“მე, როგორც საკრებულოს თავმჯდომარე ჩემს კოლეგებთან ერთად, მზად ვარ დავიცვა ამ ადამიანების უფლებები და დავარწმუნო ისინი, რომ ვერავინ შეძლებს მათზე უკანონო ზეწოლას. ამისთვის ამ ხალხს შეუძლია დარეკოს საკრებულოს ცხელი ხაზის ნომერზე რომელიც 24 საათის მანძილზე იქნება ჩართული 595 07 15 34, 595 07 15 36, გარდა ამისა, მინდა მივმართო იმათაც, რომლებსაც სხვადასხვა ფორმით აბრუებენ და ატყუებენ, თითქოს იგეგმება
ახალი ხელისუფლებისგან მათ სამსახურებიდან დათხოვნა, არ დაიჯერონ ეს ცრუ ინფორმაცია და არ წამოეგონ პროვოკაციაზე. ჩვენ ვუფრთხილდებით იმ კადრებს, რომლებიც იყვნენ, არიან და იქნებიან მერიაში, მიუხედავად იმისა, თუ ვინ იქნება დედაქალაქის მერი”.
შიხიაშვილმა აღნიშნა, რომ მნიშვნელოვანი საკითხია მერია ღირსეული და პროფესიული კადრებით იყოს დაკომპლექტებული. მისი თქმით კადრებთან დამოკიდებულების დროს მნიშვნელობა პოლიტიკურ შეხედულებას და პარტიულობას არ აქვს.
“ტყუილია, თითქოს მთავრობა აპირებს უგულავასდროინდელ კადრებზე იყაროს ყოფილი მერის ჯავრი. ჩვენ ერთად უნდა ვაშენოთ უკეთესი მომავალი და ყველაფერი გავაკეთოთ თბილისელების კეთილდღეობისთვის”.
საკრებულოს თავმჯდომარე ამ ეტაპზე თავს იკავებს იმ გამგებლებისა და მაღალჩინოსნების ვინაობების დასახელებისგან, რომლებიც საჯარო მოხელეებზე ახდენენ ზეწოლას. შიხიაშვილი აცხადებს, რომ არანაირი ზეწოლა არ მიმდინარეობს “ნაციონალური მოძრაობის” წევრებზე და საჭიროა ყველამ პატივი სცეს სასამართლოს გადაწყვეტილებას.
საკრებულოს თავმჯდომარემ ყველა მედიასაშუალებას მიმართა თხოვნით საზოგადოებამდე მიიტანონ ცხელი ხაზის ნომერი. “გურია ნიუსი” კიდევ ერთხელ იმეორებს ამ ნომრებს:
595 07 15 34, 595 07 15 36
ცხელი ხაზი მუშაობს 24 საათის განმავლობაში.
