_ წერს მეცნიერებათა აკადემიის პრეზიდენტი გიორგი კვესიტაძე გურიამ ოდიშარიასადმი გაგზავნილ წერილში.
თავიდან მეცნიერებათა აკადემიას საყდრისთან დაკავშირებით საკმაოდ ორაზროვანი დამოკიდებულება ჰქონდა, რის გამოც საზოგადოების კრიტიკა დაიმსახურა. დაახლოებით 2 კვირის წინ, კვესიტაძე ჟურნალისტებსა და მეცნიერებს დაპირდა, რომ აკადემია ისტორიული საბადოს გადასარჩენად უფრო მკვეთრ პოზიციას დაიკავებდა.
“ვინაიდან, ქართულ საზოგადოებაში დიდი მღელვარება გამოიწვია საყდრისის ოქროს მაღაროს ირგვლივ განვითარებულმა მოვლენებმა და ამ ჭრილში, კულტურისა და ძეგლთა დაცვის მინისტრისთვის გამოგზავნილმა ჩემმა წერილმა (N11905), აუცილებლად მივიჩნევთ ჩვენი პოზიციის ცალსახად დაფიქსირებას:
მას შემდეგ, რაც ყოფილი პრემიერ-მინისტრის ბიძინა ივანიშვილის სიტყვიერი მომართვის საფუძველზე, მეცნიერებათა აკადემია საყდრისის საკითხში ჩაერთო, გულდასმით გავეცანი უდიდესი საერთაშორისო ავტორიტეტის მქონე მეცნიერთა მიმართვებს საქართველოს პრემიერ-მინისტრისა და კულტურისა და ძეგლთა დაცვის მინისტრისადმი. შეგახსენებთ, რომ ამ მიმართვებში ისინი ხაზს უსვამენ საყდრისის მაღაროს მნიშვნელობას, მსოფლიო კულტურული მემკვიდრეობისათვის და შეშფოთებას გამოთქვამენ იმ საფრთხის გამო, რომელიც ძეგლს შეექმნა.
საქართველოს ეროვნულ მუზეუმთან ერთად, რვა წლის განმავლობაში, საყდრისში კვლევებს გერმანიის არქეოლოგიის ინსტიტუტი ატარებდა, რომელიც მსოფლიოში წამყვან არქეოლოგიურ დაწესებულებას წარმოადგენს და რომლის კომპეტენცია და ავტორიტეტი მსოფლიოში ეჭვქვეშ არსად, არასდროს დამდგარა.
რვა წლის განმავლობაში ამ უაღრესად ავტორიტეტული კვლევების საფუძველზე გამოტანილი დასკვნების ეჭვქვეშ დაყენება, მეტიც, გერმანელი მეცნიერების არაკეთილსინდისიერებაში დადანაშაულება, არაეთიკურ საქციელად მიგვაჩნია.
მივესალმებით გერმანული მხარის კეთილ ნებას, საყდრისში არქეოლოგიური კვლევების გაგრძელების შესახებ და ასევე, მის ინიციატივას, საყდრისის საკითხთან დაკავშირებით დამოუკიდებელი საერთაშორისო ექსპერტიზის დანიშვნის თაობაზე. თუმცა, მიგვაჩნია, რომ საქმე აქამდე არ უნდა მისულიყო. აქვე ვადასტურებთ ჩვენს მზადყოფნას, საჭიროების შემთხვევაში, ჩავერთოთ საერთაშორისო ექსპერტიზის მუშაობის პროცესში.
ვსარგებლობ შემთხვევით და წუხილს გამოვთქვამ იმის გამო, რომ საყდრისთან დაკავშირებით შექმნილი კომისიის მუშაობაში მეცნიერებათა აკადემია ჩართული არ ყოფილა. ამ ხარვეზის შესახებ საქართველოს ყოფილმა პრემიერ-მინისტრმა ბიძინა ივანიშვილმა მოგვიანებით მიუთითა და 26 სექტემბერს კანონის შესაბამისად, საკითხის შესწავლაში მეცნიერებათა ეროვნული აკადემიის ჩართვა მოითხოვა. საკითხის გადაწყვეტა დროში შეზღუდული იყო. არსებული რეალობიდან გამომდინარე, პრემიერ-მინისტრმა მეცნიერებათა ეროვნულ აკადემიას არქეოლოგიური კვლევების ზედამხედველობა დაავალა. არქეოლოგიური კვლევისთვის გამოყოფილი ორთვიანი პერიოდი, სრულფასოვანი სამეცნიერო დასკვნის დადების საშუალებას არ იძლევა.
მეცნიერებათა აკადემია რეალისტურად აფასებს იმ უზარმაზარ სხვაობას სამეცნიერო კომპეტენციაში, რომელიც არსებობს ერთის მხრივ გერმანიის არქეოლოგიის ინსტიტუტსა და მეორეს მხრივ თქვენი _ კულტურისა და ძეგლთა დაცვის მინისტრის მიერ შექმნილ 11-კაციან კომისიას შორის.
მიგვაჩნია, რომ შედეგი გერმანელ მეცნიერთა სასარგებლო იქნება, რამაც არ შეიძლება არ აღძრას უხერხულობის განცდა იმ მორალური ზიანის გამო, რომელიც ჩვენი ქვეყნის სამეცნიერო პრესტიჟს მიადგება. ვიმედოვნებთ რომ ქართული მხარე საკითხს საქართველოშივე გადავწყვეტთ და ეს საქმე ქვეყნის გარეთ განხილვის საგანი არ გახდება,” _ წერილს ხელს აწერს საქართველოს მეცნიერებათა ეროვნული აკადემიის პრეზიდენტი, აკადემიკოსი გიორგი კვესიტაძე.
