიკაშია დაკავებული. მათი დაახლოებით 92% კი ძალიან ხშირად ეჯახება შრომის უფლებების უხეშ დარღვევებს, დარჩენილია ნაციონალური შრომითი კანონმდებლობების მიღმა და მინიმალური სოციალური დაცვის გარანტიების გარეშე.
ფონდ “სოხუმის“ წარმომადგენელი ლალი შენგელია ამბობს, რომ წლევანდელი საერთაშორისო საინფორმაციო კამპანიის ორგანიზატორების ინფორმაციით, მსოფლიოსთვის თავსდამტყდარი ჩOVID-19 პანდემიის დროს, როცა მთელი მსოფლიო მეტწილად იმყოფება იძულებით შინაიზოლაციაში (რათა როგორმე შეაჩეროს მისი გავრცელების მასშტაბები), ყველა ანგარიში აჩვენებს ქალთა მიმართ ძალადობის „პანდემიის“ საგანგაშო ზრდას. ეს საერთო ნიშნულია მთელი მსოფლიოს მასშტაბით მაშინ, როცა მთელი ყურადღება გადატანილია პანდემიასთან ბრძოლისკენ და მომსახურება, კანონის უზენაესობა, ჯანდაცვა, თავშესაფრები – კიდევ უფრო ნაკლებად არის ხელმისაწვდომი ძალადობის მსხვერპლისთვის.
კოვიდ-19-ის სოციალურ-ეკონომიკურ შედეგებზე ეფექტური რეაგირების თვალსაზრისით, დღეს აშკარად გამოიკვეთა საერთო პასუხისმგებლობის საჭიროება ამ გლობალური საფრთხის წინაშე და მასზე რეაგირება ყველას ვალია. კამპანიის ძირითადი გზავნილის პათოსია: „თქვენ შეგიძლიათ შეცვალოთ სიტუაცია დროში გახანგრძლივებული ჩOVID-19-ის პანდემიის და გაჭიანურებული კრიზისის დროს!
თქვენ შეგიძლიათ, მხარი დაუჭიროთ ქალებს და გოგონებს, რომელთაც განიცადეს ძალადობა, რათა ისინი იყვნენ უსაფრთხოდ და არ დაექვემდებარონ ხელახალ ძალადობას.
“კამპანიის ფარგლებში 11 მუნიციპალიტეტში (ქუთაისი, წყალტუბო, ხონი, თერჯოლა, სენაკი, ფოთი, ზუგდიდი, წალენჯიხა, ოზურგეთი, ლანჩხუთი, ქობულეთი) ჩატარდება ასზე მეტი ღონისძიება საზოგადოების ყურადღების მოსაზიდად. ძირითადად, ონლაინ ფორმატით, მაგრამ ინფორმაციის არნახული ცირკულირებით, საზოგადოების სხვადასხვა ჯგუფის აქტიურობით, ვიდეობლოგებით, გამოფენებით, ადგილობრივი თვითმმართველობების, ახალგაზრდების, ფონდის ფორუმ-თეატრის, ცნობილი სახეების, უბრალო მოქალაქეების, მათ შორის ემიგრაციაში მყოფი ჩვენი თანამემამულეების მონაწილეობით. მოხდება ჩვენს მიერ ჩატარებული კოვიდ-19-ის პანდემიის შედეგების კვლევის პრეზენტაცია, გავრცელდება საინფორმაციო მასალები“, _ აღნიშნა ჟურნალისტებთან ონლაინ შეხვედრის დროს ლალი შენგელიამ.
