“ვითხოვთ გაუქმდეს უკანონოდ დაკომპლექტებული ბორდი”

ნანა ვალიშვილი (ეთნომუსიკოლოგი, ფოლკლორის სახელმწიფო ცენტრის კონსულტანტი, სრული პროფესორი): უკვე წლებია, კონკრეტულ პირთა ჯგუფი თავისი სატელევიზიო გამოსვლებით და საგაზეთო წერილებით საქართველოს ფოლკლორული ცენტრის დისკრედიტაციას ცდილობს, თუმცა დღემდე ეს ბრალდებები უპასუხოდ იყო დარჩენილი. სამწუხაროდ ახლა უკვე გაჩუმება აღარ შეიძლება, რადგან ამ ადამანების მზაკვრულმა ჩანაფიქრმა რეალურად საფრთხის წინაშე დააყენა ფოლკლორის ცენტრის არსებობა, ყოველ შემთხვევაში იმ სახით, რომლითაც მას ეროვნული საგანძურის მსახურება შეეძლო. სწორედ ამიტომ დუმილს ვარღვევთ და აღარავის ვაპატიებთ სიცრუესა და სიყალბეს. ფოლკლორის ცენტრთან შექმნილი სამეთვალყურეო საბჭოს შემადგენლობა მიუთითებს ორ შესაძლო ვარიანტზე-ერთი, მისი დამკომპლექტებელი არ იცნობდა ფოლკლორის სახელმწიფო ცენტრის სპეციფიკას, რადგან არ გაუთვალისწინებია ფოლკლორის სხვა დარგები მუსიკის გარდა და მეორე, საბჭოს შემადგენლობაში შეგნებულად არიან შეყვანილი ის ადამიანები, რომლებიც წლების განმავლობაში სცილობდნენ ცენტრის დისკრედიტაციას. შემადგენლობასაც რომ თავი დავანებოთ, სამეთვალყურეო საბჭო უმოკლეს დროში შეიქმნა ფარულად და გაუმჭვირვალედ. ჩვენ ისიც არ ვიცით ვინ წარუდგინა მინისტრს ეს კანდიდატურები და რა კრიტერიუმებით იხელმძღვანელა მინისტრმა მათი დამტკიცებისას. ჩვენ მოვითხოვთ დაიშალოს ბორდის შემადგენლობა და გამჭვირვალედ, კანონის ფარგლებში მოხდეს ახალი შემადგენლობის არჩევა.

ვალერიან კევლიშვილი(ცენტრის დირექტორის მრჩეველი): 31 წელია, რაც ცენტრში ვმუშაობ, დავიწყე უბრალო მეთოდისტად მუშაობა და გავიარე ყველა ნაბიჯი დირექტორის მოადგილეობამდე. 14 წელი ვიყავი ამ თანამდებობაზე და ჩემზე კარგად არავინ იცის ის ისტორია, რაც ცენტრმა გაიარა დღემდე. მე ვერ წარმოვიდგენდი, რომ ახალი ხელისუფლების დროს ასეთ დღეში ჩავვარდებოდით. ეს შენობა გიორგი უშიკიშვილის დაუღალავი შრომით იქნა გარემონტებული. ახლანდელი ბორდის არც ერთი წევრი, გარდა ფრიდონ სულაბერიძისა არც კი შემოსულა არასდროს შენობაში, სხვა სიტყვებით რომ ვთქვა არც კი გვკადრულობდნენ. მე დარწმუნებული ვარ, რომ გარკვეული ჯგუფი იბრძვის ყველაფერი ის ჩაიგდოს ხელში, რაც ამ ადამიანებმა საკუთარი ხელებით შექმნეს. ერთადერთი, რასაც უშიკიშვილს ედავებოდნენ არის ის, რომ ვერ მართეს ეს ადამიანი. სამართლებრივი საფუძველი არ არსებობს, ეს არის პირადი ინტერესები. ანზორ ერქომაიშვილის მიერ შეთავაზებული კანდიდატურა უყოყმანოდ მიიღო კულრუტის მინისტრმა. ჩვენი აღშფოთება გამოიწვია ბორდის უტაქტობამ, ჩუმად მიღებულმა გადაწყვეტილებამ და დირექტორის ჩუმად არჩევამ. საერთოდ არაფრად ჩააგდეს ცენტრი, ნუთუ იმის ღირსი არ ვიყავით, რომ გვცოდნოდა ვინ იქნება ჩვენი დირექტორი. ჩვენ ვითხოვთ კულტურის მინისტრთან შეხვედრას და კონკრეტულ კითხვებზე პასუხის გაცემას, კერძოდ ვითხოვთ გაუქმდეს უკანონოდ დაკომპლექტებული ბორდი, მათ მიერ მიღებული გადაწყვეტილება გამოცხადდეს უკანონოდ და ჩატარდეს გამჭვირვალე არჩევნები. მე მინდა მივმართო გიორგი დონაძეს, რომელსაც არ ვიცნობ, მაგრამ მინდა ვურჩიო, რომ კარიერაში წარმატებების მიღწევას აქვს თავისი დრო და ნუ იქნებით მართული ვინმეს ხელში, ჯობია ჯერ გამოცდილება დააგროვოთ, ნუ იჩქარებთ და წარმატება თავისთავად მოვა. არ გვინდა გავუსწროთ მოვლენებს, მაგრამ ბოლო ნაბიჯი იქნება სასამართლო. მინდა საზოგადოებამ კარგად გაიგოს-ჩვენ პიროვნებების წინააღმდეგი კი არ ვართ, არამედ იმ დამოკიდებულებისა, რომელსაც იჩენენ. რაც შეეხება კარების აჭედვას და პლაკატის “sos” ჩამოკიდებას, ეს არის სიმბოლური და ეხება ბორდს.

ფოლკლორის ცენტრის ყოფილი დირექტორი გიორგი უშიკიშვილი კი ბორდის მიერ ახალი დირექტორის დანიშვნას და მის განთავისუფლებას კიდევ ერთხელ ეხმიანება. სოციალური ქსელით წერს:

“მეგობრებო, რამდენიმე დღის წინ, როცა გავიგე ჩემი გათავისუფლების შესახებ, გავაკეთე პროგნოზი და ვთქვი, რომ სავარაუდო კანდიდატურა ფოლკლორის ცენტრის დირექტორისა იქნებოდა დონაძე. ახლა ალბათ, ყველა ხვდებით, რომ ჩემი გათავისუფლება იყო მიზანმიმართული, დადგმული შოუ ჩემს წინააღმდეგ და რომ არანაირ დარღვევას ადგილი არ ქონია. მინდა გითხრათ, რომ ლოტბარი დონაძე არის ანსამბლ “ბასიანის” ხელმძღვანელი. ამ ანსამბლს, რომელსაც სხვა ანსამბლებზე მეტი წვლილი არ მიუძღვის ხალხური შემოქმედების პოპულარიზაციაში, კულტურის სამინისტრომ 2014 წლიდან მიანიჭა სსიპ სტატუსი წლიური დაფინანსებით 240 ათასი ლარი. ეს – იმ დროს, როცა გორის ქალთა კაპელას, რომლის შემადგენლობაც 3-ჯერ მეტია და რომელსაც უდიდესი ღვაწლი მიუძღვის ქართული საგუნდო მუსიკის აღორძინებაში, წლიური დაფინანსება 130 ათასი აქვს. დასკვნა თქვენ გამოიტანეთ…”