რაც შეეხება საკითხს თუ რა გაკეთდა რაიონში, მისი მაჟორიტარობის განმავლობაში კონკრეტულს ვერაფერს ამბობს. მხოლოდ სამთავრობო სოფლის პროგრამას იხსენებს და აღნიშნავს, რომ ამით მოსახლეობა კმაყოფილია. ჩხაიძე თვლის რომ პარლამენტში ხმამაღალი გამოსვლები მას არ ეხერხება და ურჩევნია საქმე ჩუმად აკეთოს. შეგახსენებთ რომ, ლანჩხუთის რაიონის მაჟორიტარის თეიმურაზ ჩხაიძის გამოსვლა მერვე მოწვევის პარლამენტში ამ დრომდე არავის უნახავს და სავარაუდოდ კიდევ 3 წლის განმავლობაში ვერ ნახავენ.
_ რა ინფორმაცია გაქვთ, ლანჩხუთის გამგებლად ბორის ჭყონიას შესაძლო დანიშვნის ფაქტზე?
_ მე ადგილზე ჩავალ, გავარკვევ ყველაფერს. ვნახავ იქ რა ინფორმაციაა. უბრალოდ რაღაც დონეზე მოვიდა ინფორმაცია, რომ ბორის ჭყონია გამგებლად მოიაზრება. ჯერ არაფერი არ ვიცი. ყოველ შემთხვევაში ზაზა ურუშაძე ამ დრომდე განაგრძობს მუშაობას.
_ გაქვთ თუ არა ინფორმაცია ვისი კანდიდატურაა ბორის ჭყონია და ვინ უჭერს მას მხარს ამ თანამდებობაზე?
_ ეს ყველაფერი გასარკვევია. ისე მოულოდნელად მოხდა ყველაფერი. თბილისიდან რომ მოვდიოდი მაშინ გავიგე. ჯერ ლანჩხუთში არც ჩავსულვარ და არ ვიცი რა ხდება.
_ ცნობილია, რომ ზაზა ურუშაძე თქვენს მიერ მხარდაჭერილი კანდიდატია გამგებლის პოსტზე, თქვენ როგორ ფიქრობთ, რატომ დადგა დღის წესრიგში თქვენს მიერ მხარდაჭერილი კანდიდატის მოხსნა?
_ ჯერ ერთი ჩემი კანდიდატი არ იყო. მე შეიძლება მინდოდეს ვინმე რომელიმე თანამდებობაზე, მაგრამ ასე არ გამოვა. ახლა მოდის არჩევნები, თვითონ ხალხი გადაწყვეტს. ხალხმა იცის რაიონში ვინაა წესიერი კაცი და ვის შეიძლება ენდო და ვის არა. თვითონ ხალხი მიიღებს გადაწყვეტილებას. მე საერთოდ არ ვერევი გამგებლის დანიშვნის საკითხში.
_ როგორ შეაფასებთ თქვენი მაჟორიტარობის პერიოდს, რა გაკეთდა ამ ხნის განმავლობაში ლანჩხუთისთვის?
_ სოფლის პროგრამებით დავიწყებ, ხალხი ვისთანაც კი მქონია შეხვედრა კმაყოფილია უმრავლესობა და განსაკუთრებით ის ხალხი, ვისაც შრომა უყვარს. რომელ ოჯახშიც მოვხვდი ყველა მადლიერია იმისთვის, რომ მოსავალი აქვთ, სიმინდი აქვთ, ლობიო აქვთ. ვისაც უნდა ყველა კმაყოფილია. ზოგი ისეთიც კი შემხვდა და მითხრა მთავრობა რატომ არ მითოხნის ყანასო.
_ თქვენი გამოსვლა საპარლამენტო ტრიბუნასთან რაიონის პრობლემებზე სასაუბროდ არავის ახსოვს, ამ ფაქტს როგორ ახსნით?
_ მე საერთოდ მორიდებული კაცი ვარ. ვერიდები სახალხოდ გამოსვლებს. ეს უნდა იკითხოთ ხალხში , როგორ ვეხმარები მათ და რას ვაკეთებ ლანჩხუთში. არ ყოფილა შემთხვევა რომ ვინმესთვის ყურადღება არ მიმექცია. მართალია ყველა პრობლემა არ გაადჭრილა, მაგრამ უყურადღებოდ არავინ დარჩენილა. თუ შემძლებია საქმე გამიკეთებია. მთავარი არ არის გამოჩნდე, მთავარია შენი რაიონი და ხალხი გიყვარდეს.გაკეთებული საქმის გამო მადლობები ამომრჩევლისგან ტელეფონითაც კი მომისმენია არც კი მინახავს ზოგი ისინი, ისე მომიგვარებია მათთვის პრობლემები.
შეგახსენებთ, რომ საპარლამენტო არჩევნების შემდეგ, ლანჩხუთის გამგებლად ზაზა ურუშაძის დანიშვნის ფაქტი სწორედ თეიმურაზ ჩხაიძის ფაქტორმა განაპირობა. ურუშაძის აღნიშნულ პოსტზე დანიშვნამ გასულ წელს, საკმაოდ დიდი უკმაყოფილება გამოიწვია “ქართული ოცნების” წევრებსა და აქტივისტებს შორის, რადგან მათი განცხადებით, არ იცოდნენ ვინ იყო ურუშაძე და არ სურდათ გამგებელი, რომლის საქმიანობისა და პარტიულობის შესახებ არაფერი იცოდნენ. თუმცა, მიუხედვად პროტესტისა ზაზა ურუშაძის გამგებლად დანიშვნა ლანჩხუთის საკრებულოს მიერ მაინც მოხდა და ის მაშინ თეიმურაზ ჩხაიძის კანდიდატად ითვლებოდა.
