“ორი რამ მოხდა ამ ბოლო ხანებში, რაზეც კომენტარი არ გამიკეთებია. ერთია უგულავასთვის უფლებამოსილების შეჩერება და მისივე კადრის მერის მოვალეობის შემსრულებლად დანიშვნა. სევდია უგრეხელიძის მერის ამპლუაში ყოფნა უკეთესია თუ უარესია, ეს ჯერ კიდევ საკითხავია. უგულავამ დღეს მერის სავარძელი შეცვალა მიკროფონით და დაიწყო განცხადებების გაკეთება. ეს მეტყველებს იმაზე, რომ “ნაციონალური მოძრაობა” საკმაოდ მყარად გრძნობს თავს და არ ერიდება შიდა კლანურ დაპირისპირებასაც. ფარცხალაძე ადეიშვილის კადრია. ადეიშვილი და უგულავა მთავრობაში ყოფნის დროსაც ვერ “ძოვდნენ” ერთად, ფარცხალაძეზე გაწევით უგულავა ადეიშვილს უპირისპირდება, მაგრამ ფაქტია, რომ ფარცხალაძემ მოასწრო პროკურატურის ადეიშვილის კადრებით ავსება. ადრეც მითქვამს და ვიმეორებ, მომავალი წლიდან ნაციონალები “ოცნების” დახმარებით სერიოზული შეტევისთვის ემზადებიან. რამდენად გაუძლებს პოლიტიკაში ასე თუ ისე გამოუცდელი ირაკლი ღარიბაშვილი და მისი მთავრობა “თავისუფლების ინსტიტუტის” ღრმად გამჯდარ საცეცებს, სხვა საკითხია.”
სარიშვილის განცხადებით, არაფრით არ შეიძლება მთავარი პროკურორის სკამი ნასამართლევმა ადამიანმა დაიკაოს და დასძენს, რომ დღეს ბევრი რამ კეთდება მთავრობის მიერ ისეთი, რაც არ შეიძლება.
“არ შეიძლება ნასამართლევი ადამიანის მთავარი პროკურორის პოსტზე დანიშვნა, უფრო მეტიც, არ შეიძლება ახალი ხელისუფლება წინა ხელისუფლების კადრს ნიშნავდეს მთავარ მბრალდებლად, არ შეიძლება შს მინისტრი იყოს 26 მაისის მიტინგის დამრბევი ზონდერი. დღეს ხელისუფლება ბევრ ისეთ რამეს აკეთებს, რაც არ შეიძლება!”
სარიშვილისგან განსხვავებული აზრი აქვს ევროპის სასამართლოს ყოფილ მოსამართლე მინდია უგრეხელიძეს, რომელიც აცხადებს, რომ ფარცხალაძეს ამ თანამდებობის დაკავების უფლება აქვს.
უგრეხელიძე მთავარი პროკურორის ირგვლივ ატეხილ აჟიოტაჟს “ნაციონალური მოძრაობის” მიერ დაგეგმილ “შავ პიარს” უწოდებს, რომლითაც ნაციონალები ცდილობენ ძველი ცოდვები მიჩქმალონ.
“თუ მან ჩაიდინა დანაშაული, თუნდაც ძალიან მძიმე, თუ მან ამის გამო მოიხადა სასჯელი და ამას დაემატა ის, რომ გაქარწყლდა ნასამართლეობის ვადები, ან მოეხსნა ნასამართლეობა, ასეთ შემთხვევაში ყველა ადამიანი, უკლებლივ, გათანაბრებულია ჩვეულებრივ მოქალაქესთან, რომლის მიმართაც არანაირი სამდურავი არ არსებობს და მას იურიდიულად შეუძლია დაიკავოს ნებისმიერი თანამდებობა”.
უგრეხელიძის თქმით, მთავარი პროკურორის მიერ თანამდებობის შენარჩუნების საკითხი მორალურ ჩარჩოში განსახილველი არ არის.
“მართალია, სასურველია, რომ ადამიანი იყოს მორალურად სპეტაკი, მაგრამ მორალი ძალიან დიდი მოთხოვნების მქონეა, ადამიანს მორალის გამო შეიძლება მოსთხოვო არ იყოს შურიანი, მაგრამ თუ ის შურიანია, ამისთვის მას ვერ დაიწუნებ თანამდებობისთვის, რადგან ეს ქმედებაში უნდა იყოს გამოხატული. მთავარი პროკურორი არ უნდა გადადგეს, რადგან ეს ქმედება ხელისუფლების მიერ ჩადენილი პოლიტიკური შეცდომა იქნება”.
მედიაში გავრცელებული ბოლო ინფორმაციით საქართველოს პრემიერ-მინისტრი, ირაკლი ღარიბაშვილი ადასტურებს, რომ მთავარი პროკურორი ოთარ ფარცხალაძე ნასამართლევია, თუმცა გადაჭარბებულად მიიჩნევს ფარცხალაძის ირგვლივ ატეხილ ხმაურს.
საქართველოს პრემიერ-მინისტრის ინტერვიუ “რუსთავი 2”-ის გადაცემა “პოზიციაში” დღეს საღამოს იქნება ნაჩვენები.
