“ეს არის სრული მარაზმი. არ შეიძლება მასობრივი ტვინის გადაკეტვა. ასე იყო 1992 წელს, როცა გამსახურდიას ჯიბრზე პოლიტიკაში შემოიყვანეს ჯაბა იოსელიანი და ყველას გვახსოვს “პროფესორი ქურდის” მიერ აშენებული დემოკრატია, თუმცა არც ჯაბას დროს ყოფილა მთავარი პროკურორი ყაჩაღი. ნამდვილად არასწორი ნაბიჯი იყო გადადგმული მაშინაც და ახლაც, როცა უმრავლესობა ცდილობს ფარცხალაძის მთავარ პროკურორად შენარჩუნებას”.
კუკავას თქმით, არ მოუსმენია უმრავლესობისგან განსხვავებული აზრი და მიიჩნევს, რომ ქართული საზოგადოება შეცდა არჩევნებზე გაკეთებული არჩევანით.
“უმრავლესობას არ გააჩნია საკუთარი აზრი, მათ არაფერი შეუძლიათ გარდა იმისა, რომ ხელები შლაგბაუმივით აწიონ და დაწიონ. სირცხვილია, როცა ისმის განცხადებები-რა მოხდა, იყოს მთავარი პროკურორი ყაჩაღი, მთავარია მოვალეობა შეასრულოს და „ნაცები“ დაიჭიროს. ის, რაც ხდება ფარცხალაძესთან დაკავშირებით, არის „ოცნების“ სრული კრახი. ნამდვილად შევცდით, როცა ამ ადამიანებს ჩავუგდეთ ხელში ქვეყნის სადავეები. მე არ მიმიცია მათთვის ხმა, მაგრამ ვარ საზოდაგოების ნაწილი და სწორედ ეს მაძლევს ამის თქმის უფლებას”.
კუკავას თქმით, უკვე წლებია მაფიის ერთი კლანი იცვლება მეორე კლანით და საზოგადოება იჭყლიტება ერთიანი კრიმინალური კასტის მმართველობის დროს.
“მაფიის ერთ კლანს ვეხმარებით მეორე კლანის დასამარცხებლად, მაგრამ ყველანი არიან ერთი კორუმპირებული კასტის წევრები. თუ გვინდა ჩვენი შვილების მომავალი იყოს კარგი, ეს კასტა უნდა ჩამოვაცილოთ ქვეყნის სადავეებს. რას იტყვის უგულავა ფარცხალაძეზე ამას არანაირი მნიშვნელობა არ აქვს, რადგან ორივენი კრიმინალები არიან. ერთია ის, რომ “ნაციონალური მოძრაობის” პოლიტიკურ კარიერაზე ლაპარაკი ღიმილის მომგვრელია, “ოცნება” კი ქვეყნის სათავეშია და როგორ უნდა დამყარდეს სამართლიანობა იმ ქვეყანაში, სადაც მთავარი ბრალმდებელი თავად ბრალდებულია”.
კუკავა აცხადებს, რომ შექმნილი სიტუაციიდან ერთადერთი გამოსავალია არასაპარლამენტო ოპოზიციის გაერთიანება და ადგილობრივი თვითმმართველობის არჩევნებზე ერთიანი კანდიდატურების დაყენება.
“იმისათვის, რომ ბოლო მოვუღოთ ამ კრიმინალური კასტის მმართველობას, საჭიროა გაერთიანდეს არასაპარლამენტო ოპოზიცია და არჩევნებზე დავაყენოთ ერთიანი კანდიდატები, წინააღმდეგ შემთხვევაში ჩვენი შვილების მომავალი გაურკვეველი იქნება”.
