“საქმე ეხება გ. ღვინიაშვილის ქ. თბილისის პროკურორის თანამდებობაზე მუშაობის პერიოდში მომხდარ ალექსანდრე (სანდრო) გირვლიანის თავისუფლების უკანონო აღკვეთის, წამების, გარდაცვალებისა და ცალკეულ საჯარო მოხელეთა მხრიდან სამსახურებრივი უფლებამოსილების გადამეტების ფაქტებს, ხოლო კ. ბუცხრიკიძის შემთხვევაში – სასჯელაღსრულების დეპარტამენტის უფროსის მოადგილის თანამდებობაზე მუშაობის პერიოდში, ა. გირგვლიანის საქმეზე მსჯავრდებულ პირთა მიერ სასჯელის მოხდისას საპატიმრო დაწესებულების უკანონოდ დატოვებისა და მათთვის კანონით აკრძალული შეღავათების გაწევის ფაქტებს,” _ ნათქვამია პროკურატურის მიერ გავრცელებულ განცხადებაში.
აღსანიშნავია, რომ გიორგი ღვინიაშვილი აღნიშნულ საქმესთან დაკავშირებით ერთხელ უკვე იყო მოწმის სახით დაკითხვაზე დაბარებული, მაგრამ საგამოძიებო ორგანოებში მისვლაზე უარი განაცხადა და პროკურორებს მის დასაკითხად ქუთაისის პარლამენტში ჩასვლა შესთავაზა. დღეს კი დეპუტატი დაკითხვაზე გამოცხადდება, როგორც თვითონ ამბობს, გამონაკლისს მხოლოდ საზოგადოების მხრიდან დიდი ინტერესის გამო უშვებს და არ მისცემს ხელისუფლებას გვირგვლიანის თემით სპეკულაციის საშუალებას.
“მიუხედავად იმისა, რომ როგორც პარლამენტის დეპუტატს, მაქვს იმუნიტეტი და შემიძლია არ გამოვცხადდე მთავარ პროკურატურაში, მაინც მივალ, რადგან ეს გირგვლიანის საქმეს ეხება, რომელიც საზოგადოების მაღალი ინტერესის საგანია და არ მივცემ ამ ხელისუფლებას გვიგვლიანის თემით სპეკულაციის საშუალებას. ყველასთვის ნათელია, რომ ხელისუფლებამ ოპონენტების მიმართ ზეწოლის კიდევ ახალი ტალღა დაიწყო”.
მას შემდეგ, რაც პროკურატურამ ეს ინფორმაცია გააჟღერა, ამ საკითხის ირგვლივ აზრთა სხვადასხვაობა გაჩნდა უმცირესობისა და უმრავლესობის წარმომადგენლებს შორის.
დეპუტატების მოწმის სახით დაბარების ფაქტს გამოეხმაურა პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე ეკა ბესელია და განაცხადა, რომ მსგავსი საქმეების გამოძიება და დამნაშავეების დასჯა დიდი ხნის წინ უნდა დაწყებულიყო.
“ხდება ის, რაც აქამდე უნდა მომხდარიყო და რაც ნიშნავს იმას, რომ ჩვენი ხელისუფლებისთვის პრიორიტეტია ათასობით ადამიანის შელახული უფლების აღდგენა. ის, რასაც ახლა პროკურატურა აკეთებს, მისი მოვალეობაა, გამოიძიოს ის საქმეები, რომელზედაც არსებობს ძალიან დიდი მოლოდინი და მოთხოვნილება. ყველა გახმაურებულ საქმეზე, ყველა ძალადობრივ ფაქტზე, ყველა წამების კონკრეტულ შემთხვევაბზე აუცილებლად მოხდება რეაგირება”.
საპარლამენტო უმცირესობის ლიდერი დავით ბაქრაძე კი მიიჩნევს, რომ რადგან დადგა კახა ბუცხრიკიძის პასუხისმგებლობის საქმე, აუცილებლად უნდა მოეთხოვოს პასუხი ანალოგიურ ქმედებაზე ოთარ ფარცხალაძესაც.
“რაზეც დღეს პასუხი მოეთხოვება კახა ბუცხრიკიძეს, იმაზე პასუხი უნდა მოეთხოვოს ოთარ ფარცხალაძესაც. როდესაც ბუცხრიკიძეს გადასცეს უწყება და უთხრეს, თქვენ უნდა მობრძანდეთ პროკურატურაში და პასუხი გასცეთ ციხიდან უკანონოდ პატიმრების გაყვანის თემაზეო, პირველი რაც გამახსენდა, იყო ვანო მერაბიშვილის მიერ ორი დღის წინ გაკეთებული განცხადება, – ადამიანისა, რომელიც უკანონოდ გაიყვანეს ასევე ციხიდან და რომელთან დაკავშირებითაც პროკურატურა და მთავრობა დღემდე უარზე არიან, დაიწყოს გამოძიება. სამართლიანობა ნიშნავს იმას, რომ როცა კახა ბუცხრიკიძეს დაკითხავ იმაზე, რომ მან პატიმარი შეიძლება, უკანონოდ გაიყვანა ციხიდან, უნდა დაკითხო, მაგრამ ასევე უნდა დაკითხო ოთარ ფარცხალაძეც, რომლის მიმართაც ასევე არსებობს ეჭვი”.
ბაქრაძე აცხადებს, რომ პროკურატურა საზოგადოებრივი აზრით მანიპულირებას ცდილობს ისეთი მტკივნეული თემით, როგორც სანდრო გვირგვლიანის მკვლელობაა. ამასთან უმცირესობის ლიდერი ამბობს, რომ პარლამენტის წევრებს პოლიტიკური პარტიის ოფისში გადაეცათ უწყებები პროკურატურაში მისასვლელად, რაც ძალიან სიმპტომურია და ადრე არასდროს მომხდარა.
პარტიის ოფისში საგამოძიებო უწყებების მიტანაზე საუბრობს უმცირესობის წევრი გოკა გაბაშვილი და აცხადებს, რომ ამით ხელისუფლება ცდილობს პარტიის წევრების დაშინებას. ის დაბარებების ამ სერიას პოლიტიკური ზეწოლის მორიგ ტალღად აფასებს.
“დაიწყო პოლიტიკური რეპრესიების ახალი ტალღა. ხელისუფლება საგამოძიებო მოქმედებით ოპონენტების დაშინებასა და დაშანტაჟებას ცდილობს. უკვე პარტიის ოფისში დაიწყეს საგამოძიებო უწყებების მოტანა და ცდილობენ, “ნაციონალური მოძრაობის” ფრაქციის წევრები საგამოძიებო მოქმედებებით დააშინონ. ჰგონიათ, რომ დაგვაშანტაჟებენ. ამას ვერ ეღირსება კრიმინალური მეთოდებით მომუშავე ხელისუფლება”.
უმცირესობის აზრს არ იზიარებს საქართველოს იუსტიციის მინისტრი თეა წულუკიანი და აცხადებს, რომ გირგვლიანის საქმეზე პარლამენტის წევრების გიორგი ღვინიაშვილისა და კახაბერ ბუცხრიკიძის პროკურატურაში დაბარება უფრო ადრეც უნდა მომხდარიყო.
“სანდრო გვირგვლიანის მკვლელობის საქმეს ძალიან კარგად ვიცნობ და ვთვლი, რომ მოწმის სახით დასაკითხად ამ ორი ადამიანის დაბარება უფრო ადრეც უნდა მომხდარიყო. დაკითხვაზე დაბარება კანონით დადგენილია და ამაში ვერაფერს ვხედავ კანონდარღვევას”.
დღეს ღვინიაშვილი დაკითხვაზე 13 საათზე, ბუცხრიკიძე კი 16 საათზე უნდა გამოცხადდნენ.
