საქმე ეხება ზ.მ.-ს მიერ ნარკოტიკული საშუალების მიღებას. რამდენიმე დღის წინ, ოზურგეთის პოლიციის მაღალჩინოსნებმა, რომელთა შორის სისასტიკით გამოირჩეოდა პოლიციის უფროს ირაკლი შავიშვილის მოადგილე რწმუნებულების ხაზით, კახა კილაძე, ზ.მ სასტიკად სცემეს.
პოლიციელებმა რამდენიმე დღის წინ, ღამით, ეჭვის ნიადაგზე აიყვანეს ზ.მ. და მასთან თანმხლები ერთი პირი ოზურგეთის მუნიციპალიტეტის სოფელ ქაქუთის ხიდის სიახლოვეს, სასაფლაოსთან ახლოს. ადგილზე სასტიკად სცემეს ორთავე და შემდეგ კი ბათუმში, ერთ-ერთ საავადმყოფოში გადაიყვანეს. იქ ზ.მ.-ს უტარებდნენ მრავალ პროცედურას, აწამებდნენ, ასმევდნენ პირდაპირ ონკანიდან გამომავალ ტექნიკურ წყალს, მისგან ითხოვდნენ აღიარებას, აფურთხებდნენ და ემუქრებოდნენ, რომ სიკვდილს მოანატრებდნენ, საკუთარ თავს თავისი ხელით ჩამოახრჩობინებდნენ კამერაში.
სასტიკად ნაცემი ზ.მ., როგორც წყარო გვეუბნება, თხოვდა მათ, რომ შეეწყვიტათ მისი წამება და ყველაფერს დაიბრალებდა, იმასაც, რაც მას არ ჩაუდენია. მიუხედავად ამისა, მის წამებას განაგრძნობდნენ. წიხლებით სცემდნენ, აგინებდნენ ოჯახის წევრებს, ამცირებდნენ ფურთხებით და ეძახდნენ –“ხომ არ გგონია, რაიმე შეიცვალა, ჩვენს პოლიციაში ძველებურად ვართ და მოგსპობთ. თუ ცემა არ გინდა, ითანამშრომლე ჩვენთან, ფული იქნება, ოღონდ დაგვაჭერინე ნარკომანები და კრიმინალები.”
შემდეგ ის ბათუმის საავადმყოფოდან წყალწმინდაში, ექსპერტიზაზე გადაიყვანეს, სადაც ხელახლა ჩაუტარდა ექსპერტიზა, რომელიც ყოველგვარი კანონდარღვევით, ფიზიკური და სულიერი შეურაცხყოფით მიმდინარეობდა. წყაროს თქმით, ზ.მ. არ უარყოფს, რომ ის იმ დროს იმყოფებოდა ნარკოტიკული საშუალების ზემოქმედების ქვეშ.
ჩვენი წყაროსვე ცნობით, დაზარალებულის მიმართ ცემის პროცესს ესწრებოდა პოლიციის უფროსი ირაკლი შავიშვილი, თუმცა ის აქტიურობით არ გამოირჩეოდა. ნაცემი დაზარალებული ნახა პროკურორმა. წყალწმინდის ნარკოლოგიურ ცენტრში ნაცემი დაზარალებულის არაერთი ფოტო არსებობს.
ყოველივე ამის შემდეგ, სასამართლომ ზ.მ.-ს 500 ლარიანი ჯარიმა დააკისრა. თუმცა, მას კილაძემ კვლავ შეუთვალა, რომ მოსპობს, გაანადგურებს, წამალს ჩაუდებს და თუ ქუჩაში გამოვა, საბოლოოდ მაინც დაიჭერს.
ჩვენ ასევე გვაქვს ინფორმაცია, თუ რას უკავშირდება, პოლიციის მაღალჩინოსნის კახა კილაძის მიერ დაზარალებულის მიმართ არაადამიანური მოპყრობა. ეს არის პირადი ინტერესი, რომელიც ცხოვრებისეულია, თუმცა როგორც გვითხრეს, სასაცილო და უსაფუძვლო. “გურია ნიუსი” ამ დეტალებს სწავლობს და საზოგადოებას უახლოეს დღეებში გააცნობს.
ჩვენ შევეცადეთ, უშუალოდ დაზარალებულისგან მოგვესმინა კომენტარი, თუმცა ის ამ ეტაპზე ჟურნალსიტებთან დუმილს ამჯობინებს. მას დღესაც სახესა და ტანზე სასტიკი ცემის კვალი აქვს. კომენტარი გააკეთა დაზარალებულის მამამ ლ.მ.-მ, რომელმაც მომხდარი “გურია ნიუსთან” დაადასტურა და აღნიშნა, რომ მას არ სურს გაერიოს ამ ამბავში.
“კი, იყო ნაცემი, თუმცა მე რა გითხრათ. არის სრულწლოვანი და მის თავს თვითონ მიხედოს, მე არ მინდა ამ ამბავში ჩავერიო. შეიძელბა ღირსიც იყო, რაც მოუვიდა”, _გვითხრა მამა.
“გურია ნიუსი” მთელი წლის განმავლობაში წერდა ოზურგეთის მუნიციპალიტეტში რეზონანსული დანაშაულებების, (მკვლელობები, ყაჩაღური თავდსახმები და ძარცვა, მასშტაბური მსხვილი თუ წვრილმანი ქურდობები) შესახებ, რომლებიც ჯერ საერთოდ გაუხსნელია. ამ ფონზე, შედარებით უმნიშვნელო დანაშაულის ჩამდენ პირებს, პოლიციელთა მაღალჩინონსების გუნდი სასიკვდილოდ სცემს, მისგან თანამშრომლობას ითხოვს და შანტაჟისა და მუქარის გზით, სასურველი ინფორმაციების მიღებას ითხოვს.
ჩვენ დავუკავშირდით ოზურგეთის რაიონული სამმართველოს უფროს ირაკლი შავიშვილს და მის მოადგილე კახა კილაძეს, რომლებმაც აღნიშნული ფაქტი და ინფორმაცია კატეგორიულად უარყვეს.
_ ბატონო კახა, გვაქვს ინფორმაცია, რომ ოზურგეთის მუნიციპალიტეტის სოფელ ჭანიეთის მკვიდრი ახალგაზრდა მამაკაცი, რომელიც იმყოფებოდა ნარკოტიკული ზემოქმედების ქვეში, სასტიკად ნაცემია თქვენი და თქვენი ჯგუფის მიერ...
_ ვერ გავიგე, რაზე მეუბნები?
_ ეს ფაქტი მოხდა ქაქუთის ხიდთან ახლოს, ღამით, რამდენიმე დღის წინ, სადაც დააკავეთ აღნიშნული პირი და მასთან მყოფი კიდევ ერთი პირი, ორივე სასტიკად სცემეთ, მაგრამ განსაკუთრებით აგრესიული იყავით ზ.მ.-ს მიმართ. ამბობენ, რომ მის მიმართ პირადი ინტერესი გაგაჩნიათ…
_ ეს ინფორმაცია სიმართლეს არ შეესაბამება.
_ როგორც ჩვენი წყარო გვატყობინებს, ზ.მ. არ უარყოფს, რომ ის ნარკოტიკული ზემოქმედების ქვეშ იყო და ამას აღიარებდა კიდეც, თუმცა თქვენ ეს არ იკმარეთ, ხელებშეკრულს სასტიკად სცემდით, დააშანტაჟეთ, დაემუქრეთ რომ მომავალში ნარკოტიკს ჩაუდებდით, თუ ქუჩაში გამოვიდოდა. ცემის ფოტო მასალა, როგორც წყარომ გვითხრა, ნამდვილად არსებობს…
_ ყველაფერი ტყუილია რასაც მეუბნებით, მსგავსი ფაქტი ნამდვილად არ მომხდარა.
გადამოწმება ოზურგეთის პოლიციის სამმართველოს უფროსთან, თავად ირაკლი შავიშვილთანაც ვცადეთ, რომელმაც კატეგორიულად უარყო ამ ფაქტის შესახებ და გვითხრა, რომ კომენტარის გაკეთების უფლება არ ჰქონდა. შსს-ს ოზურგეთის რაიონული სამმართველოს უფროსი კატეგორიულად გვთხოვდა ამ ინფორმაციის გადამოწმებას, თუმცა სად, ამას ვერ გვიკონკრეტებდა.
_ კატეგორიულად გაფრთხილებთ, გადაამოწმეთ ინფორმაცია!
_ ინფორმაციას, რომელიც სარწმუნო წყაროსგან მოვიპოვეთ, თქვენთან ვამოწმებთ ბატონო ირაკლი…
_ არ არის სიმართლე და ტყუილი არ დაწეროთ, ნუ შეგყავთ საზოგადოება შეცდომაში, გადაამოწმეთ ინფორმაცია კარგად.
_ ბატონო ირაკლი, სწორედ საზოგადოების დიდმა ნაწილმა გაიგო უკვე ამ მხეცური ქმედების შესახებ. ჰქონდა თუ არა მსგავს ფაქტს ადგილი, თქვენ ცემას არ ესწრებოდით?
_ კომენტარს ვერ გავაკეთებ.
_ როდესაც ამდენი უმძიმესი დანაშაულია გაუხსნელი ოზურგეთში, იჭერთ ნარკოტიკის ზემოქმედების ქვეშ მყოფს და აწამებთ? ჩენ არ ვამბობთ, რომ დამნაშავე არ უნდა დაისაჯოს, პირიქით, ყველა დამნაშავემ პასუხი უნდა აგოს, მაგრამ როგორ ფიქრობთ, პოლიცილებს ყველაფრის უფლება გაქვთ? მით უმეტეს, სასტიკი ცემისა და შანტაჟის? ასეთი გზით მოპოვებული ინფორმაციებით აპირებთ თქვენს მიერ გაუხსნელი უმძიმესი დანაშაულების გახსნას?
_ ტყულია ყველაფერი და რასაც გთხოვთ, ის გაითველისწინეთ, _ გვითხრა შავიშვილმა და ტელეფონი გაგვითიშა.
ჩვენ, მომხდარი ფაქტის შესახებ კომენტარი ვთხოვეთ ოზურგეთის რაიონული პროკურატურის პროკურორს, რომელმაც კომენტარი არ გააკეთა.
დავუკავშირდით, წყალწმინდის ნარკოლოგიური ცენტრის ექიმ ეკა დევაძეს, რომელმაც კომენტარი არ გააკეთა და უფროსთან როლანდ გაბაიძესთან გადაგვამისამართა, თუმცა ვინ მოგვცა მისი ტელეფონის ნომერი ამით დაინტერესდა.
ჩვენ დავუკავშირდით ასევე ნარკოლოგიური ცენტრის უფროს როლანდ გაბაიძეს, რომელმაც გვითხრა, რომ ნებისმიერი ინფორმაციისთვის პრესსამსახურს უნდა მივმართოთ
შსს-ს პრესსამსახური აღნიშნულ ფაქტთან დაკავშირებით “გურია ნიუსთან” ასეთ კომენტარს აკეთებს:
_ ამ ადამიანს, ნამდვილად აღმოაჩნდა ნარკოტიკი. როცა მას აკავებდნენ გადაუყლაპია ეს ნარკოტიკი, ამ ყველაფერს თვითონ აღიარებს, არსებობს აღიარებითი ჩვენებები. რაც შეეხება ფიზიკურ ზეწოლას პოლიციის მხრიდან, ამ ფაქტს ადგილი არ ჰქონია.
_ ჩვენ გვაქვს დაზარალებულის ოჯახის წევრების ჩანაწერები, არსებობს თვითმხილველი ადამიანები, რომლებმაც ნაცემი დაზარალებული ნახეს…
_ პოლიციის მხრიდან ფიზიკურ ზეწოლას ადგილი არ ჰქონია. ჩაეწერა აღიარებით ჩვენებაში თუ ასე იყო. ის არის მისი ჩვენება, რომელიც ფაქტია.
“გურია ნიუსი” განაგრძობს ამ თემაზე მუშაობას და მასალების მოკვლევას.
