“ამ წელს, სოციალურად დაუცველთა ბაზაში 1 100 ადამიანი დაფიქსირდა. მანამდე იყო ჯერ 700, შემდეგ _ 800, გაიზარდა 900-მდე და უკვე 1100 ოჯახია ასეთი.” _ მესტიის გამგებელი, კახა ჟორჟოლიანი “გურია ნიუსთან” საუბრისას აცხადებს, რომ ასეთი ოჯახების რაოდენობა წლებთან ერთად მატულობს. ეს კი იმას ნიშნავს, რომ ადამიანებს უჭირთ და დახმარებას ხელისუფლებისგან ელოდებიან.
ექსპერტების საკმაოდ დიდი ნაწილი მიიჩნევს, რომ რეგიონის განვითარებისთვის მნიშვნელოვანია მსხვილი ინფრასტრუქტურული პროექტების განხორციელება.
ილია ჭავჭავაძის სახელობის უნივერსიტეტის პროფესორი გიორგი აბაშიშვილი ასეთ პროექტად ხუდონჰესს მიიჩნევს.
“ამ პროექტით, 6 წლის განმავლობაში განხორციელებული ინვესტიცია მილიარდ დოლარზე მეტია, რაც სერიოზული სარგებელია ქვეყნისთვის. ამავე პერიოდში (2014-2020 წლებში), ის გამოიწვევს მშპ-ს 1 %-ით ზრდას ანუ ეს მხოლოდ მშენებლობის აქტიურ ფაზაში. ამავე წლებში, სახელმწიფო ბიუჯეტი საშემოსავლო და ქონების გადასახადების სახით მიიღებს 26 მილიონ ლარს, ხოლო თვითონ სვანეთისთვის ეს გადასახადი 5 მლნ ლარით განისაზღვრება. ექსპლუატაციის პერიოდში, სახელმწიფო ბიუჯეტს შეემატება დამატებით 57 მილიონი ლარი, მათ შორის ადგილობრივ ბიუჯეტს – 18 მლნ ლარი. ელექტროენერგიის სიმძლავრე კი 470 მლნ კვ/სთ-ით გაიზრდება, რაც ელექტროენერგიის საფასურს 5,84 ცენტამდე შეამცირებს. საბოლოო ჯამში, 34 მლნ დოლარის ეკონომიას მივიღებთ. მნიშვნელოვანია საექსპორტო პოტენციალის ზრდაც, ხოლო ქართულ კომპანიებს ელექტროენერგიის ტრანსპორტირებით უჩნდებათ დამატებით 19 მლნ დოლარი. ეს არის ნაწილი ეკონომიკური ეფექტის, რომელიც ყველა გათვლიდან ჩანს.
რაც მთავარია, პროექტის განხორციელება ენერგოდამოუკიდებლობისთვის აპრიორია. ვფიქრობ, ამ შემთხვევაში კითხვის ნიშანიც არ ჩანს. ეს არის უმნიშვნელოვანესი რესურსი, რაც საქართველოს აქვს. არც ერთ შემთხვევაში არ უნდა ვთქვათ უარი ხუდონჰესზე, თუ ქვეყნის ეკონომიკურ განვითარებაზე გვაქვს ორიენტირი.”
რა მოსაზრება აქვს ამასთან დაკავშირებით მესტიის გამგებელს, და როგორ ხედავს აღნიშნული პროექტის განხორციელებას, “გურია ნიუსი” ამასთან დაკავშირებით კახა ჟორჟოლიანს ესაუბრა.
_ბატონო კახა, სახელმწიფოს დაგეგმილი აქვს საკმაოდ დიდი პროექტის, ხუდონჰესის მშენებლობა მესტიის რაიონში და ამისთვის მოსამზადებელი სამუშაოები უკვე დაწყებული აქვს. პროექტს ჰყავს მომხრეებიც და მოწინააღმდეგეებიც. თქვენ, როგორც მესტიის გამგებელს, რა მოსაზრება გაქვთ ხუდონჰესის მშენებლობასთან დაკავშირებით?
_ თუ ჩვენ სახელმწიფოს განვითარება გვინდა, ენერგოდამოუკიდებლობა უმნიშვნელოვანესია. ასევე მნიშვნელოვანია ეს პროექტი ადგილობრივი ეკონომიკისთვის, რადგან ადგილობრივი წარმოება რომ განვითარდეს, ამისთვის გენერაციის დამოუკიდებელი წყარო უნდა არსებობდეს. მაგრამ, ამ ყველაფერთან ერთად აქ აუცილებლად გასათვალისწინებელია მოსახლეობის აზრი. რამდენად არის ამისთვის მზად ადგილობრივი მოსახლეობა, მზად არიან ისინი სახელმწიფოს ინტერესებისთვის დათმონ თავიანთი საცხოვრებელი? ამ ყველაფერს სიფრთხილით მოკიდება ჭირდება და კარგად უნდა გავიაროთ ეს ყველაფერი.
