როგორც კლუბის ერთ-ერთი დამფუძნებელი ნინო ბორჩხაძე ამბობს, კლუბი შეიქმნა იმისთვის, რათა მოხდეს ძველი და ახალი თაობის ცნობილი და კვალიფიცირებული იურისტების გაერთიანება.
“კლუბი შეიქმნა იმისთვის, რათა მოხდეს კონკრეტული მექანიზმების შეთავაზება ხელისუფლებისთვის სამართლიანობის აღდგენასთან დაკავშირებით შექმნილი ჩიხური სიტუაციიდან გამოსასვლელად. კლუბის მეორე მიზანია მოხდეს კვალიფიციური და ნამდვილი იურისტების მიერ საქართველოში მიმდინარე პროცესების ექსპერტიზა, საინფორმაციო ანალიტიკური მიმართულებით და სამართლიანობის ეროვნული კომისიის შექმნა”.
ბორჩხაძე ამბობს, რომ სახეზეა კვალიფიციური დასკვნების დეფიციტი და კლუბი იმუშავებს ამა თუ იმ სოციალურ-პოლიტიკური მოვლებენის სწორი სამართლიანი შეფასებების დადებისთვის.
კლუბის წევრი, იურისტი კახა კახიშვილი აცხადებს, რომ კლუბის მუშაობაში ჩართულები იქნებიან ამერიკის შეერთებული შტატების წამყვანი იურისტები.
“კლუბის მუშაობაში აქტიურად იქნება ჩართული ორგანიზაციის თავმჯდომარე ანა დოლიძე, რომელიც ამერიკის შეერთებულ შტატებშია და სხვა იურისტები, რომლებსაც ნამდვილად ჰქონდათ პრაქტიკული შეხება ან კანონმდებლობასთან, ან მისი საქმიანობა ეხებოდა კონკრეტულ პრაქტიკულ იურიდიული საკითხების გადაჭრას”.
კახიშვილი კიდევ ერთხელ აღნიშნავს, რომ რეფორმებია გასატარებელი მართლმსაჯულების სისტემაში, პროკურატურისა და სამართალდამცავ სისტემაში, რომელშიც კლუბი აქტიურად ჩაერთვება. უნდა აღინიშნოს, რომ კლუბის მუშაობის ერთ-ერთი მიმართულება იქნება სააკაშვილის მმართველობის პერიოდის სამართლებრივი ექსპერტიზა. ამ იდეის ერთ-ერთი ავტორი სწორედ კახა კახიშვილია.
იურისტთა კლუბი ხელისუფლებას ინსტიტუციონალური, საკადრო და კონსტიტუციონალური კრიზისების დასაძლევად წინადადებებსა და საკანონმდებლო ინიციატივებსაც შესთავაზებს. ხელისუფლების წარმომადგენლები მიესალმებიან კლუბის შექმნას. უმრავლესობის წევრ ეკა ბესელიას განცხადებით, იურისტთა კლუბის ფორმირება კარგი იდეაა, სადაც შეიძლება იყოს ძალიან ბევრი კარგი მოსაზრება.
“საინტერესო და სასარგებლო იქნება მიმდინარე პროცესებთან დაკავშირებით პროფესიონალი იურისტების მოსაზრების გაცნობა. ზოგადად ამ კავშირის შენარჩუნება ჩვენსა და კოლეგებს შორის არის ის აუცილებელი ხიდი, რომელიც არასდროს არ უნდა ჩატყდეს. კარგია, რომ იურისტები უფრო აქტიურად იქნებიან ჩართულნი სხვადასხვა სამართლებრივი საკითხების დისკუსიებში”.
ბესელია აცხადებს, რომ ავტონომიურად გადაწყვეტილებები არ იქნება მიღებული და კლუბს წარმატებებს უსურვებს შემდგომ ეტაპებზე.
როგორც კლუბის წევრები ამბობენ, პირველ ეტაპზე კლუბის მუშაობა წარიმართება სამი ძირითადი მიმართულებით: სახელმწიფოსა და საზოგადეობის წინაშე მდგარი, მართლმსაჯულების ხარვეზების მოგვარების აუცილებლობის გამო, ე.წ. “გარდამავალი მართლმსაჯულების” მიდგომაზე მსჯელობა (იდეის ავტორი ანა დოლიძე); სპეციალიზირებული პროკურატურის შექმნის იდეის განხილვა (იდეის ავტორი გია მეფარიშვილი და ვენედი ბენიძე) და მიხეილ სააკაშვილის მმართველობის პერიოდის სამართლებრივი ექსპერტიზა (იდეის ავტორები ნანა თხელიძე, კახა კახიშვილი, მინდია უგრეხელიძე, გია მეფარიშვილი და სხვა იურისტები).
