“ნაციონალები” ბოლო წუთამდე ებღაუჭებიან სკამებს, მაგრამ ეს მალე დასრულდება”

_ ახალ გუბერნატორს თუ იცნობდით?

_ გიორგი ჩხაიძეს ვიცნობ ერთი წელია, ძალიან ბევრი საერთო ახლობელი გვყავს, იმათი მეშვეობით მოხდა ჩვენი გაცნობა. არავინ არ ველოდით, რომ გიორგი გახდებოდა გუბერნატორი, რადგან პოლიტიკიდან შორს იყო და მისი მისწრაფება არ იყო პოლიტიკაში ყოფნა, სულ კერძო ბიზნესში იყო, პიროვნულადაც სულ სხვა ადამიანია, არ არის კარიერისტი და არ ესწრაფვის დიდებას. ამიტომ, ეს გადაწყვეტილება ყველასთვის მოულოდნელი იყო. სიტყვები არ მყოფნის დავახასიათო, იმდენად დადებითი ადამიანია. მე რომ არ ვთქვა, ლანჩხუთის საზოგადოებამ ჩემზე უკეთ იცის მისი და მამამისის ნაკეთები კეთილი საქმეების შესახებ. მოახლეობა მინდა დავამშვიდო, ისინი საიმედო ხელში არიან.

_ მას შემდეგ რაც  ახალი გუბერნატორი მოვიდა, გავრცელდა ხმა, თითქოს ვიცე გუბერნატორად შესაძლოა რევაზ ჩიტიძე დაინიშნოს. თქვენი აზრით, თუ რეზო ჩიტიძე დაინიშნა ვიცე გუბერნატორად, რა რეაქცია მოჰყვება ამას საზოგადოების მხრიდან?

_ როდესაც პირველი შეხვედრა გუბერნატორმა ლანჩხუთში დაგეგმა, მე ვესწრებოდი ამ შეხვედრას, კულუარულად გავრცელდა ეს ინფორმაცია, მაგრამ ღრმად ვარ დარწმუნებული, რომ გოგიტა არ გადადგამს ისეთ ნაბიჯს, რომ საზოგადოების გაღიზიანება გამოიწვიოს. მან თქვა კიდეც, რომ ყველაფერი ისე იქნება, როგორ მოსახლეობას სურს. რაც შეეხება რეზოს, გიორგის ის დიდი ხნის წინ იცნობდა, მაშინ როცა გოგიტა და მამამისი ქველმოქმედებას ეწეოდნენ, რეზო თანამდებობის პირი იყო და აქედან მოხდა მათი დაახლოება, თავისთავად მიიჩნევს კიდეც გოგიტა მას თავის მეგობრად. რეზოს არის თავისი საქმის პროფესიონალი. კარგი ეკონომისტი, კარგი მენეჯერი, რომლის ფუფუნებაც ლანჩხუთის რაიონს არ გააჩნია. მინდა ისიც ვთქვა, რომ სხვებისგან განსხვავებით, რეზომ ყველაზე ადრე გააცნობიერა, რომ ხელისუფლება შეიცვალა. ზოგიერთებივით არ დაუწყია ჭიდილი. 

_ არის თუ არა საკრებულოსა და გამგეობის აპარატებზე ისევ ნაციონალების ზეგავლენა?

_ ჭიდაობდნენ ბოლომდე, რომ შეენარჩუნებინათ თავიანთი ზეგავლენა. ავიღოთ თუნდაც მაგალითად გამგეობის აუდიტის სამსახური, რომელიც ატარებს აუდიტს, ყველა ანგარიში უკვე წარედგინა საკრებულოს, მაგრამ დღემდე არცერთ საკითხზე საკრებულოს მკაცრი ზომები არ მიუღია, მიუხედავად იმისა, რომ დარღვევები საკმაოდ ბევრია.

საბოლოო წერტილი, ადგილობრივი არჩევნების შემდეგ დაისმება. როცა მართლა ხალხის მიერ არჩეული საკრებულო გვეყოლება. 

_ ანუ, არჩევების შემდეგ მოხდება სამართლიანობის აღდეგენა?

_ საკრებულოს რაც შეეხება, სწორედ, რომ ასე ვფიქრობ, მაგრამ ვნახოთ როგორ განვითარდება მოვლენები.

_ კონკურსის გადადებაზე რა აზრის ხართ?

_ უნდა გადადებულიყო, ამას ვეთანხმები, ახალი არჩევნების დროს ხდება თვითმმართველობის რეფორმა, რა აზრი ჰქონდა ამ კონკურსის გამოცხადებას? ზოგადად კონკურსი უნდა ჩტარდეს, თანაც მიუკერძოებლად.

დიპლომების საკითხსაც მინდა შევეხო, მე შემიძლია დავასახელო უამრავი ისეთი უდიპლომო ადამიანი, რომელიც ძალიან ძლიერია, მაგრამ არის ისეთი დიპლომიანი ადამიანი, რომელმაც 11 ათასი ლარი აზარალა ბიუჯეტს და დღესაც საკრებულოში ზის. 

_ ძველი ხელმძღვანელების ზეგავლენა თუ შეინიშნება?

_ ეს შეინიშნება არა მარტო ლანჩხუთში, არამედ მთელ საქართველოში, ეს ის რგოლია, რომელიც ასეა თუ ისე მაისის არჩევნებამდე ისე ძველი ხალხით არის დაკომპლექტებული.