ინიციატივა “მეტი მეტისათვის” ევროკავშირის იმ პარტნიორი ქვეყნების დამატებითი ფინანსური რესურსებით მხარდაჭერას ითვალისწინებს, რომლებმაც მნიშვნელოვან წარმატებას მიაღწიეს დემოკრატიული რეფორმების გატარების პროცესში.
პროექტის ძირითადი მიზანია ხელი შეუწყოს საქართველოს მთავრობას სიღარიბის დაძლევისა და სოციალურ-ეკონომიკური განვითარების მდგრადობის უზრუნველყოფის პროცესში.
თანხების ათვისება მოხდება აღმოსავლეთ პარტნიორობის ინტეგრაციისა და თანამშრომლობის პროგრამის (EaPIC) მეშვეობით, რომელიც მოხმარდება საქართველოში პროფესიული განათლებისა და გადამზადების და დასაქმების კუთხით მიმდინარე რეფორმების ხელშეწყობას, რაც თავის მხრივ, გულისხმობს აღნიშნულ სფეროებში სახელმწიფო პოლიტიკის გატარებაზე პასუხისმგებელი საჯარო უწყებების (განათლების და მეცნიერების სამინისტრო; შრომის, ჯანმრთელობისა და სოციალური დაცვის სამინისტრო) შესაძლებლობათა გაძლიერებას.
27 მილიონი ევროდან, 20 მილიონი ევრო საბიუჯეტო დახმარების სახით პირდაპირ სახელმწიფო ბიუჯეტში იქნება მიმართული, ხოლო 7 მილიონი ევრო მოხმარდება ტექნიკური/საექსპერტო დახმარების პროექტების განხორცილებას.
საფინანსო შეთანხმების ხანგრძლივობა 5 წლიანია და ითვალისწინებს:
• კერძო სექტორთან მჭიდრო თანამშრომლობით, შესაბამისი საჯარო უწყებების ინსტიტუციურ შესაძლებლობათა გაძლიერებას, რათა ეფექტურად განხორციელდეს შრომის ბაზრისა და მასზე არსებული საკვალიფიკაციო მოთხოვნების კოორდინაცია და მონიტორინგი;
• პროფესიული განათლებისა და გადამზადების სისტემის ხარისხის და აღნიშნულ სისტემაში კარიერის განმავლობაში გადამზადების პერსპექტივების როლის გაზრდას, რათა გაუმჯობესდეს დასაქმებულთა უნარებისა და კვალიფიკაციის შესაბამისობა შრომის ბაზრის მოთხოვნებთან;
• პოტენციური სტუდენტებისა და დამსაქმებელთათვის პროფესიული განათლებისა და გადამზადების სისტემის მიმზიდველობის გაზრდას და ამ სისტემაში დამსაქმებელთა ჩართულობის სტიმულირებას;
• შრომის ბაზარზე ქალთა ჩართულობის გაუმჯობესებას და პროფესიული განათლებისა და გადამზადების სისტემასთან უკეთესი ხელმისაწვდომობის უზრუნველყოფას.
