სოზარ სუბარის განცხადებით, ერთი წლის განმავლობაში 10 000-ით შემცირდა პატიმრების რაოდენობა, ამჟამად, სასჯელაღსრულების დაწესებულებებში 9000-ზე მეტი მსჯავრდებული და ბრალდებული იმყოფება, წლის დასაწყისში კი მათი რიცხვი 19 000-ს აჭარბებდა.
2013 წელს, პირობით ვადამდე გათავისუფლების მექანიზმით 1491 პირი გათავისუფლდა, 14 მსჯავრდებულს კი სასჯელი საზოგადოებისთვის სასარგებლო შრომით შეეცვალა. 2012 წლის 1 ოქტომბრიდან დღემდე ამავე მექანიზმით 2432 მსჯავრდებული გათავისუფლდა.
ამნისტია შეეხო 17 726 პატიმარს, მათგან საპატიმრო სასჯელისგან გათავისუფლდა 8 726, მათ შორის 175 პოლიტპატიმარია.
42%-ით გაიზარდა პენიტენციური ჯანდაცვის ბიუჯეტი. მინისტრის ინფორმაციით, ჯანდაცვის წლიური დანახარჯი მსჯავრდებულზე საშუალოდ 760 დოლარამდე გაიზარდა. ანგარიშის მიხედვით, სასჯელაღსრულების სისტემისთვის შემუშავდა და ხორციელდება C ჰეპატიტის პრევენციის, დიაგნოსტიკისა და მკურნალობის პროგრამა, გაუმჯობესდა მედიკამენტებით მომარაგება და განისაზღვრა იმ მედიკამენტების ნუსხა, რომელსაც სახელმწიფო აფინანსებს; შეიქმნა და დაინერგა პატიმართა კვების ახალი სტანდარტი.
განახლდა ჯანდაცვისა და სასჯელაღსრულების სამინისტროებს შორის არსებული კომისიის შემადგენლობა და დებულება, რომელიც მძიმედ დაავადებულ მსჯავრდებულთა გათავისუფლების შესახებ იღებს გადაწყვეტილებას. შეიცვალა დაავადებათა ჩამონათვალი, რომელიც ავადმყოფთა შეფასებისთვის გამოიყენება – იგი შესაბამისობაში მოვიდა საერთაშორისო სტანდარტებთან. კომისიამ 11 თვეში ქრონიკული ავადმყოფობის და ხანდაზმულობის გამო 100-ზე მეტი მსჯავრდებული გაათავისუფლა. წინა 3 წლის განმავლობაში ამ მექანიზმით არცერთი მსჯავრდებული არ გათავისუფლებულა;
მინისტრის ინფორმაციით, სასჯელაღსრულების სამინისტროში მიმდინარეობს 24 ინფრასტრუქტურული პროექტი, რომელიც პატიმართა საცხოვრებელი პირობების გაუმჯობესებას და საერთაშორისო მოთხოვნებთან შესაბამისობაში მოყვანას ითვალისწინებს.
ანგარიშში ნათქვამია, რომ სასჯელაღსრულების სისტემაში მიმდინარე რეფორმის ფარგლებში განსაკუთრებული ყურადღება მიექცა შიდა რეგულაციების შემუშავებას, გაუმჯობესდა გენერალური ინსპექციის ფუნქციონირება და ორგანიზაცია. 2012 წლის 1 ნოემბრიდან 2013 წლის 1 ნოემბრამდე სამინისტროს გენერალური ინსპექციაში 1317 განცხადება-საჩივარი შევიდა. ეს რიცხვი, 2.5-ჯერ აღემატება 2010 წლის 1 იანვრიდან 2012 წლის 1 ნოემბრამდე შესულ საჩივრებს, რაც სისტემის გახსნასა და გამჭირვალობაზე მიუთითებს. განცხადებების შემოწმების საფუძველზე სისტემის 222 თანამშრომლის მიმართ განხორციელდა დისციპლინური ღონისძიება. 79 პირი სისტემიდან იქნა დათხოვნილი, მათ შორის 32 არაადამიანური მოპყრობის ფაქტზე; სამუშაო საათებში ამოქმედდა გენერალური ინსპექციის ცხელი ხაზი, რომლის ფუნქციონირება, სამომავლოდ, 24-საათიან რეჟიმში იგეგმება. სასჯელაღსრულების დაწესებულებებში აღიკვეთა პატიმრის მიმართ არაადამიანური და ღირსების შემლახავი მოპყრობის წესები.
მინისტრის განცხადებით, შედეგიანი იყო საგამოძიებო დეპარტამენტის მუშაობაც. მიმდინარე წელს სასჯელაღსრულების, პრობაციისა და იურიდიული დახმარების საკითხთა სამინისტროს საგამოძიებო დეპარტამენტში გამოძიება დაიწყო 578 საქმეზე; სასამართლოში კი 46 საქმე გადაიგზავნა. ეფექტიანობის გაზრდის მიზნით, მომავალში აღნიშნული დეპარტამენტის გაფართოება იგეგმება.
სოზარ სუბარმა პრობაციის ეროვნულ სააგენტოში, სასჯელაღსრულებისა და პრობაციის სასწავლო ცენტრსა და იურიდიული დახმარების სამსახურში მიმდინარე წელს განხორციელებულ ცვლილებებზეც ისაუბრა და განაცხადა, რომ თითეული მათგანის მუშაობა წარმატებული აღმოჩნდა.
ანგარიშის წარდგენის შემდეგ სასჯელაღსრულების, პრობაციისა და იურიდიული დახმარების მინისტრმა ჟურნალისტების დასმულ შეკითხვებს ამომწურავად უპასუხა.
