“საზოგადოება არასდროს შეეგუება მკვლელებისა და ჯალათების დაუსჯელად დატოვებას”

პატიმრების მდგომარეობასთან დაკავშირებით ისაუბრა დღეს უფლებადამცველმა ლაშა ჩხარტიშვილმა. მისი განცხადებით,  ციხეებში 1000 მეტი პატიმარი შიმშილობს და მათი ჯანმრთელობის მდგომარეობა საგანგაშოა. უფლებადამცველმა ხელისუფლებას ორი მოთხოვნა წაუყენა.

“მოვითხოვთ, დაუყოვნებლივ და უახლოეს დღეებში დასახელდეს თარიღი თუ როდის აპირებენ მართლმსაჯულების ხარვეზების შემსწავლელი კომისიის შექმნას და მეორე, დაისაჯონ მკვლელები, დამრბევები, ხაზინის ქურდები და ისინი დასვან არა თბილ სავარძლებზე, არამედ იმ სკამებზე, სადაც მათი ადგილია. კომისიის შექმნის გაურკვეველი ვადით გადადება ნიშნავს იმას, რომ დამნაშავეები დაუსჯელი დარჩნენ, დაწყებული სააკაშვილიდან, მისი მინისტრებით დამთავრებული, ხოლო უკანონო პატიმრები დატოვონ უფლებააყრილები”.

ჩხარტიშვილის განცხადებით, თუ მთავრობა სწრაფ რეაგირებას არ მოახდენს, საზოგადოებაში კიდევ უფრო გაიზრდება უკმაყოფილება, რამაც შესაძლოა დიდი და მაშტაბური პროტესტი გამოიწვიოს. მისი თქმით, საზოგადოება არასდროს შეეგუება მკვლელების და ჯალათების დაუსჯელად დატოვებას.

“ვაზაგაშვილის, რობაქიძის, გირგვლიანის ოჯახის წევრები იმედის თვალით უყურებდნენ ხელისუფლებას, მაგრამ ხედავენ, რომ მკვლელები და მკვლელებების მფარველები რჩებიან დაუსჯელები. ჯალათები და მკვლელები ინიშნებიან მაღალ თანამდებობებზე შინაგან საქმეთა სამინისტროში, პოლიციასა თუ პროკურატურაში”.

სანრდო გვირგვლიანის მკვლელობაზე გაამახვილეს ყურადღება არასამთავრობო ორგანიზაციებმა და გიორგი ღვინიაშვილისთვის დეპუტატის იმუნიტეტის შეჩერება მოითხოვეს. მოთხოვნა ლევან ჩიტაძემ, რატი მაისურაძემ და მიხეილ კაჭკაჭიშვილმა გაასაჯაროვეს. მათი თქმით, ამ საქმის უშუალო შემსრულებლები უნდა დაისაჯონ.

“გვირგვლიანის საქმის ირგვლივ დღეს დადგა ის მომენტი, როდესაც ამ საქმის უშუალო შემსრულებლები უნდა დაისაჯონ. არ არის გამორიცხული, რომ ღვინიაშვილის ჩვენების საფუძველზე მოხდეს ადეიშვილისთვის და მერაბიშვილისთვის ბრალის დამძიმება. არსებობს ეჭვი, რომ ეს ადამიანები უშუალოდ იყვნენ ჩართული დანაშაულის დამალვაში. ჩვენი მოთხოვნაა, აღდგეს სამართლიანობა ამ საქმეში და ყველა პირი იყოს დასჯილი. ამ პროცესებს გაგრძელება საქართველოს პარლამენტში უნდა მოჰყვეს და ღვინიაშვილს უნდა შეუჩერდეს დეპუტატის იმუნიტეტი”, _ ნათქვამია განცხადებაში.

მართლმსაჯულების დამდგენი კომისიის შექმნაზე ხელისუფლების პოზიციაზე ესაუბრა დღეს პარლამენტის ადამიანის უფლებთა დაცვის კომიტეტის თავმჯდომარე ეკა ბესელია გეგუთის ციხის მოშიმშილე პატიმრებს. სამსაათიანი შეხვედრის შემდეგ უმრავლესობის წარმომადგენელი იმედს იტოვებს, რომ მსავრდებულები შიმშილობას შეწყვეტენ.

“პატიმრების მიერ შიმშილობის დაწყება არ არის ულტიმატუმი. ძალიან ბევრი ზის უკანონოდ გასამართლებული და ცდილობენ იპოვონ გამოსავალი, ცდილობენ სამართლიანობის აღდგენას. ვისაუბრეთ ყველა პრობლემაზე. იმედი მაქვს, რომ ისინი შიმშილობას შეწყვეტენ. ამის შემდეგ გაცილებით ადვილი იქნება ინდივიდუალურად კონკრეტული საკითხები გავლა. რაც შეეხება განაჩენების გადახედვას, ამაზე ვისაუბრეთ და ავუხსენი, რომ ეს დროში გაწელილი პროცესია, ჩვენ ამაზე ვმუშაობთ, ფიქრი არ შეგვიწყვეტია, ხელისუფლებას ნამდვილად აქვს განწყობა, რომ რაც კი შესაძლებელია, კანონის ფარგლებში, გაკეთდეს პატიმრებისთვის, როგორც მათი მდგომარეობის ყოფის შემსუბუქების, ასევე მათი შემდგომი სამართლებრივი პროცედურების გამოყენების გზით, მათაც ეს ძალიან კარგად გაიგეს. ვფიქრობ, როდესაც ეს შიმშილობის აქცია დასრულდება, გაცილებით უფრო კონსტრუქციული გახდება თანამშრომლობა”.

ხელისუფლების მიერ დაპირებების შესრულების არ სჯერა “ლეიბორისტული პარტიის” წევრს გიორგი გუგავას და აცხადებს, რომ მთავრობამ მხოლოდ თავისი ოცნებები აიხდინა. მან დღეს კიდევ ერთხელ აღნიშნა, რომ არსებული ხელისუფლების მიერ სამართლიანობის აღდგენის დაჯერება იგივეა, რაც “კედელს ცერცვი შევაყაროთ და გვჯეროდეს, რომ კედელი ცერცვს დაიკავებს”.